👤മെർവിൻ 6👥 (ജെസ്സ് ) [VICKEY WICK] 161

ജെസ്സ് കാറിൽ നിന്ന് ഇറങ്ങിയ ഉടനെ തന്റെ റൂമിന്റെ കട്ടിലിൽ പോയി കമഴ്ന്നു. അച്ഛനമ്മമാരുടെ വഴക്ക് രാത്രി വൈകിയും തുടർന്നു. രാവിലെ ജെസ്സ് ഉണർന്ന് സ്കൂളിൽ പോകുവാൻ ഒരുങ്ങി. പപ്പ ഓഫീസിലേക്ക് പോകുവാൻ ഇറങ്ങി. അദ്ദേഹം പട്ടണത്തിലെ ഒരു കമ്പനിയിലെ മാനേജർ ആയിരുന്നു.

അവിടെ അടുത്ത് തന്നെ ചെറിയ കുട്ടികളുടെ സ്കൂളിലെ ടീച്ചർ ആയിരുന്നു ക്ലാര. അവർ രാവിലെ തന്നെ ജെസ്സിന് ആവശ്യമായതൊക്കെ തയ്യാറാക്കി വെക്കും. പോകാൻ റെഡി ആയശേഷം ജെസ്സിനെ ബസിൽ കയറ്റി വിട്ടിട്ട് ആണ് അവർ സ്കൂളിലേക്ക് പോകുക. പുറമെ നിന്നും നോക്കുന്നവർക് അവരുടെ കുടുംബം വളരെ സന്തുഷ്ടമായത് ആയിരുന്നു. ക്ലാരയും റെക്സും മറ്റുള്ളവരുടെ മുൻപിൽ വളരെ സ്നേഹ സമ്പന്നരായാണ് പെരുമാറിയിരുന്നതും.

ജെസ്സ് സ്കൂൾ ബസിൽ കയറി. അവൻ എല്ലാവരെയും നോക്കി കൊണ്ട് പിന്നിലേക്ക് നടന്നു. കുട്ടികൾ മിക്കവരും കളിയും ചിരിയുമായിരിക്കുന്നു. മറ്റൊന്നും അവർ ശ്രദ്ധിക്കുന്നതേയില്ല. ചിലർ ജെസ്സിനെ നോക്കുന്നുണ്ട്. അവരുടെയൊക്കെ മുഖത്ത് നീരസവും, പുച്ഛവും മാത്രം. ഒരു പെൺകുട്ടി മാത്രം ജെസ്സിനെ നോക്കി പുഞ്ചിരിച്ചു. എന്നാൽ അവന്റെ ചുണ്ട് വിടർന്നതേയില്ല. സ്ഥിരമായി മുഖത്ത് ഉറഞ്ഞുപോയ ഒരു നിർവികാരത.

അവൻ ബസിന്റെ ഏറ്റവും പിന്നിലെ സീറ്റിന്റെ തൊട്ട് മുൻപുള്ള സീറ്റിൽ പോയിരുന്നു. പുറത്തേക്കു കണ്ണും നട്ടാണ് ഇരിപ്പെങ്കിലും അത് കാണുന്ന ആർക്കും മനസിലാകും അവന്റെ കണ്ണുകളിൽ വഴിയോരകാഴ്ചകൾ പതിയുന്നതെ ഇല്ലെന്നു. ബസ് സ്കൂൾ കോമ്പൗണ്ടിലേക്ക് കയറി. മറ്റു കുട്ടികൾ പുറത്തേക്ക് നടക്കുമ്പോൾ ജെസ്സ് അൽപ നേരം കൂടി സ്കൂൾ കെട്ടിടത്തിലേക്ക് ഉറ്റുനോക്കികൊണ്ടിരുന്നു. എല്ലാവരും ഇറങ്ങി അല്പം കഴിഞ്ഞ് അവനും ഇറങ്ങി നടന്നു.

ക്ലാസുകൾ ആരംഭിച്ചു. ടീച്ചേർസ് മാറി മാറി വന്നു. സമയം വൈകുന്നേരമായി. മിസ്സ്‌. സ്റ്റെനയുടെ ക്ലാസ്സ്‌ ആയിരുന്നു. ക്ലാസ്സ്‌ നടക്കുന്നതിനിടെ സ്റ്റെന ജെസ്സിനെ ശ്രദ്ധിക്കുവനിടയായി. അവൻ നാടുവിലത്തെ നിരയിലുള്ള ബെഞ്ചിൽ ആണ് ഇരുന്നിരുന്നത്. ഡെസ്കിൽ തലവെച്ചു കിടന്ന് അവൻ ജനാലയിലൂടെ പുറത്തേക്ക് നോക്കുകയാണ്. അവൻ എന്താണ് നോക്കുന്നത് എന്നറിയാൻ സ്റ്റെനയും പുറത്തേക്ക് നോക്കി. എന്നാൽ അവൾക്ക് പ്രേത്യേകിച് ഒന്നും കാണുവാനായില്ല. ജെസ്സിന്റെ അശ്രദ്ധമായ ആ ഇരിപ്പ് അവൾക്ക് അത്ര സുഖിച്ചതും ഇല്ല.