നിഴലായ് അരികെ – 18 | Nizhalay Arike – 18 | Author : ചെമ്പരത്തി

[ Previous Part ]

ഫോണിന്റെ ഡിസ്പ്ലേയിൽ മിന്നി മറയുന്ന ‘ammu ‘ എന്ന പേര് കണ്ടതും അത്രയും ദിവസം മനസ്സിലെ മണ്ണിനെ കുത്തിയൊലിപ്പിച്ചു കൊണ്ട് പെയ്തു വന്നിരുന്ന മഴക്കൊരു ശമനം ഉണ്ടായത് അവനറിഞ്ഞു….

കൈ നീട്ടി വലിച്ചെടുത്ത ഫോൺ, തിടുക്കം കൂടിയതിനാലോ കൈ വിറച്ചതിനാലോ ആകണം
പിടുത്തം മുറുക്കാതിരുന്ന വിരലുകളുടെ തടവറ ഭേദിച്ചു താഴേക്കു വീണു….   തിടുക്കത്തിൽ ചാടിപിടിച്ചു എടുത്തപ്പോഴേക്കും ആ കാൾ കട്ട് ആയിരുന്നു…. ഒരു നിമിഷം തിരിച്ചു വിളിക്കണോ വേണ്ടായോ എന്ന സന്ദേഹത്തിൽ അവൻ ഫോൺ തന്റെ കൈവെള്ളയിൽ പതിയെ തട്ടിക്കൊണ്ടിരുന്നു….

തിരിച്ചു വിളിക്കണം എന്നുറപ്പിച്ചു, ലോക്ക് തുറന്നതും വീണ്ടും ആര്യയുടെ കാൾ നന്ദനെ തേടിയെത്തി….
ആദ്യമൊന്നു മുരണ്ട് റിങ്ടോൺ വരുന്നതിനു മുന്നേ അവന്റെ  വിരൽ ആൻസർ ബട്ടനിൽ അമർന്നു…

വാക്കുകൾ കൈമോശം വന്നിട്ടാകണം, ഇരുവശത്തു നിന്നും ഉള്ള ചുടുനിശ്വാസങ്ങൾ മാത്രം ഇരുവരുടെയും കാതുകളെ പൊള്ളിച്ചു കൊണ്ടിരുന്നു….
ഒടുവിലാ നിശബ്ദതയെ ഭേദിച്ചു ആര്യയുടെ പതിഞ്ഞ മൃദു സ്വരം നന്ദന്റെ കാതുകളെ തലോടി…
“നന്ദേട്ടാ…….”

അങ്ങനെ അല്ലല്ലോ അമ്മൂ നീ വിളിക്കേണ്ടത് എന്ന് ചോദിക്കാൻ അവന്റെ മനസ്സ് വെമ്പിയെങ്കിലും,
“മ്മ്മ്..??”
എന്നൊരു ചോദ്യം മാത്രമേ പുറത്തു ചാടിയുള്ളൂ….