❤️ തിരിച്ചറിവ് ❤️ [കുട്ടപ്പൻ] 1170

തന്നെ അവഗണിക്കുന്ന അഞ്ജു താൻ അവൾക്ക് സീറ്റ് തരപ്പെടുത്തി കൊടുത്തു എന്ന് അറിഞ്ഞാൽ അതും നിരസിക്കുമോ എന്നവൻ  ഭയന്നു. അതുകൊണ്ട് തന്നെയാണ് ഋഷി സാറിനെ വന്ന് കാണാൻ അവൻ തീരുമാനിച്ചതും

” സാർ ഞാൻ അരുൺ. അഞ്ജലിയുടെ റിലേറ്റീവ് ആണ്. ഒരു ഡോക്ടർ ആവുക എന്നത് അവളുടെ സ്വപ്നം ആണെന്ന് സാറിനറിയാമല്ലോ… ഞാൻ ഇവിടെ ടൗണിലെ മെഡിക്കൽ കോളേജിൽ സീറ്റ് തരപ്പെടുത്തിയിട്ടുണ്ട്. ഞങ്ങൾ അവൾക്ക് വേണ്ടി പണം ചെലവാക്കുന്നത് അവൾക്ക് ഇഷ്ടമല്ല എന്ന് പറഞ്ഞ് അവൾ പോകാൻ കൂട്ടാക്കുന്നില്ല.. സാർ അവളോട് ഒന്ന് സംസാരിക്കണം. എല്ലാം സാർ ആണ് ചെയ്തതെന്ന് അവളോട് പറയണം. അവളുടെ പഠനത്തിന്റെ ചെലവ് മുഴുവൻ ഞാൻ നോക്കിക്കോളാം. തത്കാലം അവൾ ഒന്നും അറിയണ്ട.. പ്ലീസ് സാർ. ”

അപ്പോൾ അങ്ങനെ പറയാനാണ് അവന് തോന്നിയത്.

ഒരു നല്ലകാര്യത്തിനായത് കൊണ്ട് ഋഷി സമ്മതം മൂളി.

താൻ എല്ലാ ചെലവും നോക്കിക്കോളാം അവിടെ ചേരണം എന്നൊക്കെ ഋഷി അവളെ പറഞ്ഞ് വിശ്വസിപ്പിച്ചു. അവളെ സമ്മതിപ്പിക്കുക എന്ന ജോലി മാത്രമേ അയാൾക്കുണ്ടായിരുന്നുള്ളു.

ആ വാർത്ത കേട്ട് അവൾ സന്തോഷത്തിന്റെ കൊടുമുടിയിലായിരുന്നു. കുഴിയെടുത്തു മണ്ണിട്ട് മൂടിയ ഡോക്ടർ ആവുക എന്ന അവളുടെ സ്വപ്നം വീണ്ടും മുളപൊട്ടി.

സന്തോഷത്തോടെയാണ് അവൾ വീട്ടിലേക്ക് കയറിയത്. ജാനകിയമ്മയെ കെട്ടിപ്പിടിച്ച് കവിളിൽ ഒരുമ്മ കൊടുത്തു പിന്നെ ഓടി മുകളിലെ മുറിയിലേക്ക് കയറി. അവിടെ അവളെ വരവേറ്റത് പുഞ്ചിരിച്ചുനിൽക്കുന്ന അരുൺ ആണ്. അതിന് പുച്ഛം നിറഞ്ഞ മറുചിരിയാണ് അവൾ തിരിച്ചുകൊടുത്തത്.

………….

അഞ്ജലി അരുണിനെ അവഗണിക്കുന്നത് ജാനകിയമ്മ ശ്രെദ്ധിച്ചിരുന്നു. ഒരിക്കൽ അവരത് അവനോട് ചോദിക്കുകയും ചെയ്തു. ഒന്നുമില്ല എന്ന് പറഞ്ഞ് അവൻ ഒഴിഞ്ഞു മാറിയെങ്കിലും ഇനിയും ഇത് തുടർന്നാൽ പിടിക്കപ്പെടും എന്നവന് ഉറപ്പായിരുന്നു. തന്റെ ഭാഗത്ത്‌ തെറ്റൊന്നും ഉണ്ടായിട്ടില്ല. കാരണം എന്താണെന്നും അറിയില്ല. അപ്പോൾ അമ്മ അവളെ കുറ്റപ്പെടുത്തിയാലോ എന്നവൻ ഭയന്നു. അവൻ അത്രയധികം അവളെ സ്നേഹിച്ചു തുടങ്ങിയിരുന്നു.

അതുകൊണ്ട് തന്നെ താൻ മാറിനിൽക്കുന്നതാണ് നല്ലതെന്ന് അവന് തോന്നി. അങ്ങനെ അവൻ വേണ്ട എന്ന് വച്ച ബാംഗ്ലൂരിലെ ജോലിക്ക് പോകാൻ തന്നെ അവൻ തീരുമാനിച്ചു. അവിടെ ജോയിൻ ചെയ്യാൻ ഇനിയും 4 മാസത്തോളം സമയമുണ്ട്. എന്നാലും പെട്ടന്ന് തന്നെ പോകാൻ അവൻ തയ്യാറെടുത്തു.