ആ രാത്രിയിൽ 6 [പ്രൊഫസർ ബ്രോ] 205

“കമ്മീഷ്ണർ ആണോ… നമ്മൾ കൊലയാളിയെ പിടിക്കാൻ അവർ ഒന്ന് സഹകരിച്ചാൽ മതി , അതെങ്ങനെയാ മന്ത്രിയെ ചോദ്യം ചെയ്യാൻ പറ്റില്ലല്ലോ… കോപ്പിലെ പ്രോട്ടോകോൾ…”

“താൻ എന്തായാലും എന്നെ മെഡിക്കൽ കോളേജിൽ ഇറക്കിയിട്ട്, ഡോക്ടർ ഗോപകുമാറിന്റെ ഫാമിലിയെ ഒന്ന് പോയി കാണ്,എന്നിട്ട് ഇങ്ങോട്ട് തന്നെ വാ…”

“ശരി സർ”

♦️♦️♦️♦️♦️

സമയം ഒരുപാട് വൈകിയിട്ടും ഒറക്കം വരാതെ തിരിഞ്ഞും മറിഞ്ഞും കിടക്കുകയായിരുന്നു ചന്ദ്ര . ഉറങ്ങുവാനായി കണ്ണടക്കുമ്പോൾ മുഴുവൻ അവളുടെ മനസ്സിൽ തെളിയുന്നത് കയറിൽ തൂങ്ങിയാടുന്ന തന്റെ ഏട്ടന്റെ മൃതശരീരം ആയിരുന്നു

അവൾ ബെഡ് സൈഡ് ടേബിളിൽ ഇരുന്ന തന്റെ ഫോൺ എടുത്ത് വാട്സ്ആപ്പ് ഓപ്പൺ ചെയ്ത് രാമദാസൻ എന്ന് സേവ് ചെയ്തിരുന്ന നമ്പറിലേക്ക് വീഡിയോ കാൾ ചെയ്തു

അങ്ങേ തലക്കൽ കാൾ എടുത്തതും അവൾ മുഖത്തു ഒരു പുഞ്ചിരി വരുത്തിക്കൊണ്ട് ഫോൺ തന്റെ മുഖത്തിന് നേരെ പിടിച്ചു

40 നും 50 നും ഇടയിൽ പ്രായം വരുന്ന,തലമുടികൾ മുഴുവനായും നരച്ച ഒരാൾ , കാക്കി കളർ ഷർട്ട്‌ ആണ് അയാളുടെ വേഷം

“ചന്ദ്രാ… എന്താ മോളെ ഈ സമയമായിട്ടും നീ ഉറങ്ങീല്ലേ…”

“ഇല്ല ചേട്ടാ,അയാൾ , ആ സത്യേനെക്കൂടെ തീർക്കാതെ എനിക്കുറങ്ങാൻ പറ്റും എന്ന് തോന്നുന്നില്ല”

“എന്താ മോളെ ഇങ്ങനെ, ജീവനെയും ശേഖരനെയും തീർത്തത് പോലെ എളുപ്പമല്ല സത്യനെ തീർക്കാൻ,അവൻ ഒരു മന്ത്രിയാണ്… എന്തെങ്കിലും ഒരു പിഴവ് സംഭവിച്ചാൽ അവന് പകരം നമ്മൾ ആകും കാലപുരിക്ക് പോകുന്നത്”

“ശരിയാണ് ,അയാൾ ഒരു മന്ത്രിയാണ് അതെനിക്കും അറിയാം… പക്ഷെ നമ്മുടെ മുന്നിൽ സമയമില്ല, ചേട്ടൻ തന്നെ അല്ലെ പറഞ്ഞത് സി.ഐ മരക്കാരും എസ്.ഐ ദേവനും പ്രഗത്ഭരായ പോലീസ് ഉദ്യോഗസ്ഥർ ആണെന്ന്… അവർ നമ്മളെ കണ്ട് പിടിച്ചാൽ…”