💞💞 അവൾ രാജകുമാരി-14 💞💞 [ ചെകുത്താനെ സ്നേഹിച്ച മാലാഖ ] 737

രാജ്യം മുഴുവൻ കൊള്ളയടിച്ച ശേഷം ബാക്കിയായവ അവർ അഗ്നിക്കിരയാക്കി ….. ചന്ദ്രവംശജരുടെ ആക്രമണത്തിൽ നിന്ന് ജീവനും കൊണ്ട് രക്ഷപ്പെട്ടോടിയ അനേകർ എങ്ങോട്ടോ പാലായനം ചെയ്തു , അവരിൽ രാജവംശത്തിലുള്ള ചിലരും ഉണ്ടായിരുന്നു .

അങ്ങനെ സൂര്യഗിരി എന്ന രാജ്യവും വംശവും ഭൂമിയിൽ നിന്ന് തുടച്ച് മാറ്റപ്പെട്ടു …… സൂര്യ ഭഗവാന്റെ കോപമോ പ്രകൃതിയുടെ വിളയാട്ടമോ എന്നറിയില്ല അവരുടെ ആക്രമണത്തിൽപെടാതെ അവശേഷിച്ച ഈ ക്ഷേത്രത്തിന്റെ ചുറ്റുപാടും പോയിട്ട് ബാക്കിയുള്ള നിലം മുഴുവൻ വരണ്ട തരിശ് ഭൂമിയായി മാറി ………

വർഷങ്ങൾ അല്ല ചില നുറ്റാണ്ടുകൾ പിന്നിട്ട ശേഷം രാജവംശത്തിന്റെ അധികാരവും ആധിപത്യവും അവസാനിച്ച് ജനാധിപത്യം നിലവിൽ വന്നപ്പോൾ അവശേഷിച്ച അടിമകളായ സൂര്യഗിരിയിലെ ജനങ്ങളെ ചന്ദ്രവംശജർ സ്വതന്ത്രരാക്കി അവരാണ് ഇന്ന് ഇവിടെ വസിക്കുന്നത് ഞാനുൾപ്പടെയുള്ള ഇന്നത്തെ സൂര്യഗിരിയിലെ ജനങ്ങൾ …. ”

വിശ്വജിത്ത് ദൂരേയ്ക്ക് തന്നെ നോക്കി നിന്നു കൊണ്ട് പിന്നീട് സംഭവിച്ച ഓരോ കാര്യങ്ങളും രാഹുലിനോട് പറഞ്ഞു ….

” അപ്പോൾ ആ ആയുധം ….. പിന്നെ കഴുകൻ കാലിൽ കോർത്തെടുത്ത് കൊണ്ട് പോയ ആ രുദ്രാക്ഷ മാല ? ”

രാഹുൽ ആകാംഷയോടെ ചോദിച്ചു .

” മ് ….. സൂര്യഗിരി എന്ന സാമ്രാജ്യത്തെ നശിപ്പിക്കാൻ ചന്ദ്രവംശജരെ സഹായിച്ചത് ആ ആയുധം തന്നെയായിരുന്നു , അത് അവരുടെ കൈകളിലായിരുന്നു എന്ന ഒറ്റ കാരണം .