മാന്ത്രികലോകം 14 [Cyril] 2103

“ഇപ്പോൾ നിനക്ക് എന്താണ് വേണ്ടത്…?” പല്ല് ഞെരിച്ചു കൊണ്ട് ഞാൻ ചോദിച്ചു.

അവ്യവസ്ഥ-ശക്തി എന്നെ കൂറ്പ്പിച്ച് നോക്കി.

“എന്നില്‍ നിന്റെ ആത്മാവിനെ നീ ബന്ധിച്ചത് കൊണ്ടും….. ഞാൻ നിന്റെ സ്രഷ്ടാവും പിതാവും എന്നു നി തിരിച്ചറിഞ്ഞ് അംഗീകരിക്കുകയും ചെയ്തത് കാരണവും, എന്റെ ശക്തിക്ക് പൂര്‍ണ സ്വാതന്ത്ര്യത്തോടെ നിന്നില്‍ പ്രവർത്തിച്ച് ആ അല്‍പ്പ ശക്തികള്‍ നിന്റെ ശക്തിയില്‍ ഏർപ്പെടുത്തയിരിക്കുന്ന എല്ലാ ശക്തി ബന്ധനങ്ങളെയും തകര്‍ക്കാന്‍ കഴിയേണ്ടത് ആയിരുന്നു, ഫ്രൻഷെർ. പക്ഷെ എനിക്ക് കഴിയില്ല എന്നതാണ് വാസ്തവം…”

അതുകേട്ട് ഞാൻ പരിഹസിച്ച് ചിരിച്ചു.

അവ്യവസ്ഥ ശക്തിക്ക് എന്നോടുള്ള കോപം വേഗത്തിൽ വര്‍ദ്ധിക്കുന്നത് ഞാൻ അറിഞ്ഞു.

അത് കാര്യമാക്കാതെ ഞാൻ ചോദിച്ചു —,

“അപ്പോ എന്നെ പൂര്‍ണമായി നിയന്ത്രിക്കാനും നിനക്ക് കഴിയുന്നില്ല…. എന്നിലുള്ള മറ്റ് ശക്തികളുടെ സ്വാധീനവും ബന്ധനവും തകര്‍ക്കാനും നിനക്ക് കഴിയുന്നില്ല. പക്ഷേ നിനക്ക് കഴിയാത്തതിന്‍റെ കാരണം എങ്കിലും നിനക്ക് അറിയാമെന്ന് ഞാൻ കരുതുന്നു. അതോ അതും നിനക്ക് അറിയില്ല എന്നു ഞാൻ കരുതിക്കോട്ടേ..?”

അത്രയും പറഞ്ഞിട്ട് ഞാൻ അതിന്റെ കത്തിയെരിയുന്ന കണ്ണില്‍ തന്നെ തറപ്പിച്ചു നോക്കി.

അവ്യവസ്ഥ-ശക്തിക്ക് എന്റെ ബന്ധനങ്ങളെ തകര്‍ക്കാന്‍ കഴിയാത്തതിന്‍റെ കാരണം ഞാൻ ചോദിച്ചെങ്കിലും, സത്യത്തിൽ അതിന്റെ കാരണം എന്താണെന്ന് എനിക്ക് നേരത്തെ അറിയാമായിരുന്നു. എന്റെ ഉപബോധ മനസില്‍ അതിന്റെ ഉത്തരം ഉണ്ട്.

അതുകൂടാതെ എന്റെ ഉപബോധ മനസ്സിൽ അവ്യവസ്ഥ-ശക്തിക്ക് പ്രവേശിക്കാനും വായിക്കാനും നിയന്ത്രിക്കാനും കഴിയില്ല എന്നതും എനിക്കറിയാം…. കാരണങ്ങള്‍ പലതാണ്.

എന്റെ ഉപബോധ മനസ്സിനെ നിയന്ത്രിക്കാൻ കഴിയാതെ അവ്യവസ്ഥ-ശക്തിക്ക് എന്നെ പൂര്‍ണമായി നിയന്ത്രിക്കാൻ കഴിയില്ല. പക്ഷേ അവ്യവസ്ഥ ശക്തിയിൽ ബന്ധനം സൃഷ്ടിച്ചിരുന്ന എന്റെ ആത്മാവിനെ നശിപ്പിക്കാന്‍ എന്നെ പൂര്‍ണമായി നിയന്ത്രിക്കേണ്ട ആവശ്യവുമില്ല എന്നും എനിക്കറിയാം.

എന്നെ കൊല്ലാനുള്ള ദേഷ്യം ഞാൻ അതിന്റെ കണ്ണുകളില്‍ കണ്ടു. പക്ഷേ പെട്ടന്ന് അത് മാറി. എന്നിട്ട് ഒരു നിമിഷം അവ്യവസ്ഥ-ശക്തി എന്നെ സംശയ ദൃഷ്ടിയോടെ നോക്കി. എന്റെ ബോധ മനസില്‍ നിന്നും എന്റെ ഉപബോധ മനസ്സിലേക്ക് പ്രവേശിക്കാന്‍ അത് ശ്രമിച്ചു കൊണ്ടിരുന്നു.. പക്ഷേ കഴിയാതെ പിന്മാറി.

എന്റെ ആശ്വാസം പുറത്ത്‌ പ്രകടിപ്പിക്കാതെ അവ്യവസ്ഥ-ശക്തിയുടെ ചെയ്തികളൊന്നും ഞാൻ അറിയാത്ത പോലെ ഞാൻ നിന്നു.

അവസാനം അവ്യവസ്ഥ-ശക്തി എന്നെ വെറുപ്പോടെ തുറിച്ച് നോക്കി.

“എന്നില്‍ നിന്റെ ആത്മാവിനെ നി ബന്ധിച്ചുവെങ്കിലും നിന്റെ ഉപബോധ മനസില്‍ എനിക്ക് പ്രവേശിക്കാന്‍ കഴിയുന്നില്ല. ശക്തമായ ഒരു തടസ്സത്തെ ആ നിഗൂഢ ശക്തികള്‍ക്ക് എങ്ങനെയോ സൃഷ്ടിക്കാനും നിന്റെ ജീവ ഊര്‍ജ്ജത്തിൽ പകർത്താനും കഴിഞ്ഞിരിക്കുന്നു എന്നാണ് എന്റെ സംശയം. അതുകൊണ്ട് നിന്റെ മനസില്‍ എനിക്ക് പ്രവേശിക്കാന്‍ കഴിയുന്നു വെങ്കിലും നിന്റെ ഉപബോധ മനസില്‍ പ്രവേശിക്കാന്‍ എനിക്കാവില്ല…”

“അതിൽ എനിക്കോരു നിരസവുമില്ല….” ഞാൻ സന്തോഷത്തോടെ പറഞ്ഞു.