♥️മഴപക്ഷികളുടെ പാട്ട് ♥️ (പ്രവാസി) 1831

അപ്പോളേക്കും ടീച്ചർ രണ്ടാമത്തെ നിരയിലെ കുട്ടികൾ കഴിഞ്ഞു മൂന്നാം നിരയിലേക്ക് കടന്നു…. ബിജുവും സൗമ്യയും ഇരിക്കുന്ന ബെഞ്ചിലേക്ക്…

അതിലെ പെൺകുട്ടികളുടെ നിരയിലെ ഏറ്റവും അവസാനത്തെ കുട്ടിയുടെ നോട്ട് ബുക്ക് ടീച്ചർ കൈ എത്തി വാങ്ങാൻ നേരം  ബിജുവിന്റെ മുന്പിലെ ഡെസ്കിലേക്ക് അവന്റെ ബുക്ക് വന്നു വീണു…. ഹോം വർക്ക് ചെയ്ത പേജ് ആയിരുന്നു അതിൽ തുറന്നു വച്ചിട്ടുള്ളത്…

ആ ബുക്കിലേക്ക് നോക്കിയ ബിജുവിന് ഒന്നും മനസിലായില്ല എന്ന് തോന്നുന്നു… തന്റെ കാണാതായ ബുക്ക് കണ്ടപ്പോൾ തുറന്നു പിടിച്ച വായ് അടക്കാൻ കൂടി മറന്നായിരുന്നു അവന്റെ ഇരിപ്പ്….

ആ ബെഞ്ചിൽ അന്ന് കണക്ക് ഹോംവർക്ക് ചെയ്തത്  അവൻ മാത്രം….

“ഗുഡ്,,, ബിജൂ…. നാളെ മുതൽ  ഫസ്റ്റ് ബെഞ്ചിൽ വേണം ട്ടോ ഇരിക്കാൻ…..”

തോളിൽ മൃദുവായി തട്ടിക്കൊണ്ടു ടീച്ചർ പറഞ്ഞു…. ഹോം വർക്ക് ചെയ്യാത്തത്തിൽ കണ്ടതിലേറെ പരവേശം അവന്റെ മുഖത്തുണ്ട് ഇപ്പോൾ…. ഫസ്റ്റ് ബെഞ്ചു അവനു അത്രയേറെ ഭയം aaണെന്ന് തോന്നുന്നു…. ഇനി ഒരിക്കലും അവൻ ഹോംവർക്ക് ചെയ്യുമെന്ന് തോന്നുന്നില്ല…

ഉച്ചക്ക് ചോറ് കഴിക്കാൻ നേരം പലവട്ടം സൗമ്യ നോക്കിയെങ്കിലും ബിജു അവളെ ശ്രദ്ധിക്കുന്നേ ഉണ്ടായിരുന്നില്ല… അവൾക്ക് തെല്ലു നിരാശ തോന്നി…..

കൈ കഴുകി വന്നവർ വന്നവർ ഗ്രൗണ്ടിലേക്ക് ഓടുന്നുണ്ട്… ആഴ്ചയിലൊരിക്കൽ കിട്ടുന്ന ഫുഡ്ബോളും ഷട്ടിൽ ബാറ്റും ആ ദിവസമാണ് ക്ലാസ്സിനു അനുവദിക്കപ്പെട്ടിട്ടുള്ളത്….

ശരിക്കും ഇൻട്രോവേർട്ട് ആയ ബിജു ഉച്ചക്ക് കളിക്കാൻ പോവുക പതിവില്ല…. പക്ഷേ ഒരുവിധം എല്ലാവരും കളിക്കാൻ പോയതോടെ അന്ന് ക്ലാസ്സിൽ മൂന്നോ നാലോ പേര് മാത്രമാണ് ബാക്കി ഉള്ളത്… അതിലൊരാൾ സൗമ്യയാണ്… അവൾ കൈ കഴുകി വന്നുവെങ്കിലും സീറ്റിൽ തന്നെ ഇരിപ്പാണ്….