നിഴലായ് അരികെ -10 [ചെമ്പരത്തി] 360

പുറകിലെത്തിയ നന്ദൻ, മങ്ങിയ വെളിച്ചത്തിൽ ഒരാൾ എഴുന്നേറ്റു ഓടുന്നത് കണ്ട് പുറകേയോടി… അയാൾ ഓട്ടത്തിനിടയിൽ മൊബൈലിലെ ടോർച് ഓണക്കാൻ ശ്രമിക്കുന്നുണ്ടായിരുന്നു….

 

ഓടി ഒപ്പം എത്തിയ നന്ദൻ അയാളുടെ പിന് കഴുത്തിൽ ആഞ്ഞടിച്ചു…. നില തെറ്റിയ അയാൾ മുഖമടിച്ചു നിലത്തേക്ക് വീണു… അയാളുടെ കയ്യിൽ നിന്നും തെറിച്ചു വീണ ഫോൺ അവൻ ചാടിയെടുത്തു പാന്റിന്റെ കീശയിൽ താഴ്ത്തി…..

 

എഴുന്നേറ്റ അയാളുടെ മുഖം തൂവാല കൊണ്ട് മറച്ചിരുന്നത് മങ്ങിയ വെളിച്ചത്തിൽ നന്ദൻ കണ്ടു….

“നന്ദാ…. ”

കരഞ്ഞു കൊണ്ടുള്ള ആര്യയുടെ വിളി കേട്ട നന്ദൻ ഒരു നിമിഷം തിരിഞ്ഞു നോക്കി.

എതിരാളിക്ക് ആ ഒരു നിമിഷം ധാരാളം ആയിരുന്നു…. നന്ദനെ തള്ളിയിട്ടു അയാൾ ഇരുട്ടിലേക്ക് ഓടി മറഞ്ഞു…..

 

നന്ദൻ വേഗം ആര്യയുടെ അടുത്തേക്ക് ഓടിയെത്തി……

“നന്ദാ…ആരോ ന്റെ ഫോട്ടോ……..”

ബാക്കി പറയാൻ കഴിയാതെ അവൾ നിന്നുകരഞ്ഞു കൊണ്ട് അവൾ നന്ദനെ ചുറ്റിപ്പിടിച്ചു ….

അവളുടെ ശരീരത്തിന്റെ വിറയലും , ചുറ്റിപ്പിടിച്ചിരിക്കുന്ന കൈകളുടെ മുറുക്കവും അറിഞ്ഞ നന്ദന് അവളുടെ പേടിയുടെ ആഴം മനസ്സിലായിരുന്നു…

 

“ഒന്നൂല്ല അമ്മൂ….. അവന്റെ ഫോൺ എന്റെ കയ്യിൽ കിട്ടിയിട്ടുണ്ട്…..നീ പേടിക്കേണ്ടട്ടോ…”

 

അവൻ പതിയെ അവളുടെ തലയിൽ തലോടി….

 

പെട്ടന്ന് ഒരു ക്യാമറ ഫ്ലാഷ് മിന്നിമറഞ്ഞതു കണ്ട ഇരുവരും ഞെട്ടിത്തിരിഞ്ഞു……..

 

ഞെട്ടിത്തിരിഞ്ഞ ഇരുവരും, അങ്ങോട്ട് എത്തുന്നവരെ കണ്ടു അകന്നുമാറി.

 

“അപ്പോൾ   ഇതാണ് നിങ്ങളുടെ   ഫ്രണ്ട്ഷിപ് അല്ലെ…?? രാത്രി, ആരും ഇല്ലാത്തിടത്തു വന്നിട്ട് കെട്ടിപ്പുണർന്നു നിൽക്കുന്നതിനെയും ചിലപ്പോൾ ‘ഫ്രണ്ട്ഷിപ് ‘ എന്ന്  നിർവചിക്കേണ്ടി വരും അല്ലെ നന്ദൻ ………. സാറേ….???

 

ചോദിച്ചുകൊണ്ട് മുന്നോട്ട്‌ വന്ന ബോബിയുടെ  ചുണ്ടിൽ വിരിഞ്ഞ പുശ്ചച്ചിരിയും, കഴുത്തിൽ തൂക്കിയ ക്യാമറയും കണ്ട നന്ദന്റെ മനസ്സിൽ  മിന്നൽ പോലൊന്ന് കടന്നുപോയി….