അസ്രേലിൻ്റെ പുത്രൻ 1 [FÜHRER] 495

അപ്പനു അറിയില്ലെടാ മോനെ എന്തു ചെയ്യണമെന്നു.. ലൂസിഫറിന്റെ വാക്കുകള്‍ അതാണ് എന്നെ കൂടുതല്‍ അലോസരപ്പെടുത്തുന്നത്… അവളുടെ ശക്തി എന്താണെന്നു നിനക്ക് അറിയാവുന്നതല്ലേ.. ആ കുട്ടിയുടെ ജനനം അത് എനിക്കും പ്രവചനാധീതമാണ്.

ഒന്നു മാത്രം എനിക്കറിയാം അവന്റെ ശക്തി അത് ആരാലും തടുക്കാന്‍ പറ്റാത്തതാണ്.. എന്റെ ശക്തി പോലും അവനു മുന്നില്‍ ക്ഷയിക്കും. മൈക്കിൾ ഞെട്ടി പിതാവിനെ നോക്കി. അവനാ വാക്കുകൾ വിശ്വസിക്കാനായില്ല.

അവളുടെ മകന്‍  അപ്പനു പോലും ആപത്താണെന്നാണോ അപ്പൻ പറയുന്നത്. അങ്ങനെ ഒരു സന്താനം അതു പിറക്കാന്‍ പാടില്ല അപ്പാ. മൈക്കിളിന്റെ ഉറച്ച വാക്കുകള്‍ കേട്ടു ദൈവം ഞെട്ടി അവനെ നോക്കി.

ഡാ മോനെ അതു വേണ്ടെടാ.. നമുക്കു കാത്തിരിക്കാം അവന്‍ പിറക്കട്ടെ.. ദൈവം മൈക്കിളിനു നേരെ ആശ്വസവാക്കുകള്‍ പറഞ്ഞു..

അപ്പാ അപ്പനു പോലും തടുക്കാനാവാത്ത ശക്തി അതു നമ്മുടെ പ്രതീക്ഷയക്കു വിരുദ്ധമാണെങ്കിലോ ഈ പ്രപഞ്ചത്തിന്റെയും ജീവജാലങ്ങളുടെയും നാശത്തിന് അതു വഴിവെക്കും.. അവരെ സംരക്ഷിക്കേണ്ട ചുമതല എനിക്കും അപ്പനും നമ്മള്‍ എല്ലാവര്‍ക്കുമുണ്ട്.. അതിനു ഭീഷണിയാകുന്ന ഒന്നിനേയും മൈക്കിള്‍ വെറുതേ വിടില്ല.. അതു സ്വന്തം പെങ്ങളുടെ ഉദരത്തില്‍ വളരുന്ന കുഞ്ഞായാലും.

മോനേ മൈക്കിളേ.. ദൈവം അവനെ വിളിച്ചു.
എന്നാൽ ദൈവത്തിന്റെ പിന്‍വിളികള്‍ കേള്‍ക്കാതെ മൈക്കള്‍ അസ്രേലിനെ ലക്ഷ്യമാക്കി പറന്നു..

ദൂരെ മലമടക്കുകള്‍ക്കിടയില്‍ അസ്രേല്‍ ഏകാന്തയായിരിക്കുകയായിരുന്നു. അവളൂടെ ഉദരത്തില്‍ തുടിക്കുന്ന ജീവന്‍ അവള്‍ക്കും വിശ്വസിക്കാനാകുന്നതായിരുന്നില്ല.. ഓരോ നിമിഷവും തന്റെയുള്ളിലെ ജീവന്‍ വളര്‍ന്നുകൊണ്ടിരിക്കുന്നത് അവള്‍ അറിയുന്നുണ്ടായിരുന്നു.. വീര്‍ത്തുന്തി വന്ന വയറില്‍ അവള്‍ വാത്സല്യത്തോടെ തലോടിയതും ആദ്യമായി കട്ടിയുടെ ചലനം അവള്‍ക്ക് അനുഭവപ്പെട്ടു..  ആ ചലനം അസ്രേലിന്റെ മുഖത്തു മന്ദഹാസം വിരിയിച്ചു. താൻ ഒരു അമ്മയാകാൻ പോകുന്നു എന്നത് അവളെ ആനന്ദത്തിലാഴ്ത്തി. അവൾ വയറിൽ തലോടി തൻ്റെ കുഞ്ഞിനോടു കിന്നാരം പറഞ്ഞു കൊണ്ടിരുന്നു.