എന്റെ ആദ്യ  കഥ “ചെമ്പനീർപ്പൂവ് ”

ഏറ്റെടുത്തത്തിൽ ഒത്തിരി സന്തോഷം. പറയാൻ വാക്കുകൾ കിട്ടുന്നില്ല. തുടക്കക്കാരൻ എന്ന നിലയിൽ ഒരുപാട് തെറ്റുകൾ അതിൽ വന്നിട്ടുണ്ട്. അതൊക്കെ ക്ഷമിച് കൂടെ നിന്ന ഓരോരുത്തർക്കും എന്റെ ഹൃദയത്തിൽ നിന്നും നന്ദി അറിയിക്കുന്നു. ഇത് ഒരു കുഞ്ഞ് കഥയാണ്. ഇഷ്ടപ്പട്ടാലും ഇല്ലെങ്കിലും അഭിപ്രായം അറിയിക്കുമല്ലോ

തിരിച്ചറിവ്

Thiricharivu | Author : Kuttappan

നോക്കെത്താ ദൂരത്തോളം പച്ചപ്പട്ടണിഞ്ഞു കിടക്കുന്ന നെൽവയലുകൾ. ദൂരെ കാണുന്ന മലയുടെ പിന്നിൽനിന്നും കുങ്കുമവർണമണിഞ്ഞുകൊണ്ട് സൂര്യൻ എത്തിനോക്കുന്നു. നെൽചെടികളിൽ പറ്റിപ്പിടിച്ചുകിടക്കുന്ന മഞ്ഞുതുള്ളികൾ പ്രഭാതസൂര്യന്റെ പൊന്കിരണമേറ്റ് തിളങ്ങി.

വയലിനു കരയിൽ കൂടി ഒരു മൺപാതയാണ്. അതിൽകൂടി ഒരു പാൽകാരൻ സൈക്കിൾ ചവിട്ടി നീങ്ങുന്നു.

ദൂരെയെതോ അമ്പലത്തിൽ നിന്നുള്ള ഭക്തിസാന്ദ്രമായ സംഗീതം പതിഞ്ഞ ശബ്ദത്തിൽ ആ അന്തരീക്ഷത്തിൽ ഒഴുകി നടന്നു. ഇളംകാറ്റ് അവിടെയെങ്ങും ഓടിനടന്നു.

“മണിയൂർ” എന്ന ഗ്രാമത്തിലെ ഒരു പുലർക്കല കാഴ്ചയാണ്  നിങ്ങളിപ്പോ കണ്ടത്.

ദൂരെനിന്നും നടന്നുവരുന്നതാണ് നമ്മുടെ നായിക.അവളെപ്പറ്റി വർണിക്കുകയാണെങ്കിൽ…

കരിമഷിയെഴുതിയ നല്ല വിടർന്ന കടുംനീല കണ്ണുകളാണ് അവൾക്ക്. അതിന് മുകളിൽ വില്ലുപോലുള്ള പുരികവും. അല്പം ഉയർന്ന നീണ്ട മൂക്ക്. അതിൽ ഒരു കുഞ്ഞ് കല്ല് വച്ച മൂക്കുത്തിയുണ്ട് അത് സൂര്യന്റെ കിരണമേറ്റ് തിളങ്ങി. ഇളം ചുവപ്പ് നിറമാർന്ന ചുണ്ടുകളിൽ നിറഞ്ഞുനിൽക്കുന്ന പുഞ്ചിരി.

നെറ്റിയിൽ ചന്ദനം ചാർത്തിയതിനു പുറമേ ഒരു കറുത്ത കുഞ്ഞ് പൊട്ടും കുത്തിയിട്ടുണ്ട്.

തുളസിക്കതിർ ചൂടിയ അരയൊപ്പമുള്ള കേശഭാരം വിടർത്തിയിട്ടിരിക്കുന്നു.അതിൽനിന്നും ഇപ്പോഴും ജാലകണങ്ങൾ ഇറ്റുവീണുകൊണ്ടിരിക്കുന്നു.

കടഞ്ഞെടുത്ത ശരീരമാണവൾക്ക്. അതോരു ചന്ദനനിറമാർന്ന ധാവണിയിൽ പൊതിഞ്ഞിരിക്കുന്നു. കയ്യിൽ വാഴയിലക്കീറിൽ അമ്പലത്തിൽ നിന്നുകിട്ടിയ പ്രസാദം.കാലിൽ ഒരു വെള്ളിക്കൊലുസ്. താളത്തിലുള്ള അവളുടെ നടത്തിനനുസരിച്ച് കൊലുസ്സിലെ മണികൾ കിലുങ്ങി ചെറിയ ശബ്ദമുണ്ടാക്കുന്നുണ്ട്.

ചുരുക്കിപ്പറഞ്ഞാൽ മണിയൂരിന്റെ പ്രകൃതിസൗന്ദര്യം പോലെ അതിമനോഹരിയായ ഒരു നാടൻ പെൺകുട്ടി. അവൾ അഞ്ജലി.