♥️മഴപക്ഷികളുടെ പാട്ട് ♥️ (പ്രവാസി) 1831

വീണ്ടും ദിവസങ്ങൾ കടന്നു പൊയ്ക്കൊണ്ടിരുന്നു….

അങ്ങനെ ഒരു ദിവസം സ്കൂൾ ക്യാപ്റ്റൻ രഞ്ജിത്തിന്റെ ബുക്കിൽ ഒരു അക്ഷന്തവ്യമായ അപരാധം കണക്ക് ടീച്ചർ കണ്ടു പിടിച്ചു…. അതിന്റെ പുറകിൽ ക്രിക്കറ്റ് ബാൾ വാങ്ങാൻ ഷെയർ ഇട്ടവരുടെ  പേര് എഴുതിയിട്ടുണ്ടത്രേ….

ടീച്ചർ ഗംഭീരമായ കേസ് അന്വേഷണം പ്രഖ്യാപിച്ചു…. ഭാഗ്യം സിബിഐ  വന്നില്ല…. അതിനു മുൻപേ തന്നെ ടീച്ചർ കൊലപാതകതിനേക്കാൾ വലിയ ഒരു അപരാധം സൗമ്യയുടെ നോട്ട് ബുക്കിൽ കൂടി കണ്ടു പിടിച്ചു….

‘SOUMYA VS BIJU’ എന്ന് ഇംഗ്ലീഷ് അക്ഷരങ്ങളിൽ എഴുതിയിരിക്കുന്നു… രണ്ടിലെയും കോമൺ ആയ  ‘U’ രണ്ടിലും നിന്ന് വെട്ടി കളഞ്ഞിട്ടുണ്ട്….

അതിന് തൊട്ട് അടുത്തായി ‘FLAME’ എന്ന് എഴുതിയിട്ടുണ്ട്… അതിലെ  ‘F’ ഒഴിച്ച് ഉള്ള അക്ഷരങ്ങളും കൂടി  വെട്ടി കളഞ്ഞിട്ടുണ്ട്….

“സൗമ്യ Vs..   Flame”

ടീച്ചർ അവളുടെ ബുക്കിൽ നോക്കി ഉറക്കെ വിളിച്ചു പറഞ്ഞു… എന്തായാലും ടീച്ചർ ആൺകുട്ടിയുടെ അതായത് ബിജു വിന്റെ പേര് മാത്രം വിളിച്ചു പറഞ്ഞില്ല….

പെട്ടന്ന് കലപില ശബ്ദം ഉയർന്നു… പക്ഷേ  ടീച്ചറുടെ ചൂരൽ ഫ്രണ്ട് റോയിലെ ഡെസ്കിൽ ശക്തമായി പതിക്കുന്ന ശബ്ദം മുഴങ്ങിയതോടെ എല്ലാ നാവുകളും കെട്ടപ്പെട്ടു… വീണ്ടും നിശബ്ദതയുടെ നിമിഷങ്ങൾ….. 6ബി എന്ന ലോകം മുഴുവൻ  ടീച്ചറുടെ അടുത്ത നടപടി കാത്തിരിക്കുന്നു.

പിടിച്ചത് സൗമ്യയെ ആണെങ്കിലും ബിജുവിന്റെ കൈകൾ യുദ്ധത്തിന് തയ്യാറെടുക്കും പോലെ തുടയിലും ട്രൗസറിലും  ഉരസാനും കൂട്ടി തിരുമ്മാൻ തുടങ്ങിയിട്ടുണ്ട്….പക്ഷേ സൗമ്യയുടെ  കണ്ണുകളിൽ ആണാ ബുക്ക് ടീച്ചർ കണ്ടതിന്റെ റിഫ്ലക്ഷൻ കണ്ടത്…. ടാപ്പ് ഊരി പോയിട്ട് മരകമ്പു കുത്തി കയറ്റി വച്ചിട്ടും വെള്ളം നിലക്കാത്ത  സ്കൂളിലെ ടാപ്പ് പോലെ അത് നിറഞ്ഞു പുറത്തോട്ട് ഒഴുകാൻ തുടങ്ങിയിട്ടുണ്ട്….

ക്ലാസ്സ് ലീഡർ സായൂജിന്റെ പാതി ചന്തി മാത്രമാണ് ബെഞ്ചിൽ ഉറപ്പിച്ചിട്ടുള്ളത്… ടീച്ചറുടെ ദീർഘമായ ഒരു ശ്വാസോഛാസം മാത്രം മതി  അവനു അവൻ ഇറങ്ങിയോടാനും എല്ലാ ക്ലാസ്സ് മുറികളിലേയും  ചൂരൽ  കൊണ്ടുവരാനും…..