തിരുഗണിക-2 [Harshan] 3971

ചേട്ടയ്ക്ക് മുകളിൽ ചേട്ട ബാധിച്ച പരിതാപകരമായ അവസ്ഥയായി തുളുവച്ചിപ്പട്ടണത്തിനും അവിടത്തെ നിവാസികൾക്കും. പട്ടിണിയും ദാരിദ്ര്യവും കൊണ്ടവർ പൊറുതിമുട്ടി.

യവനപുണ്ണും ദാരിദ്ര്യവുമൊന്നും ശതരൂപയെയോ മൃണാളിനിയെയോ ഒട്ടും ബാധിച്ചില്ല, അത്രയേറെ പണവും പൊന്നും അവരുടെ വീട്ടിൽ കുമിഞ്ഞു കൂട്ടി വെച്ചിരുന്നു, ആർക്കും സ്വപ്നം കാണാത്ത അത്രയും ധനം, അതുകൊണ്ടു തന്നെ ആ വീട്ടിൽ പട്ടിണിയുണ്ടായില്ല.

എങ്കിലും സഹായം തേടി വന്നവരാരും അവിടെ നിന്നും വെറും കൈയ്യോടെ മടങ്ങിയില്ല.

അവരാൽ കഴിയുന്ന സഹായം ദാരിദ്ര്യ൦ അനുഭവിക്കുന്നവർക്ക് അവർ നൽകുകയുണ്ടായി.

ഇതിനിടെ ഒരു പുലർച്ചെ

“എല്ലാം പോയെ ” എന്ന നെഞ്ചത്തടിച്ച നിലവിളി കേട്ടുകൊണ്ടാണ് ശതരൂപ ഉറക്കമുണർന്നത്.

മൃണാളിനിയുടെ കരച്ചിലാണെന്നു മനസ്സിലായ ശതരൂപ മെത്തയിൽ നിന്നും എഴുന്നേറ്റോടി മൃണാളിനിയുടെ മുറിയിലേക്ക് ചെന്നു. അവിടെ ചെന്ന് കണ്ട കാഴ്ച ശതരൂപയുടെ കണ്ണുകളിൽ ഇരുട്ട് വ്യാപിപ്പിച്ചു.

ഈട്ടിയുടെ വലിയ അലമാര തുറന്നു കിടക്കുന്നു.

അതിൽ അട്ടിയിട്ടടുക്കി വെച്ചിരുന്ന ലക്ഷക്കണക്കിന് മൂല്യമുള്ള പണക്കെട്ടുകളും ലക്ഷത്തിലേറെ മൂല്യമുള്ള സ്വർണ്ണം വെള്ളി രത്‌നാഭരണങ്ങളും ഒന്നും കാണുന്നില്ല.

ശതരൂപ ഇത്ര കാലം കൊണ്ട് ശരീരം വിറ്റു നേടിയ പണത്തിൽ ഒരണ പൈ പോലും ബാക്കിവെക്കാതെ കൊള്ളയടിക്കപ്പെട്ടിരിക്കുന്നു.

ആളുകൾ ഓടിക്കൂടി , വിവരമറിഞ്ഞു താടിക്ക് കൈ കൊടുത്തു.

പിന്നെയാണറിഞ്ഞത്

മൃണാളിനിയുടെ കണവൻ ഉത്തമപുരുഷനാണ് ഈ പണി ചെയ്തത്.

തലേന്ന് രാത്രി മദ്യം കുടിക്കാതെ നല്ലപിള്ളയായി ഉത്തമ പുരുഷൻ മൃണാളിനിയുടെ മുറിയിലാണ് കിടന്നത്.

മൃണാളിനിയുമായി  കുറെ കാലങ്ങൾക്ക് ശേഷം വേഴ്ചയിൽ ഏർപ്പെടുകയും ചെയ്തിരുന്നു.

അവർ മയങ്ങിയപ്പോൾ മൃണാളിനി അരയിൽ തൂക്കിയിരുന്ന താക്കോൽ കൈക്കലാക്കി അലമാര തുറന്നു ഒരു നാണയം പോലും ബാക്കി വെക്കാതെ കൊണ്ട് പോയിരിക്കുന്നു.

മൃണാളിനി സകലതും പോയ സങ്കടത്തിൽ മാറത്തലച്ചു അലറികരഞ്ഞു .

ശതരൂപ എന്ത് ചെയ്യണമെന്നറിയാതെ ഭിത്തിയിൽ ചാഞ്ഞു നിന്നു.

ആളുകൾ അടക്കം പറഞ്ഞു

തുളുവച്ചിപട്ടണത്തിലെ അതിർത്തിയിൽ താമസിക്കുന്ന   ശീലാവതി എന്ന് പേരുള്ള വിധവയെയും രണ്ടു പെൺമക്കളെയും  കാണുന്നില്ല,

ആരോ ആ രഹസ്യം പരസ്യമാക്കി, ഉത്തമ പുരുഷൻ  രാത്രി ശീലാവതിയുടെ വീട്ടിൽ കയറുന്നത് അയാൾ കണ്ടിട്ടുണ്ട് പോലും.മൃണാളിനിയുടെ കണവൻ ഉത്തമപുരുഷൻ , വീട്ടിലെ സകല സ്വത്തുവകകളും മോഷ്ടിച്ചു കാമുകിയായ ശീലാവതിയെയും അവരുടെ രണ്ടു മക്കളെയും കൂട്ടി നാട് വിട്ടു.

മൃണാളിനിയും ശതരൂപയും അന്തകൂപത്തിൽ അകപ്പെട്ടപോലെയായി.

ഉണ്ടായിരുന്ന സകല ധനവും ഉത്തമപുരുഷൻ കൊണ്ടുപോയി, ഇനിയൊരു അണ പണം പോലും അവരുടെ കൈയിലില്ല, സകലതും നഷ്ടമായി ഒപ്പം നാട്ടിൽ അറുതിയില്ലാത്ത വറുതിയും.

എല്ലാമോർത്തു സങ്കട൦ കൊണ്ട് മൃണാളിനി മാറത്തലച്ചു നിലവിളിച്ചുകൊണ്ടേയിരുന്നു.

മൃണാളിനിയുടെ ചങ്കു പൊളിച്ചുള്ള നിലവിളി സ്വരം  വീടിനു പുറത്തേക്ക് ഉയർന്നു കേൾക്കാമായിരുന്നു.

<<<<O>>>>