❤️ തിരിച്ചറിവ് ❤️ [കുട്ടപ്പൻ] 1170

ഇന്നവളുടെ 19 ആം പിറന്നാളാണ്

ഒരു ഇടത്തരം കുടുംബത്തിലെ അങ്കമാണവൾ. അവളുടെ അച്ഛൻ കേശവൻ ഒരു കർഷകനാണ്. അമ്മയായ മീനാക്ഷിയാകട്ടെ ആ നാട്ടിലെ മറ്റുസ്ത്രീകളെപ്പോലെ ഒരു വീട്ടമ്മയും. എന്നുവെച്ചു സ്ത്രീകൾ പണിക്ക് പോകാൻ പാടില്ല എന്ന കാഴ്ചപ്പാടൊന്നും അവർക്കില്ല. മകളെ ഇഷ്ടമുള്ളത്രയും പഠിപ്പിക്കണം എന്നവർ തീരുമാനിച്ചിരുന്നു. അവരുടെ ആ ആഗ്രഹത്തോട് നീതിപുലർത്തുന്നരീതിയിൽ തന്നെയാണ് അവൾ പഠിച്ചത്. പത്താം ക്ലാസിലും +2 വിലും ഉയർന്ന മാർക്കോടുകൂടിത്തന്നെയാണ് അവൾ പാസായതും.  ഒരു ഡോക്ടറാകണം എന്നതായിരുന്നു അവളുടെ ആഗ്രഹം.+2 കഴിഞ്ഞ് എൻട്രൻസ് എഴുതിയെങ്കിലും ആദ്യശ്രമത്തിൽ ഗവണ്മെന്റ് കോളേജിലൊന്നും അവൾക്ക് കിട്ടിയില്ല. പിന്നെയുള്ളത് പ്രൈവറ്റ് കോളേജ് എന്ന ഓപ്ഷനാണ്  എന്നാൽ അതിനുംപോന്ന വരുമാനം തന്റെ കുടുംബത്തിനില്ല എന്ന് അവൾക്കറിയാമായിരുന്നു. കടം വാങ്ങിയായാലും അവൾക്കിഷ്ടമുള്ളത് അച്ഛനുമമ്മയും പഠിപ്പിക്കുമെന്ന് അവൾക്ക് ഉറപ്പുള്ള കാര്യവുമായിരുന്നു. അതുകൊണ്ട് അവൾ ഒരുവട്ടം കൂടെ ശ്രെമിച്ചുനോക്കാം എന്ന തീരുമാനത്തിലെത്തി. അങ്ങനെ എക്സാം ഒക്കെ കഴിഞ്ഞ് റിസൾട്ട്‌ വരാനായി കാത്തിരിക്കുകയാണിപ്പോൾ.

“അമ്മേ… കറുമ്പിക്ക് പുല്ല് കൊടുത്താരുന്നോ ” അവൾ അകത്തേക്ക് കയറുന്നതിനിടെ വിളിച്ച് ചോദിച്ചു.

” ക്കെ ഞാൻ കൊടുത്തു അഞ്ജു… നീയ് വന്ന് കഴിക്കാൻ നോക്കിക്കേ…ആട്ടെ അമ്പലത്തിൽ തിരക്കുണ്ടോ? ”

അമ്മ അവളുടെ ചോദ്യത്തിന് മറുപടിപറഞ്ഞുകൊണ്ട് ചോദിച്ചു.

”   തിരക്കൊന്നുല്ല… എന്നും കാണണോരുമാത്രേ ഉണ്ടായുള്ളൂ.. അച്ഛൻ പോയോ ”

അവൾ ചോദിച്ചു.

” ആഹ് അച്ഛൻ പാടത്തേക്കിപ്പോ ഇറങ്ങിയേയുള്ളു…. ന്നാ കഴിക്ക്. ”

അമ്മ അവൾക്ക് വിളമ്പിനൽകി.

ദോശയും ചമ്മന്തിയുമായിരുന്നു. അവൾ ആസ്വദിച്ചുകഴിച്ചു. അമ്മയുണ്ടാക്കുന്ന ഭക്ഷണത്തിനൊക്കെ ഒരു പ്രത്യേക സ്വാദാണ്.പിറന്നാൾ പ്രമാണിച്ച്  ഉച്ചക്കത്തേക്ക് സദ്യയും പായസവും ഉണ്ടാക്കുന്നുണ്ട്. അമ്മയോടൊപ്പം  ഭക്ഷണം തയ്യാറാക്കാൻ അവളും ചേർന്നു. പച്ചക്കറികൾ നുറുക്കാനൊക്കെ അവൾ സഹായിച്ചു.