ആ രാത്രിയിൽ 6 [പ്രൊഫസർ ബ്രോ] 205

“ദേവാ… വണ്ടിയെടുക്ക് നമുക്കൊരിടം വരെ പോണം…”

“എങ്ങോട്ടാണ് സർ…”

“അത്… താൻ വണ്ടി എടുക്ക് ഞാൻ പറയാം…”

ദേവനു മറുപടി കൊടുക്കാൻ ആഞ്ഞ മരക്കാർ അവന്റെ അരികിൽ ഗംഗ നിൽക്കുന്നത് കണ്ടതും ഒന്നും പറയാതെ ബൊലേറോയുടെ അരികിലേക്ക് നടന്നു

“താൻ ഒരു കാര്യം ചെയ്യ് , രാജേട്ടൻ ഇപ്പൊ കംപ്ലയിന്റ് കൊണ്ട് വരും അതിൽ ഒരു സൈൻ ചെയ്തേക്ക്., എന്നിട്ട് തന്റെ വണ്ടിയും എടുത്തുകൊണ്ട് വീട്ടിൽ പൊയ്ക്കോ…”

“ശരി സർ…”

“പിന്നെ…അല്ലെങ്കിൽ വേണ്ട ഒന്നൂല്ല ബൈ”

ഗംഗയുടെ മുഖത്തു നോക്കി എന്തോ പറയാൻ വന്ന ദേവൻ ഒരു നിമിഷം നിർത്തി, പിന്നെ ഗംഗയോട് യാത്ര പറഞ്ഞുകൊണ്ട് വണ്ടിയുടെ ഡ്രൈവിംഗ് സീറ്റിലേക്ക് കയറി

ദേവൻ പറഞ്ഞു പൂർത്തിയാക്കിയില്ല എങ്കിലും അവൻ പറയാൻ വന്നത് എന്താണെന്ന് ഗംഗക്ക് മനസ്സിലായിരുന്നു, അവൾ അവനെ നോക്കി ചിരിച്ചുകൊണ്ട് സ്റ്റേഷന്റെ അടുത്തേക്ക് തിരിഞ്ഞു നടന്നു

“എങ്ങോട്ടാണ് സർ…”

വണ്ടി സ്റ്റേഷനിൽ നിന്നു പുറത്തിറങ്ങിയതും ദേവൻ മരക്കാരോട് ചോദിച്ചു

“താൻ നേരെ മെഡിക്കൽ കോളേജിലേക്ക് വിട്…”

“എന്താണ് സർ ഇത്ര പെട്ടന്ന്…”

“അങ്ങേര് വിളിച്ചിരുന്നു… പറ്റില്ലെങ്കിൽ കളഞ്ഞിട്ട് വേറെ വല്ല പണിക്കും പോകാൻ… അയാൾക്കൊക്കെ വെറുതെ പറഞ്ഞാൽ മതി, മരിച്ച ആളുകൾ മന്ത്രിയുടെ കൂട്ടുകാർ ആണെന്നും പറഞ്ഞു കൊന്നവർ നമ്മുടെ മുന്നിൽ വന്ന്‌ നിന്ന് തരുമോ എന്നെ പിടിച്ചോ എന്നും പറഞ്ഞുകൊണ്ട്…”

മരക്കാർ അതിയായ ദേഷ്യത്തോടെ ഡാഷ്ബോർഡിൽ ആഞ്ഞിടിച്ചു.