❤️ തിരിച്ചറിവ് ❤️ [കുട്ടപ്പൻ] 1170

അവൾക്ക് അവനെ അങ്ങനെ മാത്രമേ കാണാൻ സാധിക്കുന്നുണ്ടായുള്ളൂ. അവന്റെ കാൾ വരുമ്പോൾ തന്നെ അവൾ ആസ്വസ്ഥയാവും. എങ്കിലും അച്ഛന്റെയും അമ്മയുടെയും മുന്നിൽ വിദഗ്ദമായി അവളത് മറച്ചുപിടിക്കുകയും ചെയ്തു. ആ വീട്ടിലാകെ ഓടിച്ചാടി നടന്നിരുന്ന അവളിപ്പോ അങ്ങനെയല്ല.ഏത് സമയവും എന്തെങ്കിലും ചിന്തായിലായിരുന്നു അവൾ. ഇതൊക്കെ കേശവനും മീനാക്ഷിയും ശ്രെദ്ധിച്ചുവെങ്കിലും കല്യാണം അടുത്തതിലുള്ള ടെൻഷൻ ആണെന്ന് കരുതി കാര്യമാക്കിയില്ല.

എന്നാൽ ഇതൊന്നും മനസിലാക്കാതെ അരുൺ അഞ്ജലിയെ സ്നേഹിച്ചുതുടങ്ങി. തന്റെ ജീവന്റെ പാതിതായി അവൻ അവളെ കണ്ടുതുടങ്ങി. അവന്റെ സ്വപ്നങ്ങളിൽ അവളുമൊത്തുള്ള സന്തോഷം നിറഞ്ഞ സുന്ദര നിമിഷങ്ങൾ നിറഞ്ഞു നിന്നു.

…….

ഇന്നാണ് ആ സുദിനം. അരുണിന്റെയും അഞ്ജലിയുടെയും വിവാഹം. വലിയ ഒരു ഓഡിറ്റോറിയത്തിൽ വച്ചാണ് കല്യാണം. വളരെ മനോഹരമായ പുഷ്പങ്ങളാൽ ആ വേദി അലങ്കരിച്ചിരുന്നു. ഒരു നിലവിളക്ക് നടുവിൽ വച്ചിട്ടുണ്ട്. അതിനടുത്തായി തെങ്ങിൻ പൂക്കുല ഒരു പറ നെല്ലിൽ കുത്തിവച്ചിട്ടുണ്ട്. അതിന് പിറകിലായി രണ്ട് കുഞ്ഞ് പീഠങ്ങൾ.

മീനാക്ഷിയമ്മയും ജനകിയമ്മയും ചേർന്ന് നിലവിളക്കിന് തിരികൊളുത്തി. പിന്നെ അരുണിനെ ആനയിച്ചു പീഠത്തിൽ ഇരുത്തി.

അവൻ സദസിനെ നോക്കി കൈകൾ കൂപ്പി അവിടെ ഇരുന്നു. എല്ലാവരുടെയും കണ്ണുകൾ അവന്റെ മുകളിൽ ആയിരുന്നത് അവനിൽ ചെറിയ ടെൻഷൻ ഉണ്ടാക്കി.

കുറച്ച് നേരത്തെ കാത്തിരിപ്പിന് ശേഷം സർവാഭരണ വിഭൂഷിതയായി അഞ്ജുവിനെ വേദിയിലേക്ക് ആനയിച്ചു. അവന്റെ വാമഭാഗം ചേർന്ന് അവൾ ആസനസ്ഥയായി.

അവൻ അവളെ നോക്കി. എന്നാൽ അവൾ തല കുനിച്ച് ഇരിക്കുകയാണുണ്ടായത്.

മന്ദ്രോചാരണങ്ങൾ മുഴങ്ങുന്നു…. അതിന് അവസാനം തന്ത്രി പൂജിച്ച താലി അവന്റെ കയ്യിൽ കൊടുത്തു. നാദസ്വരത്താൽ ആ വേദി മുഖരിതമായി. അവൻ അവളുടെ കഴുത്തിൽ താലി ചാർത്തി.

അഞ്ജുവിന്റെ കണ്ണിൽ നിന്നും രണ്ട് തുള്ളി കണ്ണുനീർ അടർന്നുവീണു. അത് പക്ഷെ സുമംഗലി ആയതിനാൽ ഉള്ള സന്തോഷമായിരുന്നില്ല. താലി എന്ന ബന്ധനത്തിൽ അവളുടെ സ്വപ്‌നങ്ങൾ തകർന്നടിഞ്ഞ സങ്കടമായിരുന്നു. അവളുടെ അച്ഛൻ അരുണിന് അവളെ കൈപിടിച്ചേല്പിച്ചു.

എല്ലാ ചടങ്ങുകളും മംഗളകരമായി പൂർത്തിയാക്കി അവർ മീനാക്ഷിയമ്മയോടും കേശവനോടും യാത്ര പറഞ്ഞു. ആ സമയം അച്ഛന്റെ മാറിൽ വീണ് അഞ്ജലി പൊട്ടിക്കരഞ്ഞു.അത് കണ്ടുനിന്നവരിലും കണ്ണുനീരണിയിച്ചു.