ഡെറിക് എബ്രഹാം 6 [അഹമ്മദ് ശഫീഖ് ചെറുകുന്ന്] 206

അധികം വൈകാതെ തന്നെ വീണ്ടുമൊരു ഷോക്ക് അവന് കിട്ടി…തന്റെ മുന്നിലെ കാഴ്ച കണ്ടാണ് അവൻ ഞെട്ടിയത്….. തന്റെ വീട് ഇരുന്നിടം പുകയിരുളുകൾ മാത്രമായിരിക്കുന്നു…..അവിടം ശൂന്യമായി കിടക്കുന്നത് പോലെ…..ആളിത്തീരുന്ന ജ്വാലകൾക്കിടയിൽ നിന്നും കരിഞ്ഞമർന്നു കൊണ്ടേയിരിക്കുന്ന പുറ്റുകൾ മാത്രം മിച്ചം വന്നത് പോലെ തോന്നുന്നു…

തന്റെ കണ്ണുകളെ വിശ്വസിക്കാനാവാതെ ആദി വീടിന് മുന്നിൽ മുട്ടും കുത്തിയിരുന്ന് പോയി..

 

നെഞ്ച് പിളർന്നു പോകുന്നത് പോലെ തോന്നിയവന്…..ചുറ്റും ഓടിക്കൊണ്ടിരിക്കുന്ന കാലടികളിൽ താൻ തേടുന്നവരുടെ ശബ്ദമുണ്ടോ… അവരെവിടെ….തൊട്ടടുത്തുള്ള അലക്സേട്ടന്റെ വീട്ടിലായിരിക്കുമോ…

താനിപ്പോ എന്താണ് ചെയ്യേണ്ടത്..

എവിടെയാ പോകേണ്ടത്….

ഒന്നും മനസ്സിലാകാത്തത് പോലെ..

അപ്പോഴേക്കും അവന്റെ പിറകിൽ നിന്നും തോളത്ത് രണ്ട് കൈകളുടെ സ്പർശം അനുഭവപ്പെട്ടു….അവന് തിരിഞ്ഞു നോക്കാൻ തോന്നീല്ല…

 

“ടാ… മോനേ.. ആദീ…”

 

അവൻ മെല്ലെ തിരിഞ്ഞു നോക്കി…. അവന്റെ അയൽവാസി കൂടിയായ CI അലക്സായിരുന്നു അത്…

 

“അലക്സേട്ടാ…. എന്താത്….ഇതെന്താ സംഭവിച്ചത്… ഒരു പത്ത് മിനിറ്റ് മുന്നേ ഇവിടടെയുണ്ടായ എന്റെ വീടെവിടെ അലക്സേട്ടാ….ആരാ ചെയ്തത് ഇതൊക്കെ…? ”

 

“മോൻ അവിടുന്ന് എഴുന്നേൽക്ക്… ചേട്ടന്റെ കൂടെ വാ ”

 

“എല്ലാവരുമെവിടെ….ചേട്ടന്റെ വീട്ടിലാണോ?

അമ്മ പേടിച്ചു കാണുമല്ലോ ഇതൊക്കെ കണ്ടിട്ട്…ഒരിക്കൽ അറ്റാക്ക് വന്ന ആളാണ്…അതായിരുന്നു എന്റെ ടെൻഷൻ…പ്രശ്നമൊന്നുമില്ലല്ലോ..? ”