👤മെർവിൻ 6👥 (ജെസ്സ് ) [VICKEY WICK] 161

ഓർമകളിൽ നിന്നും മുക്തമായപ്പോൾ സ്റ്റെന പതുക്കെ ജെസ്സിന്റെ അടുത്തെത്തി. ജെസ്സിന് മൈൻഡ് ഇല്ല. സ്റ്റെന പതുക്കെ അവന്റെയടുത്ത്, ഇടതുവശത്തായി ഇരിക്കാൻ തുടങ്ങി. പെട്ടെന്ന് ജെസ്സ് പറഞ്ഞു.

 

 

“നോ…. ”

 

 

സ്റ്റെന ഞെട്ടിപ്പോയി. അവൾ ചോദിച്ചു.

 

 

“എന്താ എന്ത് പറ്റി? ”

 

 

“ഒന്നുമില്ല, ബുദ്ധിമുട്ട് ആകില്ലെങ്കിൽ ടീച്ചർ എന്റെ വലതുവശത്തേക്ക് ഇരിക്കാമോ? ”

 

 

“ഓക്കേ… ”

 

 

സ്റ്റെന അവന്റെ വലതുവശത്തേക്ക് ഇരുന്നു. അവൾക്ക് അവന്റെ പെരുമാറ്റത്തിന്റെ കാരണം മനസിലായതേ ഇല്ല. അവൾ പതിയെ അവന്റെ പിന്നിൽ കൂടി കൈ നീട്ടി ഇടതു ഭാഗത്ത്‌ തപ്പി നോക്കി. കാഴ്ചയിലെന്ന പോലെ തന്നെ, ശൂന്യം. ഒന്നിലും കൈ തടയുന്നില്ല.

 

 

“ടീച്ചർ എന്താണ് നോക്കുന്നത്? ”

 

 

ജെസ്സിന്റെ ചോദ്യം പെട്ടെന്നായിരുന്നു. സ്റ്റെന ഞെട്ടി കൈ പിൻവലിച്ചിട്ട് പറഞ്ഞു.

 

 

“ഒന്നുമില്ല. ”

 

 

അവൻ അവളുടെ ചേഷ്ടകൾ കണ്ടിരിക്കാൻ ഇടയില്ലെന്നു ഉറപ്പാണ്. എന്നിട്ടും എങ്ങനെ അവൻ അത് തിരിച്ചറിഞ്ഞു. കുറച്ച് സമയം അവർ പരസ്പരം ഒന്നും സംസാരിച്ചേ ഇല്ല. എങ്കിലും തനിക്ക് പറയാനുള്ളത് ഒക്കെയും അവനിലേക്ക് എത്തുന്നത് പോലെയും, അവൻ മനസിലാക്കുന്നത് പോലെയും അവൾക്ക് തോന്നി. ഇനിയും മൗനമായിരുന്നിട്ട് കാര്യമില്ലെന്നു വിചാരിച് അവൾ പറഞ്ഞു തുടങ്ങി.

 

 

“ജെസ്സ്, മോൻ ക്ലാസിൽ ശ്രദ്ധിക്കുന്നത് കുറവാണെങ്കിൽ കൂടി പരീക്ഷകളിൽ അസാധാരണമായ പ്രകടനം കാഴ്ചവെക്കുന്നുണ്ട്. നീ ഞങ്ങളെയെല്ലാം വളരെയേറെ അത്ഭുതപെടുത്തുന്നു. ഒരുപാട് ടാലെന്റ്റ് ഉള്ളത് കുട്ടിയാണ് നീ. എന്നിട്ടും നീ എന്തിനാണ് ഇങ്ങനെ ആരോടും മിണ്ടാത്തെ ഒരു സന്തോഷവും ഇല്ലാതെ ഇരിക്കുന്നത്. നീ എല്ലാം കൊണ്ടും നല്ല കുട്ടിയാണ് ജെസ്സ്. മോനു മനസ്സിൽ എന്തെങ്കിലും വിഷമം ഉണ്ടെങ്കിൽ എന്നോട് തുറന്നു പറയാൻ ഒരു മടിയും വിചാരിക്കണ്ട. എത്ര വ്യക്തിപരമായ കാര്യവും എന്നോട് പറയാം. ഐ ക്യാൻ ഹെല്പ് യു. ”

 

 

ജെസ്സ് സ്റ്റെനയെ നോക്കി എന്നിട്ട് പതുക്കെ സ്റ്റേനയുടെ പുറകിലേക്ക് നോക്കി. സ്റ്റെന ജെസ്സിന്റെ വലതുവശത്തു അവന് നേരെ ചെരിഞ്ഞാണ് ഇരുന്നിരുന്നത്. ജെസ്സിനൊപ്പം സ്റ്റേനയും തിരിഞ്ഞു നോക്കി. ഒരു ടീച്ചർ സ്റ്റേനയെ തുറിച്ചു നോക്കി വായും പിളർന്നു അന്തം വിട്ട് നിൽക്കുന്നു. സ്റ്റെന ദീർഘമായൊന്നു നിശ്വസിച്ചിട്ട് പറഞ്ഞു.

 

“ഓ, ടെസി നീ ആയിരുന്നോ?! ഞാൻ ചെറുതായി ഭയന്ന് പോയി. ”

 

ടെസിയുടെ മുഖത്തെ അമ്പരപ്പ് അപ്പോഴും മാറിയിട്ടില്ല. അവൾ ചോദിച്ചു.

 

“സ്റ്റെന, നീ എന്താ ഒറ്റക്കിരുന്നു സംസാരിക്കുന്നത്? ”