നിഴലായ് അരികെ – 18 [ചെമ്പരത്തി] 778

“നിന്നെ ഞാൻ ഇന്ന് കൊല്ലുമെടീ…… പട്ടിക്കുട്ടീ……”
പറഞ്ഞു കൊണ്ടവളുടെ പുറകെ പാഞ്ഞ അവൻ വാതിൽ കടന്ന് താഴേക്കു നോക്കിയപ്പോഴേ പിടിച്ചു കെട്ടിയ പോലെ നിന്നു….. ഓടിപ്പോയ ആര്യ സ്റ്റൈയറിന്റെ മധ്യത്തിൽ എങ്ങോട്ട് പോകണം എന്നറിയാതെ ആകെ വിളറി നിൽക്കുന്നുണ്ടായിരുന്നു…..

താഴെ, ഹാളിൽ അവരെ തന്നെ നോക്കിക്കൊണ്ട് റോബിനടക്കം ഇരു വീട്ടുകാരും ഉണ്ടായിരുന്നു…..
ചുണ്ടിലെ മുറിവ് ആരും കാണാതെ ഇരിക്കാൻ ചുണ്ടുകൾ കൂട്ടിക്കടിച്ചു കൂട്ടിക്കടിച്ചു നന്ദൻ വേഗം പിന്നോട്ട് വലിഞ്ഞു…..
എങ്ങോട്ട് പോകണം എന്നറിയാതെ വട്ടം ചുറ്റി നിന്ന ആര്യ, താഴെ എല്ലാവരുടെയും കൂട്ടച്ചിരി കേട്ടതോടെ തിരിഞ്ഞു സ്റ്റെയർ കയറി മുകളിലേക്കോടി….
ഓടി റൂമിൽ കയറി വാതിൽ ലോക്ക് ചെയ്തപ്പോഴേക്കും അവൾ കിതക്കുന്നുണ്ടായിരുന്നു……
എന്നാൽ റൂമിലേക്ക്‌ ഓടി കയറേണ്ടായിരുന്നു എന്ന് നന്ദന്റെ മുഖം കണ്ടപ്പോൾ അവൾക്കു തോന്നി……

ചുണ്ട് മുറിഞ്ഞു ചോര എടുക്കുന്നത് നിൽക്കാത്തത്തിനാൽ ഇടക്കിടക്കവൻ തന്റെ ടവൽ കൊണ്ട് ചോര ഒപ്പുന്നുണ്ടായിരുന്നു…….
വെളുത്ത ടവൽ ചിതറിവീണ ചോരപ്പൂക്കളെ കൊണ്ട് ചുവന്നു….

“ദേവേട്ടാ പ്ലീസ്…..ന്നെ ഒന്നും ചെയ്യരുത്…. ദേവേട്ടന്റെ അമ്മു അല്ലെ…… ഒരബദ്ധം പറ്റിയതാ…… മുറിയും എന്നുദ്ദേശിച്ചല്ല ഞാൻ കടിച്ചത്…… എന്നെ തല്ലിയതിന് പകരായിട്ട് ചെയ്തതാ…….പക്ഷെ…. ഇങ്ങനെ പറ്റൂന്ന്…………”