👤മെർവിൻ 6👥 (ജെസ്സ് ) [VICKEY WICK] 161

“ടീ…..ൻ… ”

 

ഒരു വലിയ ട്രക്കിന്റെ ഹോൺ കേട്ടാണ് അബിയ ഉണർന്നത്. ഉച്ചക്ക് ഭക്ഷണം ഒക്കെ കഴിഞ്ഞുള്ള ഡ്രൈവിംഗിനിടയിൽ ഉറക്കം വന്നപ്പോൾ ചെറുതായി ഒന്ന് മയങ്ങിയതാണ്. നേരം ഒരുപാടായിരിക്കുന്നു. പിന്നെ സിറ്റിയോട് അടുക്കാറും ആയിരുന്നു. അബിയ കണ്ണുകൾ രണ്ടും തിരുമ്മി ഒരു വായ്‌ക്കോട്ടയിട്ട് മൂരി നിവർന്നിട്ട് കൈയിൽ കരുതിയിരുന്ന കുപ്പി വെള്ളവും എടുത്ത് പുറത്തേക്ക് ഇറങ്ങി. നല്ലപോലെ വെള്ളം ഒഴിച് കണ്ണ് കഴുകിയിട്ടു കാറിൽ തിരിച്ചു കയറി.

 

 

വലിയ തിരക്കില്ലാത്ത ആ വഴിയിൽ അബിയയുടെ കാർ ഹെഡ്ലൈറ്റിന്റെ വെളിച്ചത്തിൽ പാഞ്ഞുകൊണ്ടിരുന്നു. അത്യാവശ്യം നിലാവും ഉണ്ടായിരുന്നു. ആകാശത്ത് ചന്ദ്രന്റെ പകുതി ഉണ്ട്. കുറെ ദൂരം ചെന്നപ്പോൾ സിറ്റിയുടെ സാന്നിധ്യം അറിയിച്ചു കൊണ്ട് വലിയ ഫ്ലാറ്റുകൾ കണ്ടുതുടങ്ങി. പല വർണങ്ങളിലുള്ള ലൈറ്റ്കൾ നിറഞ്ഞ കടകളും കെട്ടിടങ്ങളും പകലിനെക്കാൾ സൗന്ദര്യം ആ രാത്രിക്ക് നൽകി.

 

 

ആ ടൗൺ പിന്നിട്ട് കഴിഞ്ഞപ്പോൾ വന്ന ചെറിയ മരങ്ങളും മറ്റുമുള്ള പുല്മെടുകൾ വഴി വണ്ടി പിന്നെയും നീങ്ങി. വീണ്ടും ചെല്ലുമ്പോൾ പൈൻ മരങ്ങൾ കണ്ടുതുടങ്ങി. ജെസ്സിന്റെയും മറ്റും വീടുകൾ ഇരിക്കുന്ന കോളനിക്കും സിറ്റിക്കും ഇടയിൽ ഉള്ള ഒരു പ്രദേശത്ത് ഉള്ള ഒരു ചെറിയ പൈൻ കാടായിരുന്നു അത്. ഇരുട്ടിൽ ആ പൈൻമരങ്ങൾ ഒക്കെയും നിഴലുകൾ മാത്രമാണെന്നേ തോന്നുമായിരുന്നുള്ളു.

 

 

🕸️🕸️🕸️🕸️

 

സ്റ്റെന സൂപ്പർമാർക്കറ്റിൽ പോയി തിരികെ വരുകയായിരുന്നു. ചെറിയ മഞ്ഞുകാരണം വന്ന ഈർപ്പം നീക്കാൻ വൈപ്പർ ഇട്ടിരുന്നു. അൽപ്പ ദൂരം കൂടി കഴിഞ്ഞാൽ പൈൻകാട് കഴിയും. ഡ്രൈവിംഗിനിടയിൽ എന്തൊക്കെയോ ചിന്തിച് ഒടുവിൽ അതും ജെസ്സിൽ എത്തി നിന്നു.

 

 

“ഞാൻ കണ്ടതൊക്കെ എന്റെ തോന്നലുകൾ ആയിരുന്നോ? ആത്മാവും പ്രേതവും ഒക്കെ ശരിക്കും ഉണ്ടോ? അതേ, അത് ഞാൻ ശരിക്കും കണ്ടത് തന്നെ. എന്നാലും ജെസ്സ്… ഹോ… അവന് മാത്രം എങ്ങനെ ഇതൊക്കെ കാണാനും അനുഭവിക്കാനും പറ്റുന്നു…? ”

 

 

ഇങ്ങനെ ഓരോന്ന് ചിന്തിച് ഡ്രൈവ് ചെയ്യുന്നതിനിടയിൽ പെട്ടെന്നാണ് അവൾ ശ്രദ്ധിച്ചത്. വലതു വശത്ത് കാട്ടിൽ ഒരു കുട്ടി വഴിയിലേക്ക് അഭിമുഖമായി നിൽക്കുന്നു. അവൻ തന്റെ കാറിനു നേരെയാണ് നോക്കുന്നത്. വേഗത്തിൽ ആയതിനാൽ പെട്ടെന്ന് ആരാണെന്നു മനസിലാക്കാൻ സ്റ്റെനക്ക് ആയില്ല. പാസ്സ് ചെയ്ത് കഴിഞ്ഞാണ് അവൾ ഒരു ഞെട്ടലോടെ അത് തിരിച്ചറിഞ്ഞത്.