രണ്ടാം ജന്മം 4[അജി] 205

 

“വിശന്നിട്ടാ അവള് കരയുന്നത്. ഈ നേരത്ത് ഞാൻ അവൾക്ക് പാല് കൊടുക്കാറുണ്ട്. ഇവിടെ അതിന് പറ്റിയ സ്ഥലമുണ്ടോ എന്ന് നോക്കോ…”

 

“ഹാ… ഞാൻ നോക്കട്ടെ…”

 

പൊന്നുവിന്റെ കരച്ചിൽ കണ്ട് ചെക്കന്റെ അമ്മ ഞങ്ങൾക്കരികിലേക്ക് വന്നു.

 

“എന്തിനാ മോള് കരയുന്നത്….”

അവർ ഞങ്ങളോട് ചോദിച്ചു.

 

“അവൾക്ക് വിശന്നിട്ടാ… ആരും ഇല്ലാത്ത ഒരു സ്ഥലം കാണിച്ച് തരോ…അവൾക്ക് പാല് കൊടുക്കാനാ…”

ഞാൻ ചോദിച്ചു.

 

“വാ….ഞാൻ കാട്ടി തരാം… ”

 

അവർ ഞങ്ങളെ വിളിച്ചു. ഞങ്ങൾ അവർക്ക് പിന്നിലായി പോയി.

 

“ഇവിടെ പൊക്കോ ആരും വരില്ല…”

 

അവർ ഒരു മുറി തുറന്ന് ഞങ്ങളെ അകത്തോട്ട് പറഞ്ഞു വിട്ടു. ഒരു ഓഡിറ്റോറിയത്തിൽ വെച്ചായിരുന്നു റിസപ്ഷൻ വെച്ചിരുന്നത്. ആ മുറി വസ്ത്രം മാറാനും മറ്റും ഉള്ളതാണ് എന്ന് തോന്നുന്നു. അവിടെ കുറച്ച് തുണികളും പെട്ടികളും ഉണ്ടായിരുന്നു.

 

അനു അവിടെ ഒരു കസേരയിൽ ഇരുന്ന് കുഞ്ഞിന് പാല് കൊടുക്കാൻ തുടങ്ങി. ഞാൻ അപ്പോൾ പുറത്തേക്കിറങ്ങാൻ നോക്കി.

 

“കിച്ചുവേട്ടാ… പോവല്ലേ…”

അവൾ പുറകിൽ നിന്ന് വിളിച്ചു.

 

“ഇവിടെ നിൽക്കോ… എനിക്ക് ഒറ്റക്ക് ഇവിടെ നിൽക്കാൻ പേടിയാ…”

 

അവൾ എന്നോട് ആവശ്യപ്പെട്ടു. അപ്പോഴാണ് ഞാൻ ശ്രെദ്ധിച്ചത് അവൾ എന്നെ കിച്ചുവേട്ടാന്ന് വിളിച്ചത്. അവൾ ആരും ഇല്ലാത്തപ്പോൾ എന്നെ അങ്ങനെ വിളിച്ചിരുന്നില്ല. മറ്റുള്ളവരുടെ മുൻപിൽ വെച്ച് മാത്രമേ അങ്ങനെ വിളിച്ചിരുന്നു.

 

അവൾ അങ്ങനെ വിളിച്ചപ്പോൾ എനിക്ക് സന്തോഷമായി. എന്നെ അവൾ അംഗീകരിച്ചത് പോലെ.അനു അങ്ങനെ വിളിച്ചപ്പോൾ സന്തോഷം കൊണ്ട് എന്റെ കണ്ണ് നിറഞ്ഞു.

 

ഞാൻ അവൾക്കൊപ്പം ആ മുറിയിൽ നിന്നു. പൊന്നു വിശപ്പ് മാറിയപ്പോൾ കരച്ചിൽ നിർത്തിയിരുന്നു.

 

ഞങ്ങൾ അവിടത്തെ ചടങ്ങുകൾ തീർത്ത് അവരോട് യാത്ര പറഞ്ഞിറങ്ങി. പൊന്നു അപ്പോഴേക്കും ഉറങ്ങിയിരുന്നു. അനു പൊന്നുവിനെ അവിടെ കിടത്തി. ഞങ്ങൾ കുളിച്ച് വസ്ത്രം മാറി. കുറേ പേർ അപ്പോഴേക്കും പോയിരുന്നു. ഇപ്പോൾ അത്യാവശ്യം ബന്ധുക്കൾ മാത്രമേ ഉണ്ടായിരുന്നു.