ശങ്കർ വലിയ സ്ക്രീനിനു മുന്നിൽ അക്ഷമയോടെ കാത്തിരുന്നു.
അവസാന റൗണ്ടിൽ എത്തപ്പെട്ട രണ്ടു ചിത്രങ്ങളും കേരളത്തിൽ നിന്നുള്ളതായിരുന്നു.”വേർപിരിയൽ ” ഇതിനെ ആസ്പദമാക്കി ഷോർട്ട് ഫിലിം ഉണ്ടാക്കുക എന്ന വലിയ ഒരു ടാസ്ക്ക് ആണ് കൊടുത്തിരിക്കുന്നത്.

തീയറ്ററിലെ വലിയ സ്ക്രീനിൽ ചിത്രങ്ങൾ തെളിഞ്ഞു.

കുടുംബകോടതിയുടെ കവാടത്തിന്റെ മുന്നിലൂടെ ഉള്ളിലേക്ക് പ്രവേശിക്കുന്ന അവന്റെ പിന്നിലായി സംവിധായകന്റെ പേരെഴുതി കാണിച്ചു കൊണ്ട് സിനിമ ആരംഭിച്ചു…

 

* കയ്യൊപ്പ് *

ഇടനാഴിയില്‍ ഇടയ്ക്കിടെ നടന്നു പോകുന്നവരുടെ കാലടികളുടെ ശബ്ദങ്ങൾ മാത്രം മുഴങ്ങി.
അയാൾ തടി കൊണ്ടുണ്ടാക്കിയ ബെഞ്ചിൽ തന്റെ ഊഴവും കാത്തിരിക്കുകയായിരുന്നു.

പ്രഷുബ്ദമായ മനസ്സ് വീണു കിട്ടിയ ഇടവേളയില്‍ അയാളിലെ ചിത്രകാരനെ വീണ്ടും ചികഞ്ഞെടുത്തു.

ഒരുപാടു തവണ ജീവിതം കൊണ്ട് വരയ്ക്കാന്‍ ശ്രമിച്ചു പരാജയമടഞ്ഞവളുടെ ചിത്രം വീണ്ടും മനസ്സിന്റെ കാന്‍വാസില്‍ പകര്‍ത്താന്‍ ഒരു വിഫല ശ്രമം.

മനസ്സില്‍ ഒരുപാടുകാലം പതിഞ്ഞിരുന്ന മുഖത്തിന്റെ കണ്ണുകൾ അവനെ നോക്കി പരിഹസിക്കുന്നു,

അധരങ്ങളില്‍ പുച്ഛം,

ഇഷ്ടപ്പെട്ട നിറങ്ങൾ മാറ്റി,മാറ്റി പരീക്ഷിച്ചു നോക്കി.
എന്നിട്ടും മുഖത്തിന്റെ ഭാവം മാറുന്നില്ല.
തീവ്രമായ അവളുടെ ഭാവങ്ങൾ അവനെ വേട്ടയാടികൊണ്ടിരിക്കുന്നു.

മനസ്സിന്റെ ഏകാഗ്രത പോയി കൈകളില്‍ നിന്നു വഴുതിപോയ ചായക്കൂട്ടുകള്‍ അവനെ നോക്കി പല്ലിളിക്കുന്നു.