പിരിയില്ലൊരിക്കലും 1 [പ്രൊഫസർ ബ്രോ] 100

“താൻ വന്നേ , ഞാൻ കൊണ്ട് വിടാം ”

കുറച്ചു സമയമായിട്ടും ഞാൻ വഴി ആലോചിച്ചു നിൽക്കുന്നത് കണ്ടിട്ടാകാം പുള്ളി അങ്ങനെപറഞ്ഞുകൊണ്ട് എന്റെ മുന്നിൽ നടന്നു

അപ്പോഴാണ് ഞാൻ പുള്ളിയെ മൊത്തമായി ശ്രദ്ധിക്കുന്നത് , ബ്ലു കളർ ജീൻസും, പശമുക്കി വടി പോലെ ആക്കിയ വൈറ്റ് ഷർട്ടും , കൂടുതൽ വിശദീകരിക്കാൻ ഒന്നും അറിയില്ല എന്നാലും ആര് കണ്ടാലും ഒന്ന് നോക്കി പോകും അങ്ങനെ ഒരു ചേട്ടൻ

“ഡോ , ഇതാ തന്റെ ക്ലാസ്സ്‌ ”

“ഇതൊക്കെ എപ്പോ എത്തി ”

മനസ്സിൽ പറഞ്ഞതാണെങ്കിലും കുറച്ചു ശബ്ദം കൂടിപ്പോയെന്ന് പറഞ്ഞു കഴിഞ്ഞാണ് മനസ്സിലായത് ,  തല ഉയർത്തി പുള്ളിയെ നോക്കുമ്പോൾ പുള്ളി എന്നെ നോക്കി ചിരിച്ചുകൊണ്ട് നിൽക്കുന്നുണ്ട്

“അതെങ്ങനെയാ , മനസ്സ് വേറെ എങ്ങോ അല്ലെ , പിന്നെ എങ്ങനെയാ , അല്ല താൻ ഈ സ്റ്റെപ് കയറിയത് പോലും ഓർക്കുന്നില്ലേ ”

തിരിഞ്ഞു നോക്കിയപ്പോൾ ആണ് എനിക്കും ആ സംശയം തോന്നിയത് , എന്നാലും ഞാൻ അറിയാതെ ആ സ്റ്റെപ് ഒക്കെ  ഞാൻ എങ്ങനെ കേറി …

പുള്ളിക്ക് മറുപടിയായി ഒരു വളിഞ്ഞ ചിരി ചിരിക്കാൻ മാത്രമേ പറ്റിയുള്ളൂ .

“ശരി , എന്തായാലും താൻ ക്ലാസ്സിൽ കേറ് എനിക്ക് വേറെ പണിയുണ്ട്”

“ചേട്ടന്റെ പേരെന്താ”

പുള്ളി തിരിഞ്ഞു നടക്കുകയാണ് എന്ന് കണ്ടപ്പോൾ പെട്ടന്ന് ചോദിച്ചതാ ,പക്ഷെ ആ ചോദ്യത്തിനും കുറച്ചു ഒച്ച കൂടിപ്പോയി

“തന്റെ വായിൽ വല്ല ആംപ്ലിഫയറും ഉണ്ടോ , എന്താ ശബ്ദം ”

എന്തായാലും കോളേജിലെ തുടക്കം കൊള്ളാം ,

“എന്റെ പേര് , ദീപക് ”

“ഏതാ ബ്രാഞ്ച് ,..?”

“ആഹാ വന്നപ്പോൾ കരയാൻ നിന്ന ആളാ , ഇപ്പൊ ഫോമായല്ലോ”

നാണംകെടാൻ ബാക്കി ഒന്നും ഇല്ലാതിരുന്നത്കൊണ്ട് പുള്ളിയുടെ ആ ചോദ്യത്തിൽ ചളിപ്പൊന്നും തോന്നിയില്ല