പന്ത്രണ്ടാം 👹 തീയാട്ട് [ Sajith ] 1414

“”ഇല്ലപ്പൂ…””,””കാലത്തെ പാപ്പിയാണ് ഇന്നെ വിളിച്ച് പറഞ്ഞെ…””, “”ബാരീനെ പോലീസ് വിട്ടൂന്നും രാത്രി ഏതോ ഗ്യാങ്ങ് വന്ന് അവനേം ഫ്രണ്ട്സിനേം തല്ലിയ കാര്യൊക്കെ പാപ്പിയാ പറഞ്ഞെ..””,””എവിട്ന്നാന്നൊന്നും പറഞ്ഞില്ല..””,

കുഞ്ഞൂട്ടൻ സംസാരിക്കുമ്പോൾ അവൻ്റെ മുഖത്ത് വല്ല്യ ഭാവ വ്യത്യാസങ്ങളൊന്നും തന്നെ ഇല്ല. സാധാരണ ഒരു സംഭവം പറയുന്ന പോലെയാണ് അവൻ ഇതും പറഞ്ഞത്. മുഖത്ത് സ്ഥിരമായി ഉണ്ടാവാറുള്ള ചിരി മാത്രമുണ്ട്. ചിരിക്ക് പിന്നിൽ ഇവൻ എന്തങ്കിലും ഒളിപ്പിക്കുന്നുണ്ടോ എന്ന് സംശയമില്ലാതില്ല. ഞാൻ കാണാത്ത എനിക്കറിയാത്ത ഒരു സ്വഭാവം കൂടി കുഞ്ഞൂട്ടനുണ്ടെന്ന് തോന്ന്ണു. വല്ല അന്യനോ മറ്റോ ആണോ ദൈവമേ. കുറച്ച് കാലം മുന്നെ വരെ എൻ്റെ പൊറകെ ഇഷ്ടാന്നും പറഞ്ഞ് നടന്നവനാ. അന്നത്തെ സംസാരത്തിന് ശേഷം ആഹ് കുഞ്ഞൂട്ടനെ പിന്നെ കണ്ടിട്ടില്ല. ഇപ്പൊ ഒരു സഹോദരനേ പോലെയോ സ്റ്റുഡൻ്റിനേ പോലെയോ ഒക്കെയാണ് അവൻ്റെ ബിഹേവിയർ. വളരേ ഭയ ഭക്തി ബഹുമാനത്തോടെ. ഇത് രണ്ടും അല്ലാത്ത ഒരു കുഞ്ഞൂട്ടനൂടെ ഉണ്ടായിരിക്കണം.. ഇവനല്ലാതെ എന്നെ രക്ഷിക്കാനാരാ വരാ അപ്പു കൂഞ്ഞൂട്ടൻ്റെ പൊടിമിശയിലേക്ക് നോക്കി ഒന്ന് ചിരിച്ചു.

കുഞ്ഞൂട്ടൻ പറഞ്ഞു കഴിഞ്ഞതും ഇന്നലെ നടന്നതിനേ കുറിച്ച് അപ്പു കുഞ്ഞൂട്ടന് വിവരിച്ച് കൊടുത്തു.

“”എടാ…””,””നീയാരോടും പറയരുത്””,

“”എന്താപ്പൂ…””,

“”ബാരിയില്ലെ അവനെ തല്ലിയത് ഇൻ്റെ മുന്നിലിട്ടാ…””,

“”ഏഹ്….””,””ആര്..””,

“”അതറിയില്ല മുഖം ഒക്കെ മറച്ച ഒരാളാണ്…””,

“”മ്മം…””,””ആളെ അറിയില്ലാന്ന് തന്നെയാണ് അടികൊണ്ടവരും പറയ്ണെ…””,

“”മുറ്റത്തിട്ടാണ് അവനെ അടിച്ചത്…””,””ഞാനപ്പഴേക്കും ഓടി മുറിയിൽ കയറി…””,

“”ആണോ..””,””നിനക്കെന്തേലും പറ്റിയാര്ന്നോ…””,

“”ഇല്ലെടാ അവര് അകത്ത് കയറിയില്ല..””,””അതിൻ്റെ മുമ്പേ അടിച്ച് പരത്തിക്കളഞ്ഞു…””,

“”ഏഹ്… പാപ്പി പറ..””,

പാപ്പി അന്ന് ശ്രദ്ധിക്കണം എന്ന് താക്കീത് തന്നത് പറയാൻ വരായിരുന്നു പിന്നെ വേണ്ടാന്ന് വെച്ചു.

“”എന്താ…? “”,

“”ഏയ് ഒന്നുല്ല…””,

“”മ്മം…””,

ഒന്നൊന്നര മണിക്കൂറിൽ ബസ് കവലയിലെത്തി. അപ്പുവും കൂടെ കുഞ്ഞൂട്ടനും ബസിൽ നിന്ന് ഇറങ്ങി നേരെ ചെമ്പ്രയിലേക്ക് നടന്നു.

വേണിയുടെ ക്ഷേത്രത്തിന് മുൻപിലെത്തിയപ്പോൾ കുഞ്ഞൂട്ടൻ്റെ ശ്രദ്ധ അവനറിയാണ്ട് തന്നെ അവിടേക്ക് പാളി പോയി. എന്താണെന്നറിയില്ല ഈ കോവിലിന് മുന്നിലെത്തുമ്പോൾ എപ്പഴും ഇങ്ങനെയാണ്.

പടിപ്പുരയ്ക്ക് മുന്നിൽ കിടക്കുന്ന വില കൂടിയ ഒരു ലക്സസ് കാറിൽ ചാരിനിന്ന് ഒരു മധ്യവയസ്കൻ ബീഡി വലിക്കുന്നു. കുഞ്ഞുട്ടനും അപ്പുവും അയാളെയും കാറിനേയും മറികടന്ന് പടിപ്പുരയുടെ വാതിൽ തുറന്ന് അകത്ത് കയറി.