ബെത്ലഹേമിലെ മഞ്ഞുകാലം ??? 2 (മനൂസ്) 2578

നമ്മുടെ മനസ്സിലെ കുഴപ്പങ്ങളൊക്കെ മാറ്റാൻ ഇതിലും വലിയ മരുന്നൊന്നും ഉടയ തമ്പുരാൻ കണ്ടു വച്ചിട്ടില്ലടാ ഉവ്വെ…”

അച്ഛൻ പറഞ്ഞു നിർത്തിയതും താൽപ്പര്യമില്ലാത്തത് എന്തോ കേട്ടെന്ന പോലെ ആൽവിൻ അലക്ഷ്യമായി എങ്ങോട്ടോ നോക്കി…

“എടാ മനുഷ്യന് ദൈവം തന്നിരിക്കുന്ന ഏറ്റവും വലിയ കഴിവ് എന്നതാണെന്നു അറിയാമോ.. അതേ മറക്കാനുള്ള കഴിവ്…”

അപ്പോഴേക്കും മീന ഉമ്മറത്തേക്ക് ചായയുമായി എത്തിയിരുന്നു…

ഫാദർ അവനരികിലേക്ക് ഇരുന്നിട്ട് ചായ കപ്പ് വാങ്ങി…

ആവി പറക്കുന്ന ചായ ഒരു കപ്പ് മുത്തി അയാൾ മീനയെ നോക്കി… പിന്നീട് ആൽവിനേയും…

എടാ ഈ വയസ്സാൻ കാലത്ത് നിന്റെ അപ്പനെ ഈ ഒട്ടമായ ഓട്ടമെല്ലാം ഓടാൻ വിടാതെ ആ ബിസിനെസ്സ് ഒക്കെ നിനക്ക് നോക്കി നടത്തിക്കൂടെ…

അല്ലെ അത് വേണ്ട.. ഇപ്പോ നിനക്ക് ആവശ്യം ഒരു മാറ്റമാണ്… ഇവിടെ നിന്നാ നീ നന്നാവില്ല…”

അച്ചൻ പറഞ്ഞു വരുന്നത് എന്തെന്ന് മനസ്സിലാകാതെ ആൽവിൻ അച്ചനെ നോക്കി…

“നമ്മുടെ ഇടവകയിലെ സ്റ്റീഫന് അങ്ങു വയനാട്ടിൽ ഒരു എസ്റ്റേറ്റ് ഉണ്ട്… അത്യാവശ്യം കൃഷികളും തേയിലയും അങ്ങനെ കുറച്ചു പരിപാടികൾ… അവനിപ്പോൾ മോന്റെ കൂടെ കുറച്ചു നാൾ ഒന്ന് വിദേശത്തേക്ക് പോകുവാ… അപ്പോൾ എന്നോട് പറഞ്ഞു പറ്റിയ പിള്ളേരെ കിട്ടിയാൽ കുറച്ചു മാസങ്ങൾ അവിടുത്തെ കാര്യങ്ങളൊക്കെ നോക്കി നടത്താൻ ഒരാളെ വേണമെന്ന്…

ഞാൻ ആലോചിച്ചപ്പോ പറ്റിയ പിള്ളേര് വേറെയുണ്ട് പക്ഷെ നിനക് അങ്ങനെയൊരു മാറ്റം ആവശ്യമാണെന്ന് തോന്നി..

വരുമാനം പ്രതീക്ഷിച്ചല്ല.. അതിപ്പോ തോട്ടുങ്കലെ മാത്യുവിന്റെ മോന് ഈ തൊഴില് കൊണ്ട് കഞ്ഞി കുടിക്കേണ്ട ആവശ്യമില്ലെന്ന് അറിയാല്ലോ..

സ്റ്റീഫനോട് പറഞ്ഞപ്പോൾ അവനും സമ്മതമാണ്… നീ ഒന്ന് പോയെച്ചു വാടാ…”

അച്ചൻ അവന്റെ മറുപടി അറിയാനായി കാത്തിരുന്നു…

ഒരു മാറ്റം അവനും ആഗ്രഹിക്കുന്നുണ്ട് പക്ഷെ മനസ്സിനെ എന്തോ ഇവിടെ തളച്ചിടുന്നത് പോലെ… അച്ചന് കൊടുക്കാൻ പെട്ടെന്നൊരു മറുപടി അവന്റെ പക്കൽ ഇല്ലായിരുന്നു…

“നീ നന്നായിട്ട് ആലോചിച്ചു പറഞ്ഞാ മതി…”

അവന്റെ മനസ്സ് മനസ്സിലാക്കിയിട്ടെന്നോണം ഫാദർ പറഞ്ഞു…