വൈഷ്ണവം 5 (മാലാഖയുടെ കമുകൻ) 1132

ഒത്തിരി ആളുകളുടെ ഇടക്ക് എന്തോ നഷ്ടമായ അവസ്ഥയിൽ ആയിരുന്നു വിഷ്ണു..

എന്നാൽ അതെന്താണെന് അവനും അറിയില്ല.

കഴിഞ്ഞ കുറച്ചു ദിവസമായി വേണ്ടപ്പെട്ട ആരോ സങ്കടത്തിൽ ഉള്ളതുപോലെ ഒരു തോന്നൽ അവനിൽ ഉണ്ടായിരുന്നു..

എന്നാൽ അത് ആരാണെന്നോ എന്താണെന്നോ അവന് അറിയില്ലായിരുന്നു..

ഇളം നീല കുർത്തയും കറുത്ത പാന്റും രാജസ്ഥാനി ഷൂസും ആയിരുന്നു അവന്റെ വേഷം..

ആളുകൾ വീണ്ടും വന്നു പന്തലിൽ ഇരുന്നു.. ചിലർ കൂടി നിന്നു സംസാരിക്കുന്നു..

അവന്റെ കൂട്ടുകാർ വന്നവർക്ക് ചായ കൊടുക്കുന്ന തിരക്കിൽ ആയിരുന്നു..

എല്ലാവരും സന്തോഷത്തിൽ..

സമയം കുറച്ചു കൂടെ കഴിഞ്ഞപ്പോൾ ആണ് ഒരു പ്രേമിയർ പത്മിനി കാർ ചീറി പാഞ്ഞു വന്നു ഗേറ്റും കടന്ന് മിറ്റത്ത് നിരത്തിയ രണ്ടു കസേരകളും ഇടിച്ചു തെറിപ്പിച്ചു അവിടെ നിന്നത്..

അവിടെ നിന്ന രണ്ടുപേർ ചാടി മാറിയതുകൊണ്ടു വണ്ടി അവരെ ഇടിച്ചില്ല..

ബഹളം കേട്ട് കൂട്ടുകാരോട് സംസാരിച്ചു കൊണ്ടിരുന്ന വിഷ്ണു ഞെട്ടി തിരിഞ്ഞു നോക്കി..

ഡോർ തുറന്ന് വൈഷ്ണവിയുടെ അമ്മ അരുന്ധതി കാറിൽ നിന്നും ശരവേഗത്തിൽ ഇറങ്ങിയപ്പോൾ വിഷ്ണു വേഗം അവിടേക്ക് ചെന്നു..

“എന്താ അമ്മേ ഇത്..? ബ്രേക്ക്‌ പോയോ..?”

പടക്കം പൊട്ടും പോലെ ഒരു അടി ആയിരുന്നു അവന്റെ ചോദ്യത്തിന് അവർ കൊടുത്ത മറുപടി..

അത് കണ്ട് ആളുകൾ ഞെട്ടി വിറച്ചു നിന്നു..

വിഷ്ണു വിശ്വസിക്കാൻ പോലും പറ്റാതെ കാലുകൾ ഉറച്ചത് പോലെ അവിടെ നിന്നു പോയി..