❤️ തിരിച്ചറിവ് ❤️ [കുട്ടപ്പൻ] 1170

“കുറച്ചൂടെ ഉറങ്ങായിരുന്നല്ലോ മോളേ…  എന്തിനാ ഇത്ര നേരത്തെ എണീറ്റത്.”

ജാനകിയമ്മ വാത്സല്യത്തോടെ ചോദിച്ചു.

” ഞാനെന്നും ഈ നേരത്താ എണീക്കാറമ്മേ… ന്നും രാവിലെ അമ്പലത്തിൽ തൊഴാൻ പോകും… ഇനിയത് പറ്റൂലാലോ. ”

അവൾ പുഞ്ചിരിയോടെ പറഞ്ഞു.

” ഇവിടന്ന് കുറച്ചുമാറി ഒരു ശിവക്ഷേത്രം ഉണ്ട്ട്ടോ.. നിർബന്ധച്ചാ അവിടെ പോവാം ”

അമ്മ പറഞ്ഞു

” ഏയ് അങ്ങനൊന്നുല്ലമ്മ… അവിടെ വീട്ടിനടുത്തല്ലേ അമ്പലം.. അപ്പോ എന്നും പോകും.. എന്നവച്ചു നിർബന്ധോന്നുല്ല. ” അവൾ പറഞ്ഞു.

പിന്നെ ഭക്ഷണം ഉണ്ടാക്കാൻ അമ്മയെ സഹായിച്ചു

അരുൺ ഉറക്കം ഉണർന്നപ്പോൾ അഞ്ജു അടുത്തുണ്ടായിരുന്നില്ല. അവൻ കുളിച് വേഷം ഒക്കെമാറി താഴേക്ക് ചെന്നു.

ഡെയിനിങ് ടേബിളിൽ ഭക്ഷണം വിളമ്പിവയ്ക്കുകയായിരുന്നു അഞ്ചുവപ്പോൾ. അവൻ അവൾക്കൊരു പുഞ്ചിരി സമ്മാനിച്ചു. എന്നാൽ അവൾ അത് മൈൻഡ് ചെയ്തില്ല. അത് അവനെ തെല്ലോന്ന് സങ്കടപ്പെടുത്തി. ഇത്രയും നേരം കൊണ്ട് അവൾ അമ്മയുമായി നല്ല കൂട്ടായി. എന്നാൽ അരുണിന് അവളോടൊന്ന് സംസാരിക്കാൻ പോലും പറ്റിയില്ല.

കിട്ടിയ അവസരങ്ങളിലൊക്കെയും അവൾ ഒഴിഞ്ഞുമാറി. അത് അവൻ ശ്രെദ്ധിക്കുന്നുണ്ടായിരുന്നു.

അവന്റെ മനസ്സിൽ കൂടി ഒരുപാട് ചിന്തകൾ കടന്നുപോയി. അഞ്ജുവിന് തന്നെ ഇഷ്ടമല്ലേ… അങ്ങനെയെങ്കിൽ എന്തിന് അവൾ കല്യാണത്തിന് സമ്മതിച്ചു… ഇനി വേറെ ആരെയെങ്കിലും ഇഷ്ടമാണോ… അങ്ങനെയുള്ള ഒത്തിരി ചിന്തകൾ. അതവനെ ആസ്വസ്ഥനാക്കി.

………

മണിയൂരിലെ അഞ്ജലിയുടെ വീട്ടിലേക്ക് വിരുന്ന് പോയപ്പോഴാണ് അവളുടെ ആഗ്രഹമൊക്കെ അവൻ അറിയുന്നത്. അതും അവളുടെ അച്ഛൻ പറഞ്ഞ്.

എൻട്രൻസ് എക്സാം റിസൾട്ട്‌ വന്നിട്ടുണ്ടായിരുന്നു… എന്നാൽ അവൾ അത് നോക്കുക കൂടി ചെയ്തിട്ടില്ല എന്നത് അവനെ അത്ഭുതപ്പെടുത്തി. ഏറ്റവും കൂടുതൽ ആഗ്രഹിച്ച ഒരു കാര്യത്തിലേക്കുള്ള ആദ്യപടി… അതാണ്‌ എൻട്രൻസ് എക്സാം അതിന്റ റിസൾട്ട്‌ കൂടി അവൾ നോക്കിയില്ല.