ആ രാത്രിയിൽ 6 [പ്രൊഫസർ ബ്രോ] 205

♦️♦️♦️♦️♦️

“ജലാൽ….”

രാവിലെ സ്റ്റേഷനിലേക്ക് എത്തിയ ദേവൻ അലറി

ദേവന്റെ ആ മുഖം അവിടെ ഉള്ളവർ ആദ്യമായി കാണുകയായിരുന്നു, കോപത്താൽ ചുവന്ന കണ്ണുകൾ അവനെ നോക്കാൻ തന്നെ മറ്റുള്ളവരെ ഭയപ്പെടുത്തി

“സർ…”

ദേവന്റെ അലർച്ച കേട്ട് അങ്ങോട്ട് ഓടിയെത്തിയ ജലാൽ അവന്റെ മുന്നിൽ വന്ന്‌ സല്യൂട് ചെയ്തു

“മരക്കാർ സർ ന്റെ അവസാനത്തെ ഫോട്ടോകൾ എനിക്ക് വേണം, അരമണിക്കൂറിനുള്ളിൽ അതെന്റെ ടേബിളിൽ എത്തിയിരിക്കണം…”

“പക്ഷെ സർ , … അത് നമ്മുടെ പരിധിയിൽ ഉള്ള സ്ഥലം അല്ല, ആ ഫോട്ടോകൾ മരക്കാർ സാറിന്റെ മരണം അന്വേഷിക്കുന്ന ഉദ്യോഗസ്ഥന്റെ കയ്യിൽ ആയിരിക്കില്ലേ…”

“ജലാൽ… ”

ഈ പ്രാവശ്യം ദേവന്റെ ശബ്ദത്തിൽ ജലാൽ ഇതുവരെ കേൾക്കാത്ത അവന്റെ ആജ്ഞാ സ്വരം ആയിരുന്നു. ദേവനെ ഭയത്തോടെ നോക്കിയിരുന്ന കണ്ണുകളുടെ കൂട്ടത്തിൽ രണ്ട് കണ്ണുകൾ രാജന്റേതും ആയിരുന്നു…

മറ്റുള്ളവർ ദേവനെ കണ്ട് ഭയന്നപ്പോൾ രാജൻ ഭയന്നത് ദേവൻ പോകുന്നത് അപകടത്തിലേക്കാണോ എന്നതായിരുന്നു

“സോറി സർ…  ഞാൻ ഫോട്ടോ എത്തിക്കാം …”

“മ്മ്… താൻ പൊയ്ക്കോ…”

ദേവനെ നോക്കി ഒരിക്കൽ കൂടി സല്യൂട്ട് ചെയ്തുകൊണ്ട് ജലാൽ പിൻവാങ്ങി.

ദേവൻ തന്റെ ഓഫീസിലേക്ക് നടന്നപ്പോൾ അവനെ തന്നെ നോക്കി നിന്ന കീഴുദ്യോഗസ്ഥർ എല്ലാം ഒരു ദീർഘ നിശ്വാസം വിട്ടുകൊണ്ട് തമ്മിൽ തമ്മിൽ നോക്കി . അപ്പോഴും അവർക്കാർക്കും ദേവന്റെ ആ മാറ്റത്തെ ഉൾക്കൊള്ളാൻ ആയില്ല