പിരിയില്ലൊരിക്കലും 1 [പ്രൊഫസർ ബ്രോ] 97

” ആട്ടെ ആളുടെ പേരെന്താ ”

“ശരത്,വീട്ടിൽ ഉണ്ണി എന്ന് വിളിക്കും ”

” അപ്പോ ഉണ്ണിച്ചേട്ടനോട് വിളിക്കുമ്പോൾ ഞാൻ അന്വേഷിച്ചു എന്ന് പറഞ്ഞേക്ക്, എന്നിട്ട് ഇപ്പോഴെങ്ങാൻ പടം സംവിധാനം ചെയ്യുമോ ”

” ഒരു പടം ശരിയായിട്ടുണ്ട്  ഓഗസ്റ്റിൽ ഷൂട്ട്‌ തുടങ്ങും ”

“ആണോ എന്നാൽ വിളിക്കുമ്പോൾ എനിക്ക് ഒരു ചെറിയ വേഷം മേടിച്ചു തരണം, അത്രയ്ക്ക് വല്യ വേഷം ഒന്നും വേണ്ട ചെറുതായിട്ട് വല്ല ഹീറോ റോളും മതി ”

“നിനക്ക് ഞാൻ ഒരു പാറാവുകാരന്റെ റോൾ വാങ്ങിത്തരാം ”

അങ്ങനെ അടികൂടിയും സ്നേഹിച്ചും അന്നത്തെ ദിവസം സന്തോഷത്തോടെ തന്നെ അവസാനിച്ചു . അവൻ റൂമിൽ കിടന്നുറങ്ങുന്നതും കണ്ടാണ് ഞാൻ ഉറങ്ങാനായി പോന്നത് . ഞാൻ ചെല്ലുമ്പോൾ അമ്മയും ആ മുറിയുടെ വാതിൽക്കൽ തന്നെ ഉണ്ടായിരുന്നു . അവൻ വന്നതിൽ അമ്മ എത്ര സന്തോഷിക്കുന്നുണ്ട് എന്ന് ആ കണ്ണുകളിലെ നനവ് വിളിച്ചോതുന്നുണ്ടായിരുന്നു .

അമ്മക്കൊരു ഗുഡ് നയ്‌റ്റും പറഞ്ഞുകൊണ്ട് ഞാൻ തിരികെ പോന്നു .

ഞാൻ കട്ടിലിൽ വന്ന്‌ കിടന്നപ്പോഴും അവൻ പറഞ്ഞ കാര്യങ്ങൾ ഒക്കെ ഓർത്തെടുത്തു ചിരിക്കുകയായിരുന്നു .

വന്ന ഉടൻ സീനിയർന്റെ കയ്യിൽ നിന്നും തല്ല് വാങ്ങി ചെക്കൻ , അതും പോരാഞ്ഞിട്ട് സീനിയർ ആയ ഒരു കുട്ടിയെ ഇഷ്ടമാണ് പോലും .

ലക്ഷ്മിയെ എനിക്കറിയാം , പാവം കുട്ടിയാണ് . ഇവന് ചേരും , പിന്നെ പ്രായം ആണൊരു പ്രശ്നം ,.. ആ എന്തായാലും നോക്കാം സമയം ഉണ്ടല്ലോ …

ഉറങ്ങാനായി കണ്ണടക്കുമ്പോൾ ഒക്കെ അവന്റെ ഇന്നത്തെ സംസാരം ആണ് മനസ്സിൽ തെളിഞ്ഞു വരുന്നത് , എന്തായാലും ഇന്നത്തെ ഉറക്കം പോയി എന്ന് ഉറപ്പായി . സങ്കടം കൊണ്ട് ഒരുപാട് വട്ടം ഉറക്കം പോയിട്ടുണ്ട് എങ്കിലും സന്തോഷം കൊണ്ട് ഇതാദ്യമാ

അവൻ പറഞ്ഞത് പോലെ ഉണ്ണിയുടെ കാര്യം അമ്മയോട് പറഞ്ഞാലോ , അമ്മക്ക് എതിർപ്പൊന്നും ഉണ്ടാവില്ല എന്ന് ഉറപ്പാണ് . അമ്മക്ക് ഉണ്ണിയെ വല്യ കാര്യമാണ് , പക്ഷെ ഇപ്പൊ പറഞ്ഞാൽ അമ്മ കല്യാണത്തിന് നാള് നോക്കാൻ ഈ രാത്രി തന്നെ പോകും . എന്തായാലും അവനോട് ചോദിച്ചിട്ട് ഒരു തീരുമാനം എനുക്കാം