പന്ത്രണ്ടാം 👹 തീയാട്ട് [ Sajith ] 1414

“”ഞാൻ വരണോ അപ്പൂ..””,””അവടെ ഇന്ദിരാമ്മയുടെ കുടുംബക്കാരൊക്കെ ഇണ്ടാവില്ലേ..””,””ഞാരാണെന്ന് ചോദിച്ചാൽ…””,

കുഞ്ഞൂട്ടൻ സംസാരം ഒന്ന് നിർത്തി. അപ്പുവും കൂഞ്ഞൂട്ടനും മുഖാമുഖം നോക്കി. ഇവടെയുള്ളവരോട് കസിനെന്നൊക്കെ പറഞ്ഞ് ഒഴിവാക്കുന്ന പോലെ ആയിരിക്കില്ല അവിടെ.

“”അനിയനെന്ന് പറയാല്ലേ…””,

കുഞ്ഞൂട്ടൻ ഒരു ചിരിയോടെ അപ്പൂനോട് പറഞ്ഞു. അത് കേൾക്കെ അപ്പുവിൻ്റെ നടത്തം നിന്നു. അവൾ അവിടെ നിന്നു പോയി. കുഞ്ഞൂട്ടൻ പിന്നെയും എന്തൊക്കെയോ പറഞ്ഞ് മുന്നോട്ട് തന്നെ നടക്കുകയാണ്. അപ്പൂന് അവൻ്റെ തോളിലും കുറച്ച് ഉയര കൂടുതലുണ്ട്. പെട്ടന്ന് തൻ്റെ തോളോട് ചേർന്ന തോള് കണാതായി. കുഞ്ഞൂട്ടൻ തിരിഞ്ഞ് നോക്കി. ചുരിദാർ ഷാൾ വിരലിലിട്ട് ചുറ്റിയും വിടുവിച്ചും അപ്പു നിലത്ത് നോക്കി നിക്ക്ണു.

“”അപ്പൂ എന്തേ അവിടെ നിന്നെ..””,””ബാ ബസ് പോവുട്ടോ..””,

അവൻ്റെ വിളികേട്ട് അപ്പു അവനടുത്തേക്ക് നടന്നു. അവള് വരുന്ന കണ്ട് കുഞ്ഞൂട്ടൻ നടത്തം തുടർന്നു. അപ്പു കുഞ്ഞൂട്ടന് കുറച്ച് പുറകിലായാണ് നടന്നത്. കണ്ണെല്ലാം കലങ്ങിയിരുന്നു. പിന്നെ അവൾക്ക് തോന്നി കുഞ്ഞൂട്ടൻ താൻ പറയാതെ ഇനി അനിയനെന്ന ലേബൽ മാറ്റില്ല.

കുഞ്ഞൂട്ടനോട് എങ്ങനെ പറയുമെന്ന സംശയത്തിലാണ് അപ്പു. പെട്ടന്ന് ഒരു ദിവസം എനിക്ക് നിന്നെ അനിയനായി കാണാൻ കഴിയില്ലന്നൊക്കെ പറഞ്ഞാൽ കുഞ്ഞൂട്ടൻ എന്താ വിചാരിക്യ. മോശമായിട്ടൊന്നും വിചാരിക്കില്ല എന്നാലും. ഇങ്ങനെ പല ചോദ്യോത്തരങ്ങളും അപ്പുവിൻ്റെ മനസിലൂടെ കടന്ന് പോയി. നടത്തത്തിൻ്റെ വേഗതയും കുറഞ്ഞിരുന്നു.

“”അപ്പൂ….””,

വിളിച്ചപ്പോളാണ് അപ്പൂൻ്റെ തലയൊന്ന് പൊങ്ങിയത്. അത് വരെ തലയും കുനിച്ച് നടക്കായിരുന്നു. അപ്പുവിനെ കാത്ത് കുഞ്ഞൂട്ടൻ അതാ കുറച്ച് ദൂരെ നിൽക്കുന്നു. അവൾ വേഗം നടന്നു. കുഞ്ഞൂട്ടനെ മറികടന്ന് നടന്നു.

“”അപ്പൂ..””,””ഒന്ന് നിന്നേ…””,

അവള് നിന്നു തല തിരിച്ച് കുഞ്ഞൂട്ടനെ സംശയഭാവത്തിൽ നോക്കി. എന്താ എന്നായിരുന്നു പൊക്കിയ പിരികത്തിൻ്റെ അർത്ഥം

“”നിനക്ക് എന്നോട് എന്തേലും പറയാന്ണ്ടോ..? “”,

അപ്പൂൻ്റെ മുഖത്തേക്ക് നോക്കി കൊണ്ട് തന്നെ കുഞ്ഞൂട്ടൻ അത് ചോദിച്ചു. അവൾക്ക് പെട്ടന്ന് മനസിൽ പരിഭ്രമമായി. ഇഷ്ടം തുറന്ന് പറഞ്ഞാലോ.. ഇതതിന് പറ്റിയ സമയം ആയിരിക്കോ. പിന്നീടാവാമെന്ന് അപ്പു കരുതി.

“”എനിക്കോ..””,””ഒന്നുമില്ലല്ലോ കുഞ്ഞൂട്ടാ..””,

പറയുന്നതിനിടയ്ക്ക് അപ്പൂൻ്റെ കണ്ണിലെ ചെങ്കല്ലിൻ്റെ ഗോളങ്ങൾ കൃത്യമായി നില ഉറപ്പിക്കാതെ അങ്ങോട്ടും ഇങ്ങോട്ടും ഓടിക്കൊണ്ടിരുന്നു.

“”ഒറപ്പല്ലേ.. അപ്പൂ…””,

അതേയെന്ന് അപ്പു തലയാട്ടി. എന്നാൽ ആഹ് സംസാരത്തിലും വല്ല്യ കൃത്യതയൊന്നും ഉള്ളതായി തോന്നിയില്ല. അപ്പൂന് മനസിലുള്ളതെല്ലാം കുഞ്ഞൂട്ടനോട് പറയണം എന്നുണ്ട് പക്ഷെ എന്തോ അവളെ അതിൽ നിന്നും പിന്നോട്ട് വലിക്കുന്നു.