വസന്തം പോയതറിയാതെ -16

Author :ദാസൻ

[ Previous Part ]

മറുത്ത് എന്തെങ്കിലും പറഞ്ഞാൽ നടപടി ശരിയാവില്ല എന്ന് കണ്ടതുകൊണ്ട് പോകാൻ തന്നെ തീരുമാനിച്ചു. പോയിട്ട് ഇന്ന് തന്നെ തിരിച്ചു വരാനുള്ള തയ്യാറെടുപ്പിൽ പെട്ടെന്ന് റെഡിയായി ഇറങ്ങി. യാത്രക്കിടയിൽ കളക്ടർ വിളിച്ചെങ്കിലും, ഫോൺ അറ്റൻഡ് ചെയ്തില്ല. അമ്മ ഇത്രയും ദേഷ്യപ്പെട്ട് കണ്ടിട്ടില്ല, എന്തിനാണാവോ എന്നെ വിളിച്ചു വരുത്തുന്നത് യാത്രയിൽ മുഴുവൻ ചിന്തയായിരുന്നു. ഉച്ചയോടുകൂടി കൊച്ചിയിലെ വീട്ടിലെത്തി, വണ്ടിവരുന്ന ശബ്ദം കേട്ട് മോള് പുറത്തേക്ക് വന്നു മുഖം കടന്നല് കുത്തിയത് പോലെ വീർത്തിരുന്നു. വന്നതുപോലെതന്നെ അതേ സ്പീഡിൽ തിരിച്ചു അകത്തേക്ക് കയറി. ഞാൻ കാറിൽ നിന്നും ഇറങ്ങി അകത്തേക്ക് കയറുമ്പോഴേക്കും അമ്മയെയും അച്ഛനെയും മറ്റുള്ളവരുടെയും മോള് ഹാളിൽ എത്തിച്ചിരുന്നു. കയറിയ പാടെ അമ്മയുടെ ചോദ്യം

” എന്താണ് നിന്റെ പ്ലാൻ, ഇപ്പോഴും എപ്പോഴും ഇങ്ങനെ ഒറ്റത്തടിയായി നടക്കാനാണോ ഉദ്ദേശം. അത് ഇനി നടക്കില്ല ഇത്രയും നാൾ നിന്റെ ഇഷ്ടത്തിന് വിട്ടു ഇനി, ഞങ്ങൾ പറയും നീ അനുസരിക്കും ”

” ഇതിനാണോ ഇത്ര അത്യാവശ്യമായി വിളിച്ചു വരുത്തിയത്, ഇത് ഫോണിലൂടെ പറഞ്ഞാലും എനിക്ക് മനസ്സിലാകുമായിരുന്നു ”

” ഇല്ല, നിനക്ക് മനസ്സിലാവില്ല. അതുകൊണ്ടുതന്നെയാണ് ഇവിടെ വിളിച്ചു വരുത്തിയത്. ഇനി ഇങ്ങനെ പോയാൽ പറ്റില്ല എത്രയും വേഗം നിന്റെ വിവാഹം നടത്തണം. അതാണ് ഞങ്ങളുടെ തീരുമാനം, അത് ധിക്കരിക്കാനാണ് നിന്റെ തീരുമാനമെങ്കിൽ അച്ഛനും അമ്മയും എന്ന് പറഞ്ഞ് ഇനി ഇങ്ങോട്ട് വരരുത് ”

” ഇത്ര ചെറിയ കാര്യത്തിന് അമ്മ എന്തിനാണ് ദേഷ്യപ്പെടുന്നത് ”

” ഇത് അത്ര ചെറിയ കാര്യമൊന്നുമല്ല ഞങ്ങൾക്ക്, വലിയ കാര്യം തന്നെയാണ് ”

” ആയിക്കോട്ടെ നിങ്ങൾക്ക് വലിയ കാര്യം തന്നെയാണ്. ഞാൻ എതിരല്ല, നിങ്ങളുടെ ഇഷ്ടം തന്നെ നടക്കട്ടെ ”

“നീ, ആ അമ്മ കാലൊടിഞ്ഞിരുന്നിട്ട് ആരോടും പറയാതിരുന്നത് എന്ത്? “