നിഴലായ് അരികെ 9

Author : ചെമ്പരത്തി

[ Previous Part ]

 

 

അവൾ വേഗം മുഖം തിരിച്ചു നന്ദനറിയാതെ കണ്ണുകൾ തുടച്ചെങ്കിലും നന്ദൻ അത് കണ്ടിരുന്നു…

“അമ്മൂ…… നീയെന്തിനാ കരഞ്ഞത്?? “

“ഞാൻ കരഞ്ഞില്ലല്ലോ നന്ദാ…. നിനക്ക് തോന്നിയതാ…. “

“കളിക്കല്ലേ അമ്മൂ….. നിന്നെ ഞാൻ ഇന്ന് ആദ്യമായല്ലല്ലോ കാണുന്നത് ……നിന്റെ കണ്ണ് നിറഞ്ഞതു ഞാൻ കണ്ടിരുന്നു… ഇനി പറയൂ എന്താ കാര്യം??? “

“അത് കാറ്റടിച്ചിട്ടാണ്…… പിന്നെ നിന്നോട് ഞാൻ പറഞ്ഞതല്ലേ നന്ദാ…. എനിക്ക് ഇപ്പൊ കല്യാണം വേണ്ട എന്ന്….. പ്രത്യേകിച്ച്  ആ ബോബിയുടെ ആലോചന…….”

‘ഓ… അപ്പോൾ അതാണ് കാര്യം…. കല്യാണം ആലോചിച്ചത് പിടിച്ചിട്ടില്ല……’നന്ദൻ മനസ്സിൽ ഓർത്തു.

“എന്റെ അമ്മൂസേ…….. അതായിരുന്നോ നിന്റെ പ്രശ്നം……??    ഹോ…. ഞാൻ വെറുതെ ടെൻഷൻ അടിച്ചു….എടീ പോത്തേ…ഞാൻ പറഞ്ഞില്ലേ എന്റെ അഭിപ്രായത്തിൽ അതൊരു നല്ല ആലോചന ആണ്…. നല്ല ചുറ്റുപാടും ഉണ്ട്, കാണാനും നല്ലതാണ്…. അത് കൊണ്ടല്ലേ ഞാൻ……………… “

“നന്ദാ…..ഇനി അയാളെക്കുറിച്ചു നീ പറയണ്ട……… അയാൾ ശരിയല്ല  എന്നെനിക്ക് അറിയാം….. “

നന്ദന്റെ മുഖം ചുവന്നു…..

“അമ്മൂ….. നിനക്കിഷ്ടമില്ലെങ്കിൽ ഓക്കേ ഞാൻ നിർബന്ധിക്കുന്നില്ല….. പക്ഷെ ഒരാളെക്കുറിച്ചു അനാവശ്യം പറയരുത്…. “

ആര്യ വേദനയോടെ ഒന്ന് ചിരിച്ചു…..

“നന്ദാ……. നിനക്ക് എന്നെയാണോ വിശ്വാസം അതോ ഇന്നലെ കാണാൻ തുടങ്ങിയ അയാളെയാണോ…?? “

“അമ്മൂ… നീ എഴുതാപ്പുറം വായിക്കേണ്ട….. എനിക്ക് വിശ്വാസം നിന്നെ തന്നെ ആണ്….. പക്ഷെ കല്യാണം മുടക്കാൻ വേണ്ടി നീ എന്തിനാ ആവശ്യം ഇല്ലാത്തതൊക്കെ പറയുന്നേ…..?? “

അവൾ ഒന്ന് നെടുവീർപ്പിട്ടു….