ആ രാത്രിയിൽ 6 [പ്രൊഫസർ ബ്രോ] 205

“സർ…”

ദേവരാജന്റെ ശബ്ദം കേട്ട സത്യൻ മുഖം തിരിക്കാതെ അയാളുടെ കണ്ണുകളെ മാത്രം ദേവരാജന്റെ നേർക്ക് പായിച്ചു. അയാളുടെ വിരലുകൾ റിമോട്ടിന്റെ പവർ ബട്ടണിൽ അമർന്നു

വിറയ്ക്കുന്ന കാലടികളോടെ ദേവരാജൻ സത്യന്റെ നേർക്ക് നടന്നടുത്തു.

“സോറി സർ…”

“അവന്റെയൊരു സോറി… നാണമില്ലല്ലോ തനിക്കിത് പറയാൻ…”.

സോഫയിൽ നിന്നും ചാടി എഴുന്നേറ്റ സത്യൻ അലറിയതും ദേവരാജൻ ഭയത്തോടെ രണ്ടടികൾ പിന്നോട്ട് വച്ചു

“അത് സർ…”

“എടൊ കമ്മീഷണറെ… തന്നെയൊക്കെ എന്തിന് കൊള്ളാം… തന്നോട് ഞാൻ പറഞ്ഞതല്ലേ കേസിന്റെ പുരോഗതി എന്ത് തന്നെയായാലും അത് താൻ അറിഞ്ഞിരിക്കണം എന്ന്… അപ്പൊ താൻ എന്താ പറഞ്ഞത് അവർക്ക് തെളിവുകൾ ഒന്നും കിട്ടിയിട്ടില്ല എന്ന്…, എന്നിട്ടിപ്പോ എന്തായെടോ… അവർക്ക് തെളിവുകൾ കിട്ടുകയും ചെയ്തു അവർ അതിൽ പിടിച്ച് അന്വേഷച്ച് അന്വേഷിച്ച് നമ്മുടെ മൂക്കിൻ തുമ്പത് എത്തുകയും ചെയ്തു…

ഇന്ന് അയാൾ വിളിച്ചു അറിയിച്ചില്ലായിരുന്നു എങ്കിൽ എന്താകുമായിരുന്നു… താനും ഞാനും ഇരിക്കുന്ന കസേരകൾ ഉറപ്പിച്ചിരിക്കുന്നത് വലിയൊരു കള്ളത്തിനു മുകളിൽ ആണ്… അത് കള്ളമായിരുന്നു എന്ന് പുറത്തറിയുന്ന ആ നിമിഷം താനും ഞാനും അകത്താകും…”

“അത് സർ…”

“ഏത് സർ… ഈ കേസ് താൻ മര്യാദക്ക് ഫോള്ളോ അപ്പ്‌ ചെയ്തിരുന്നു എങ്കിൽ ഇതിന് മുൻപേ നമുക്ക് ജീവന്റെയും ശേഖരന്റേയും കൊലയാളിയെ പിടിക്കാമായിരുന്നു…”

സത്യന്റെ ശകാരങ്ങൾ എല്ലാം കേട്ട് കൊണ്ട് തലകുനിച്ചു നിൽക്കുകയായിയുന്നു ദേവരാജൻ…