തിരുഗണിക-2 [Harshan] 3971

അധ്യായം 13

പഞ്ചവൻകാട്ടിലെ അടിമകിടത്ത്

മൃണാളിനിയും ശതരൂപയും രാത്രിയോടെ വീട്ടിലെത്തി.ഉച്ചക്ക് വെച്ചിരുന്ന ചാമകഞ്ഞി വിളമ്പിരുവരും കഴിച്ചു.

മന്ത്രക്കാരൻ മരിച്ചതൊന്നും അവരറിഞ്ഞതുമില്ല.മരണവിവരം ഒരുപക്ഷെ അടുത്തദിവസം ഗ്രാമത്തിൽ അറിയുമായിരിക്കണ൦.

മൃണാളിനി മന്ത്രക്കാരൻ ജപിച്ചു കൊടുത്ത മണ്ണു വീടിനും ചുറ്റും ഇട്ടു,

ശതരൂപ പാശോപരിമഥനം ചെയ്തതൊക്കെ എല്ലാവരും അറിഞ്ഞിരുന്നു , പുറമെ സന്തോഷം കാണിക്കുന്ന കൂട്ടക്കാർ ഉള്ളിൽ പുകയുന്ന മനസ്സുമായി ആയിരിക്കണ൦ . ശതരൂപ സകലരിലും മേലെ പോയാൽ തങ്ങളുടെ പിഴപ്പിനു൦ സമ്പാദനത്തിനും ദോഷം വരും എന്ന് ഭയക്കുന്നവർ, ദരിദ്രയായ മൃണാളിനി തങ്ങളിലും മേലെ പോയാലോ എന്ന് കരുതുന്നവർ, ശതരൂപയുടെ ഭാഗ്യത്തിൽ അസൂയപൂണ്ടവർ ഇവരൊക്കെ വരുംവരായ്കകൾ നോക്കാതെ കൂടോത്രം ചെയ്തതു തന്നെയാണ് ശതരൂപയുടെ ദുർഗതിക്ക് കാരണമായതും.

ഇതെല്ലാം മാനസ്സികമായി അവരെ ഏറെ സങ്കടപ്പെടുത്തിയിരുന്നു.

മൃണാളിനിയുടെ കണവൻ ഉത്തമപുരുഷൻ ഇതിലൊന്നും വല്യ ശ്രദ്ധകൊടുക്കാതെ മദ്യപിച്ചു പാതിബോധത്തോടെ അവിടെ വന്നു ഉമ്മറത്തു കിടന്നുറങ്ങി.

നേരം പാതിരാവായപ്പോൾ ശതരൂപയെ മുറിയിൽ കൊണ്ട് കിടത്തി

അന്നവൾക്ക് ഒരു ബുദ്ധിമുട്ടും ഉണ്ടായിരുന്നില്ല, നല്ലപോലെ ശതരൂപ കിടന്നുറങ്ങി.

പിറ്റേന്ന് പഞ്ചവൻകാട്ടിലേക്ക് അവരിരുവരും പുറപ്പെട്ടു.

അരുവികരയിലൂടെ ഇടതൂർന്ന മരങ്ങൾക്കിടയിലൂടെ കാടിന്റെ വന്യതയിൽ അവർ പഞ്ചവൻ കാട്ടിലെത്തി.

അവിടെയൊരു പാറക്കെട്ടിനോട് ചേർന്നൊരു ഗുഹയ്ക്കുള്ളിലേക്ക് ഇരുവരും കയറി.

ഉള്ളിൽ തുകൽ വാദ്യം മുഴങ്ങികേൾക്കുണ്ടായിരുന്നു.

മരോട്ടിഎണ്ണകൊണ്ട് തെളിയിച്ച കുഞ്ഞു കൽവിളക്കുകൾ നൽകിയ പ്രകാശ൦ മങ്ങിയതായിരുന്നു.

ഉള്ളിൽ ചാരനിറമുള്ള ദേഹം മൂടുന്ന വസ്ത്രവും കൈയിലും കഴുത്തിലും കല്ലുവാഴകല്ല് കൊരുത്ത മാലയും അണിഞ്ഞ ഒരു സ്ത്രീയിരിക്കുന്നുണ്ടായിരുന്നു

മറുതമുത്തി

തന്റെ ജടപിടിച്ച ചുരുണ്ട മുടി മുകളിലേക്ക് ഒരു ഗോപുരം പോലെ ചുറ്റി വെച്ച് അതിൽ ചെറിയ തലയോട്ടി രൂപങ്ങൾ ആഭരണം പോലെ വെച്ചിരുന്നു.

അവരെ കണ്ടപ്പോൾ തന്നെ ശതരൂപയൊന്നു ഭയന്നു.

കൈയിലിരുന്ന മയിൽ‌പ്പീലിക്കെട്ടു ചുഴറ്റിയവർ കാര്യം തിരക്കി.

മന്ത്രക്കാരൻ കതിരവ൯ മുത്തപ്പൻ വേതാളമൂർത്തിക്ക് അടിമകിടത്താൻ കൽപ്പിച്ച വിവരം മൃണാളിനി തൊഴുകൈയോടെ അവരെയറിയിച്ചു.

അവരൊന്നു പുഞ്ചിരിച്ചു