നിഴലായ് അരികെ -10 [ചെമ്പരത്തി] 360

പ്രിയ ആകെ തകർന്നതുപോലെ, കരഞ്ഞുകൊണ്ട്  തന്റെ  തോളിലേക്ക് ചാഞ്ഞത് കണ്ട അവളുടെ അച്ഛന്റെ മുഖത്തേക്ക് തന്നെ  ഭസ്മീകരിക്കാൻ ഉള്ള കോപം ഇരച്ചു കയറുന്നത്  നന്ദൻ കണ്ടു… ഒന്നു പതറിയ അവൻ വേഗം, തല കുനിച്ചു കരഞ്ഞു കൊണ്ട് നിന്ന ആര്യയെ വിട്ട് പ്രിയക്കരികിലേക്കു ചെന്നു……

“പ്രിയാ……ഞാൻ പറയുന്നത് ഒന്നു കേൾക്കു…..”

കരഞ്ഞുകൊണ്ട്  നിന്ന പ്രിയ പെട്ടന്ന് നന്ദനോട്  പൊട്ടിത്തെറിച്ചു….

” എനിക്കൊന്നും കേൾക്കണ്ട…… ഇത്രയും നാൾ  ഞാനും വിചാരിച്ചതു നിങ്ങൾ തമ്മിൽ ഫ്രണ്ട്ഷിപ് മാത്രമേ ഉള്ളൂ എന്നാണ്….എന്നാൽ ഇന്ന് മനസിലായി ഫ്രണ്ട്ഷിപ് എന്നത് നിങ്ങൾക്ക് മറ്റുള്ളവരുടെ കണ്ണിൽ പൊടിയിടാൻ ഉള്ള ഒരു മറ മാത്രമായിരുന്നു എന്ന്….. രണ്ടുപേരും കൂടി നാടകം കളിച്ചു എല്ലാവരെയും പറ്റിക്കുക ആയിരുന്നില്ലേ ഇത്രയും നാളും……?????  ”

“പ്രിയ സൂക്ഷിച്ചു സംസാരിക്കണം…… അനാവശ്യം പറയരുത്…. ”

നന്ദൻ ദേഷ്യത്തിൽ അവൾക്കു നേരെ കൈ ചൂണ്ടി… ”

“അപ്പോൾ നിങ്ങൾക്ക് എന്ത് വേണമെങ്കിലും കാണിക്കാം അല്ലെ……..ഞങ്ങൾ ഇപ്പോൾ വന്നത് കൊണ്ട് ഇത് ഇവിടെ വച്ചു നിന്നു ആരുമില്ലാത്തപ്പോൾ എന്തൊക്കെ……….. ”

പ്രിയ പറഞ്ഞു പൂർത്തിയാക്കുന്നതിനു മുൻപേ, പടക്കം പൊട്ടുന്ന ഒച്ചയിൽ,  നന്ദന്റെ കൈത്തലം പ്രിയയുടെ ഇടതു കാരണം പുകച്ചിരുന്നു…..

“ടാ…… നീ എന്റെ മോളെ തല്ലുന്നോ……. ”

പ്രിയയുടെ അച്ഛൻ ചാടി നന്ദന്റെ കഴുത്തിൽ കുത്തിപ്പിടിച്ചു….

” അവൾ പറഞ്ഞതിന്റെ മറുപടി ആണ് അവൾക്കു കിട്ടിയത്……അതിനു എന്റെ മെക്കിട്ട് കേറാൻ നിൽക്കണ്ട….. ”

നന്ദൻ അയാളുടെ കൈ തട്ടിമാറ്റിക്കൊണ്ട് പറഞ്ഞു.

“അപ്പോൾ….. ഞങ്ങൾ കണ്ടതൊക്കെ മായ ആയിരിക്കും അല്ലെ നന്ദൻ…..??”

കൂട്ടത്തിൽ നിന്നവരാരോ വിളിച്ചു ചോദിച്ചു….