പന്ത്രണ്ടാം 👹 തീയാട്ട് [ Sajith ] 1414

അപ്പൂനൊന്നും പറയാനില്ലെന്ന് പറഞ്ഞതും കുഞ്ഞൂട്ടൻ മുൻപിൽ നടന്നു യാന്ത്രികമായി പിന്നാലെ അപ്പുവും.

കുഞ്ഞൂട്ടന് അവസാനമായി ഒരു പ്രതീക്ഷയുണ്ടായിരുന്നു. ചില നേരത്തെ അപ്പുവിൻ്റെ പെരുമാറ്റമെല്ലാം കാണുമ്പോൾ അവൾക്ക് കുഞ്ഞൂട്ടനെയും ഇഷ്ടമാണോ എന്നുള്ള ഒരു സംശയം വരാതിരിക്കാറില്ല. തൻ്റെ ഉള്ളിൽ കുഴിച്ചു മൂടിയ അവളൊടുള്ള ഇഷ്ട്ടം പിന്നെയും മുളക്കുന്നത് പോലെ അവന് തോന്നി.

അപ്പുവിന് പറ്റിയ ഒരാളല്ല അവനെന്ന് കുഞ്ഞൂട്ടൻ പിന്നെയും പിന്നെയും അവനെ തന്നെ പറഞ്ഞ് വിശ്വസിപ്പിച്ചു കൊണ്ടിരുന്നു. ഇന്ന് ഇപ്പൊ തൊട്ട് അപ്പൂനെ കാത്ത് ഒരു വലിയ കുടുംബം ഉണ്ട്. കുഞ്ഞൂട്ടനോ..? കൂട്ടത്തിൽ കൂട്ടാത്ത കുറച്ച് ബന്ധുക്കളും അപശകുനമായി കാണുന്ന കുടുംബവും. പ്രായം വച്ച് നോക്കാണേലും ശരിയാവില്ലല്ലോ. കണ്ടാ അപ്പൂനെ കുഞ്ഞൂട്ടൻ്റെ അത്ര പ്രായമൊന്നും തോന്നിക്കില്ല എന്നാലും.

മടക്കയാത്രയിൽ ബസിലിരിക്കുമ്പഴും രണ്ട് പേരും പരസ്പരം സംസാരിച്ചില്ല. അപ്പൂനെ പാലക്കേത്തറ ഇറക്കി വിട്ട് കുഞ്ഞൂട്ടൻ തിരികെ വീട്ടിലേക്ക് മടങ്ങി.

★★★

ക്ലാസ് കഴിയാൻ ഇനി ഒന്നൊന്നര മാസം കൂടിയെ ഉള്ളു. യൂണിവേഴ്സിറ്റി ആദ്യ സമ്മിൻ്റെ പരീക്ഷകളുടെ വിജ്ഞാപനം ഒന്നും തന്നെ നടത്തിയിട്ടില്ല. മിക്കവാറും മാർച്ചിലേ കാണാൻ സാധ്യതയുള്ളു. ഏപ്രിലിൽ വൈജയന്തീപുരത്തേക്ക് പോവാൻ ഉള്ള തയ്യാറെടുപ്പിലാണ് ഇന്ദിരാമ്മ. അപ്പു കുഞ്ഞൂട്ടനോട് സംസാരമെല്ലാമുണ്ടെങ്കിലും ഉള്ളിലെ ഇഷ്ടം തുറന്ന് പറയാൻ മടികാട്ടി.

കുറച്ച് കാലമായി സ്നേഹക്ക് വല്ല്യ മിണ്ടാട്ടമൊന്നുമില്ല. അവൾക്ക് എന്തു പറ്റിയെന്ന ചോദ്യമുണ്ടെങ്കിലും കുഞ്ഞൂട്ടൻ അത് നേരിട്ട് ചോദിക്കാൻ പോയില്ല.

അനി എച്ച് ഐ ഡിപ്പാർട്ട്മെൻ്റിലെ ഒരു കുട്ടിയെ സെറ്റാക്കി. സേതുലക്ഷ്മി അതാ അവൾടെ പേര്. ഇപ്പൊ രണ്ട് പേരും നല്ല ചാറ്റിങ്ങാ…., ചീറ്റിംങ് ആവാണ്ടിരുന്നാ മതിയായിരുന്നു. അനി ഒരു ലോലഹൃദയനാ. വല്ലതും സംഭവിച്ചാലോ എന്ന്പേടി ഇണ്ട്. പെണ്ണിനെ കാണാനൊക്കെ നല്ല ചന്ദമുണ്ട്. എടക്കരയുള്ള കോളേജിൻ്റെ തന്നെ മറ്റൊരു ലേഡീസ് ഹോസ്റ്റലിലാണ് താമസം. അന്ന് മതിലെടുത്ത് ചാടാൻ നോക്കിയത് ഇതേ ഹോസ്റ്റലിൻ്റെയാണ്. യൂണിയൻ ഇലക്ഷൻ്റെ അന്ന് കണ്ടെതാണെത്രെ. ഫെസ്റ്റിവലിൻ്റെ അന്ന് അനി പിന്നാലെ നടന്ന് വളച്ചെട്ത്തു.

ഇടക്ക് ശ്വേതയുടെയും രതീഷിൻ്റെയും നിശ്ചയം കഴിഞ്ഞു. അപ്പൂവും കുഞ്ഞൂട്ടനും അവിടെ വരെ ഒന്ന് പോയി പോന്നു. ഒരു ശനിയാഴ്ചയായിരുന്നു പരിപാടി രണ്ട് ദിവസത്തെ ലീവ് ഗ്യാപ്പ് കിട്ടി.

അന്ന് ഞായറാഴ്ച അപ്പു കുഞ്ഞൂട്ടനെ ക്ഷേത്രത്തിൽ കൊണ്ട് പോവാനൊരു ശ്രമം നടത്തി. അന്ന് ബാരിയെ തല്ലിയ ആള് കുഞ്ഞൂട്ടനായിരിക്കില്ലെന്ന് ഒരു അറുപത് ശതമാനം അപ്പൂന് ഉറപ്പുണ്ടായിരുന്നു. ബാക്കി നാൽപത് ശതമാനം ആയികൂടാ എന്നില്ലല്ലോ. ഒന്നാമതെ സംഭവം നടന്നത് രാത്രിയായിരുന്നു. വ്യക്തമായി ഒന്നും കാണാൻ കഴിയില്ല. അപ്പോഴത്തെ അപ്പൂൻ്റെ മാനസികാവസ്ഥ വച്ച് തല്ലുന്നവൻ്റെയും തല്ല് കൊള്ളുന്നവരുടെയും ബോഡി മെഷർമെൻ്റ് എടുക്കാന്ന് പറയുന്നത് നടക്കുന്ന കാര്യല്ല. കൊല്ലാൻ വരുമ്പൊ എവടേലും പോയി ഒളിക്കാന്നല്ലാതെ.