✝️The NUN 4✝️ (അപ്പു) 215

അച്ഛന് പിന്നാലെ അവനും നടന്നു… പോവേണ്ട വഴിയെപ്പറ്റി അയാൾക്ക് കൃത്യമായ ഒരു ധാരണയുണ്ടായിരുന്നു… പക്ഷെ ആ ഇരുട്ടിൽ പോളിന് എല്ലാ ഭാഗവും ഒരേപോലെ തോന്നി….

കുറച്ച് ദൂരം ചെന്നപ്പോൾ കാടിന് നടുവിലായി കുറച്ച് ദൂരെ അവനൊരു വലിയ കെട്ടിടം കണ്ടു… അവന്റെ അച്ഛൻ അങ്ങോട്ടാണ് നടക്കുന്നതെന്ന് അവന് ബോധ്യമായി… അവൻ ആ പരിസരം ശ്രദ്ധിച്ചു… ഒരു മനുഷ്യക്കുഞ്ഞുപോലുമില്ല…

മുന്നോട്ട് മാത്രം ശ്രദ്ധിച്ച് നടന്ന അവന്റെ അച്ഛൻ ആ വീടിനകത്തേക്ക് കയറിപ്പോവുന്നത് കണ്ട് അവൻ അച്ഛന് പിന്നാലെ അതിനുള്ളിൽ പ്രവേശിച്ചു…

ആ വീടിനുള്ളിൽ വെളിച്ചമുണ്ട് പക്ഷെ അത് പുറത്തേക്ക് കാണില്ല… പോൾ ആ വീട് ശ്രദ്ധിച്ചു…. വാതിൽ തുറന്ന് കയറുന്നത് ഒരു വലിയ ഇടനാഴിയിലേക്കാണ്… കറുത്ത നിറമുള്ള ഭിത്തിയിൽ അങ്ങിങ്ങായി ചുവന്ന നിറമുള്ള വെളിച്ചം … അതിനിടയിൽ അർത്ഥം മനസിലാവാത്ത എന്തൊക്കെയോ ചിത്രങ്ങൾ അവൻ അതെല്ലാം നോക്കികൊണ്ട് മുന്നോട്ട് നടന്നു…

ഭിത്തിയിൽ ഇടക്കിടെ ചോരകൊണ്ട് എഴുതിയ ചില വാചകങ്ങളും ചില ചിഹ്നങ്ങളും ഉണ്ടായിരുന്നു… ആകെ നിശബ്ദമായിരുന്ന അവിടത്തെ അന്തരീക്ഷം അവനിലെ കുട്ടിയെ വല്ലാതെ ഭയപ്പെടുത്തി…

അവൻ വീണ്ടും മുന്നോട്ട് നടന്നു… അച്ഛന് പിന്നാലെ ഒരു മുറിയിലേക്ക് കടക്കാൻ തുടങ്ങിയ അവന്റെ തോളിൽ ആരോ പിടിച്ച് നിർത്തി… പെട്ടന്നുണ്ടായ ആ സ്പർശനത്തിൽ അവൻ ഞെട്ടിപ്പോയി.. അവൻ പേടിച്ച് തിരിഞ്ഞുനോക്കി..

നല്ല ഉയരവും അതിനൊത്ത ശരീരവുമുള്ള ആജാനബാഹുവായ ഒരാൾ… ഒരു കറുത്ത സ്യുട്ട് ആണ് വേഷം… അയാൾ അവനെ നോക്കി പുഞ്ചിരിച്ചു… അവന് ആ പുഞ്ചിരിയിൽ പോലും ഭയം തോന്നിപ്പോയി…

“അവിടേക്ക് മറ്റാർക്കും പ്രവേശനമില്ല… അത് പുരോഹിതന്മാർക്ക് ഉള്ളതാണ്…!!” അയാൾ പറഞ്ഞു… അവൻ അപ്പോഴും ഭയത്തോടെ തന്നെയാണ് അയാളെ നോക്കിയത്…