ശ്രീധരന്റെ ശ്രീദേവി (മുഴുവൻ ഭാഗം) – [Santhosh Nair] 995

വിളിക്കുമ്പോൾ വരണം എന്ന് പറഞ്ഞു ഓട്ടോ പറഞ്ഞു വിട്ടിട്ടു അവർ തിണ്ണയിലേയ്ക്ക് കയറി. വന്നു കയ്യിൽ പിടിച്ചു വരവേറ്റ അമ്മാവനോട് ഞാൻ സംസാരിച്ചു നിൽക്കുമ്പോൾ ശ്രീദേവി അവളുടെ മുറിയിലേയ്ക്കു പോയി. അമ്മായിയും പുറകെ പോകുന്നത് കണ്ടു.

കുറച്ചു കഴിഞ്ഞപ്പോൾ രണ്ടുപേരും താഴേയ്ക്കു വന്നു. അമ്മായിയുടെ കയ്യിൽ ഒരു ഓട്ടുമൊന്ത നിറയെ സംഭാരം ഉണ്ട്. അതവർ ശ്രീധരന്റെ നേരെ നീട്ടി.

“എന്തെ ബാഗ് ഒന്നും ഇല്ലാതെ വന്നത്?” അമ്മായി ചോദിച്ചു “രണ്ടു ദിവസങ്ങൾ കഴിഞ്ഞു പോയാൽ പോരെ?”

“ഇല്ല അമ്മെ, എനിക്കൊത്തിരി ജോലിയുണ്ട്. അടുത്തയാഴ്ച വരാം.ശ്രീദേവി വേണമെങ്കിൽ രണ്ടു ദിവസം നിൽക്കട്ടെ”, സംഭാരം കുടിച്ചു മോന്ത നീട്ടിക്കൊണ്ടു,ശ്രീധരൻ പറഞ്ഞു.

അത് കേട്ടപ്പോൾ അമ്മായിയുടെ മുഖം മങ്ങി. എന്തോ ഒരു സംശയ ദൃഷ്ടിയോടെ അവളെ നോക്കുന്നത് കണ്ടു. അവൾ ഒന്നും പറയാതെ മുഖം താഴ്ത്തി.

അമ്മാവന്റെ കൂടെ കുറച്ചു നേരം പറമ്പിൽ ഒക്കെ ചുറ്റി നടന്ന ശേഷം ഉച്ചയ്ക്ക് ഭക്ഷണം കഴിഞ്ഞാണ് ഇറങ്ങിയത്. തനിക്കിഷ്ടപ്പെട്ട സാമ്പാറും അവിയലും ചെറുപയർ തോരനും പുളിശ്ശേരിയും വലിയ പപ്പടവും ഒക്കെയുണ്ടായിരുന്നു. കൂടാതെ അമ്മായിയുടെ സ്‌പെഷ്യൽ പാലട പ്രഥമനും പാൽപ്പായസവും. നന്നായി ഭക്ഷണം കഴിച്ചു.

ഉച്ചയ്ക്കുറങ്ങുന്ന ശീലം ഇല്ലാത്തതിനാൽ അമ്മാവനോടൊപ്പം പറമ്പിൽ ചുറ്റി നടന്നു. അമ്മാവന് ശ്രീധരനെ വളരെ ഇഷ്ടമാണ്. കൃഷികാര്യങ്ങൾ സംസാരിയ്ക്കാൻ ഒരാളെ കിട്ടിയത് പോലെ വേറെയും.

രണ്ടുമണി കഴിഞ്ഞപ്പോൾ തിരികെ പോകാൻ ഓട്ടോ വന്നു. പ്രത്യേകിച്ച് അവളോട് ഒന്നും സംസാരിയ്ക്കാൻ തോന്നിയില്ല. “പോയിട്ട് വരാം” എന്നു പറഞ്ഞിട്ട് ഇറങ്ങി. അമ്മാവനോടും അമ്മായിയോടും അതുതന്നെ പറഞ്ഞു. എങ്കിലും ഇറങ്ങുമ്പോൾ മനസ്സിൽ ഒരു ഭാരം തോന്നി. എന്തോ ഒരു നഷ്ടബോധം.

ഗേറ്റ് കടക്കുമ്പോൾ അറിയാതെ തിരിഞ്ഞു നോക്കി. ഒരു നിർവികാര മുഖത്തോടെ അവൾ നിൽക്കുന്നുണ്ട്. അമ്മായിയും അമ്മാവനും അവളോട് എന്തോ സംസാരിയ്ക്കുന്നുമുണ്ട്. എന്തോ നഷ്ടപ്പെട്ട ഒരു മുഖഭാവം ഉണ്ടോ? അതോ തന്റെ തോന്നലാണോ?

ഓട്ടോയിൽ ഇരുന്നു യാത്ര ചെയ്യുമ്പോൾ എതിരെ വരുന്ന ജോടികളോടു അല്പം അസൂയ തോന്നി. സുന്ദരിയായ പെണ്ണിനെ കല്യാണം കഴിച്ചു അവളുടെ കൈയിൽ പിടിച്ചുകൊണ്ടു അമ്പലത്തിലും ഒക്കെ പോകാൻ തനിയ്ക്കും ആഗ്രഹം ഇല്ലാതില്ല.

ആരുടെയെങ്കിലും ശാപമാണോ ഇതിനു കാരണം? ആരെയും പ്രേമിച്ചു വഞ്ചിച്ചിട്ടില്ല. അല്പമെങ്കിലും പ്രേമം എന്ന വിചാരം തോന്നിയത് അവളോട്‌ മാത്രമാണ്. ആ വിനയവും സൗന്ദര്യവും അടക്കവും ഒതുക്കവും ആണ് എല്ലാത്തിലും ഉപരി തന്നെ ആകർഷിച്ചത്. അമ്മയ്ക്കും അച്ഛനും അവളെ ഇഷ്ടമാണ്. അവർക്കിടയിലും ഒരു പ്രശ്നവും ഇല്ല. എന്താവും ഈ അകൽച്ചക്കു കാരണം? സമ്മിശ്ര വികാരങ്ങൾ മനസ്സിനെ മഥിയ്ക്കുന്നു.

ഉച്ചകഴിഞ്ഞയുടനെ ശ്രീധരൻ തിരികെ ഭാര്യയില്ലാതെ തന്നെ വന്നത് കണ്ടപ്പോൾ അമ്മ ചോദിച്ചു “മോൾ എന്തിയെടാ? നീയെന്താ പെട്ടെന്ന് തിരികെ വന്നത്?”

“ഒന്നുമില്ല അമ്മെ, അവൾ അവിടെ ഒരു ദിവസം നിൽക്കട്ടെ. അമ്മാവന് നല്ല സുഖം ഇല്ലെന്നു തോന്നുന്നു.”

“എന്നാൽ നിനക്കും രണ്ടു ദിവസം നിന്നിട്ടു വന്നാൽ പോരായിരുന്നോ? പെട്ടെന്ന് പോന്നത്?”

“കുറെ പണികൾ ഉണ്ടമ്മേ. വാഴയും പച്ചക്കറികളും നോക്കാൻ വൈകിട്ട് കൃഷിഭവൻകാര് വരുന്നുണ്ട്”

“അവന്റെ ഒരു വാഴ, പോടാ അവിടുന്ന്”

അമ്മയോട്‌ അധികം സംസാരിയ്ക്കാതെ മുകളിലെ മുറിയിൽ വന്നു കിടന്നു.