❤️ തിരിച്ചറിവ് ❤️ [കുട്ടപ്പൻ] 1170

മുറ്റത്ത്‌ ഓട്ടോറിക്ഷ വന്നുന്നിന്ന ശബ്ദം കേട്ടാണ് അഞ്ജു പുറത്തേക്കിറങ്ങിയത്.

അവൾ വരാന്തയിൽ എത്തിയപ്പോൾ കാണുന്നത് ഓട്ടോയിൽനിന്ന് രണ്ടുപേർ ചേർന്ന് താങ്ങിപ്പിടിച് ഇറക്കുന്ന അവളുടെ അച്ഛനെയാണ്. ശബ്ദമൊക്കെ കേട്ട് മീനാക്ഷിയമ്മയും അങ്ങോട്ടേക്ക് വന്നു.

” അയ്യോ… കേശുവേട്ടാ.. ന്താ പറ്റിയേ… ”

അവർ ആവലാതിയോടെ ചോദിച്ചു.

” പാടത്ത് പണിയെടുക്കുമ്പോ തലച്ചുറ്റി വീണതാ ചേച്ചി. ആശുപത്രിയിൽ പോവാന്ന് പറഞ്ഞിട്ട് സമ്മതിച്ചില്ല… ”

കൂടെ വന്ന ഒരാളാണ് മറുപടികൊടുത്തത്.

അയാളെ താങ്ങിപ്പിടിച്ചു അകത്തെ മുറിയിൽ കൊണ്ട് കിടത്തിയിട്ട് അവർ പോയി.

എല്ലാംകൂടെയായപ്പോൾ അഞ്ജു ആകെ പേടിച്ചു. അവളുടെ കണ്ണൊക്കെ നിറഞ്ഞു.

” അയ്യേ… അഞ്ജുക്കുട്ടി കരയാ….!.  അച്ഛനൊന്നുല്ലടാ… പേടിക്കണ്ടട്ടൊ “.

കേശവൻ അവളെ ആശ്വസിപ്പിച്ചു.

അവൾ മറുപടിയൊന്നും പറയാതെ അച്ഛന്റെ മാറിൽ തലചായ്ച്ചു അവിടെ ഇരുന്നു. അയാൾ വാത്സല്യത്തോടെ അവളുടെ തലയിൽ തലോടിക്കൊണ്ടിരുന്നു.

അന്നുച്ചയ്ക്ക് അവളൊന്നും കഴിച്ചില്ല.

വൈകുന്നേരം ആയപ്പോൾ കേശവന് വീണ്ടും അസ്വസ്ഥത പോലെ തോന്നി. ചെറിയ നെഞ്ചുവേദനയും അനുഭവപ്പെട്ടു.

ആശുപത്രിയിൽ പോകാമെന്ന് അഞ്ജുവും അമ്മയും പറഞ്ഞെങ്കിലും വേണ്ട എന്നായിരുന്നു അയാളുടെ മറുപടി. എന്നാൽ അഞ്ജുവിന്റെ പിടിവാശിക്കുമുന്നിൽ അയാൾ സമ്മതം മൂളി.

ഓട്ടോറിക്ഷ വിളിച്ച് അവർ ആശുപത്രിയിലേക്ക് യാത്ര തിരിച്ചു. 7 km ദൂരമുണ്ട് അവിടേക്ക്. അങ്ങനെ ആശുപത്രിയിൽ എത്തി ചെക്കപ്പ് ഒക്കെ കഴിഞ്ഞു. ECG യിൽ എന്തോ variation കണ്ടത്കൊണ്ട് അവിടെ അഡ്മിറ്റ് ചെയ്യേണ്ടിവന്നു.

” മീനു… നിക്കെന്തോ പേടി തോന്നുന്നു… ”

കേശവൻ മീനാക്ഷിയോട് പറഞ്ഞു.