നിഴലായ് അരികെ 10

Author : ചെമ്പരത്തി

[ Previous Part ]

 

 

ആര്യയെയും കുട്ടികളെയും ബസ് കയറ്റി വിട്ടിട്ട് തിരിച്ചു പോയ നന്ദന്റെ മനസ്സ് ആകെ കലുഷിതം ആയിരുന്നു….

 

അവസാന നിമിഷം വരെ പോകുന്നില്ല എന്നു പറഞ്ഞിരുന്ന ബോബിയുടെ  മനംമാറ്റം നന്ദനെ ഒട്ടൊന്നുമല്ല കുഴപ്പിച്ചത്…

 

അതേപോലെ തന്നെ, പ്രിയ അല്ല കത്തുകൾ എഴുതിയത് എന്നറിഞ്ഞപ്പോൾ മുതൽ ആര്യയുടെ മുന്നിൽ നിസ്സാരവൽക്കരിച്ചു നിന്നെങ്കിലും നന്ദന്റെ മനസ്സിൽ ഒരു പുനർ ചിന്ത  നടന്നു കൊണ്ടിരുന്നു….എങ്കിലും തന്റെ  എടുത്തുചാട്ടം തന്നെ ആണ് ഇത് ഇത്രവരെ കൊണ്ടെത്തിച്ചത് എന്ന്  അവനറിയാമായിരുന്നു.

 

പ്രിയ അല്ലെങ്കിൽ മറ്റാര് എന്ന സന്ദേഹം, ആർത്തലക്കുന്ന സമുദ്രം പോലെ നന്ദന്റെ ഉള്ളിൽ ഇരമ്പിക്കൊണ്ടിരുന്നുവെങ്കിലും മറ്റൊന്നും ചെയ്യാൻ കഴിയാതെ,നിസ്സഹായനായി കല്ല്യാണത്തിനു വേണ്ടിയുള്ള ഒരുക്കങ്ങൾക്ക് തുടക്കം കുറിച്ചു….

 

യാത്രയിൽ എല്ലാം പ്രിയ കാൾ വഴിയും മെസ്സേജ് വഴിയും നന്ദനുമായി സംസാരിക്കുന്നുണ്ടായിരുന്നു….

 

ചില സമയങ്ങളിൽ പ്രിയയുടെ സ്നേഹപ്രകടനം കൂടുമ്പോൾ, ആര്യ അവർക്കരികിൽ എത്തി എന്നും,  അവളെ കേൾപ്പിക്കാൻ വേണ്ടിയാണു എന്നും, നന്ദന് മനസ്സിലായിരുന്നു….

 

ഇതൊക്കെയാണെങ്കിലും എല്ലാ ദിവസവും ഇടയ്ക്കിടയ്ക്ക് നന്ദനെ ഫോൺ വിളിച്ചു വഴക്ക് കൂടുന്നതിന്റെ എണ്ണം ആര്യ കൂട്ടിക്കൊണ്ടിരുന്നു….

ബോബിയെക്കൊണ്ട് പ്രശ്നം ഒന്നും ഇല്ല എന്നറിഞ്ഞത് നന്ദനും വലിയ ആശ്വാസം ആയിരുന്നു….

 

*******

 

 

ബുധനാഴ്ച രാത്രി 2 മണിയോടെ  അവർ തിരിച്ചെത്തി.ബസിൽ നിന്നും ആദ്യം ഇറങ്ങിയ ബോബി അവിടെത്തന്നെ നിന്നുകൊണ്ട് പുറത്തേക്കിറങ്ങുന്നവരുടെ ബാഗുകൾ ഇറക്കി വയ്ക്കുവാൻ  സഹായിച്ചു കൊണ്ടിരുന്നു….

 

ബോബിയെ കണ്ടത് കൊണ്ട്, ആര്യയെ കൂട്ടാൻ വന്ന നന്ദൻ ബസിനടുത്തേക്കു പോയില്ല…..

 

പെൺകുട്ടികളെ ഒക്കെ കൂട്ടാൻ അവരവരുടെ വീട്ടിൽ നിന്നും ആളുകൾ വന്നിരുന്നു..  പ്രിയയെ കൂട്ടിക്കൊണ്ട് പോകാൻ അവളുടെ അച്ഛൻ  വന്നിരുന്നു…

പാതി മയക്കത്തിൽ ബസിൽ നിന്നിറങ്ങിയ പ്രിയ, ബൈക്കിൽ ചാരി കാത്തു നിൽക്കുന്ന നന്ദനെ കണ്ട്  അവന്റടുത്തേക്കു പോയി….അവൾ പോകുന്നത് കണ്ട പ്രിയയുടെ അച്ഛനും നന്ദനടുത്തേക്കു നടന്നു…

 

“എങ്ങനുണ്ടായിരുന്നു പ്രിയാ… ടൂർ…??