♥️മഴപക്ഷികളുടെ പാട്ട് ♥️ (പ്രവാസി) 1831

♥️♥️♥️♥️

ബെൽ അടിക്കാൻ  നേരമാണ് ബിജു ക്ലാസ്സിലേക്ക് കയറി ചെന്നത്… അവളെ ശ്രദ്ധിക്കാതെ അവൻ തന്റെ സീറ്റിലേക്ക് ഇരുന്നു…

അവൻ നോക്കാത്തത് കൊണ്ട് തന്നെ ഇടയ്ക്കിടെ  അവൾക്ക് അവനെ എളുപ്പത്തിൽ നോക്കാൻ സാധിച്ചു…..

അല്പം പഴകിയത് എങ്കിലും വൃത്തിയുള്ള ഷർട്ടും ഒതുങ്ങിയ മുടിയും ചുണ്ടുകൾക്ക് മുകളിൽ നേർത്ത രോമങ്ങളും  എല്ലാം കൊണ്ടും കാണാൻ മോശമില്ലാത്ത പയ്യൻ… പക്ഷേ മുഖത്തിന് ഒരു വിഷാദ ഭാവമാണ്  സ്ഥായി….

“ശ്ശ്….. ശ്ശ്… ഡാ ബിജൂ….”

സൗമ്യ ഇടക്ക് ടീച്ചർ കാണാതെ  അവനെ വിളിച്ചു… പക്ഷേ അവൻ  അവളെ മൈൻഡ് ചെയ്തതെ ഇല്ല… മലയാളം ആയിരുന്നു ആദ്യ പിരീഡ്…

ബെൽ  അടിച്ചിട്ടും ഏതാനും മിനിറ്റ് കൂടി ടീച്ചർ ക്ലാസ്സിൽ ഉണ്ടായിരുന്നു… അടുത്ത പിരീഡ് കണക്ക്!!!!  ബെസ്സി ടീച്ചർ  വന്നു കഴിഞ്ഞാണ്  മലയാളം ടീച്ചർ ക്ലാസ്സിൽ നിന്ന് പോവുന്നത്…. അത് കൊണ്ട് തന്നെ അവൾക്ക് അവനോട് സംസാരിക്കാൻ കഴിഞ്ഞില്ല…

ബെസ്സി ടീച്ചറുടെ മുഖം അന്ന് കടന്നൽ കുത്തിയത് പോലെ ഉണ്ട്… കുട്ടികളുടെ മുഖഭാവം ആണെങ്കിൽ ഒറ്റക്ക് പ്രേത പടം കാണുന്നത് പോലുള്ള പേടിയിലും….. ഇടക്ക് അടുത്ത് ഇരിക്കുന്നവരുടെ ബുക്കിൽ നോക്കുന്നും, ചിലരെങ്കിലും പരസ്പരം ചോദിക്കുന്നുമുണ്ട്  ഹോം വർക്ക് ചെയ്തോ എന്ന്…

“ആ, ഹോം വർക്ക് ചെയ്താ  എല്ലാരും???”

ടീച്ചറുടെ  ശബ്ദം ക്ലാസ്സിൽ മുഴങ്ങി…. ബിജുവിന്റെ നെഞ്ചിടിപ്പ് ഏറി… അവനാണെങ്കിൽ വെപ്രാളത്തിന്റെ ഇടയിൽ തന്റെ ബുക്ക് കൂടി കാണാനില്ല…..

അപ്പോളേക്കും ടീച്ചർ അപ്പുറത്തെ ക്ലാസ്സിലേക്ക് ക്ലാസ്സ് ലീഡർ സായൂജിനെ വിട്ടു….

സർവത്ര നിശബ്ദതയിലേക്ക് അങ്ങോട്ടുമിങ്ങോട്ടും നടക്കുന്ന ടീച്ചറുടെ കാലടി ശബ്ദം മാത്രം ഇടയ്ക്കിടെ മുഴങ്ങി…. എല്ലാവർക്കും ബുക്ക് എടുക്കാനുള്ള സമയം നൽകി ടീച്ചർ ഫസ്റ്റ് ബെഞ്ചിലെ പെൺ കുട്ടികളുടെ ഹോം വർക്ക് നോക്കി തുടങ്ങി….