പ്രാണേശ്വരി (climax) [പ്രൊഫസർ ബ്രോ] 736

“ഉറക്കം വരുന്നില്ല… ഞങ്ങൾ ഒന്ന് കറങ്ങിയിട്ട് വന്നോളാം”

“എടാ ചെക്കാ കളിക്കല്ലേ… അരമണിക്കൂറിനുള്ളിൽ ഇവിടെ എത്തിയില്ലെങ്കിൽ ഞാൻ പറയാം, അവൻ ഇന്നലെ രാത്രി മുതൽ വണ്ടി ഓടിക്കുന്നതാ ഉറങ്ങിയിട്ടില്ല”

“ആ.. ശരി വരുവാ ”

ഞാൻ ഫോൺ കട്ട്‌ ചെയ്തപ്പോൾ ഉണ്ണിയേട്ടൻ ഇരുന്ന് ചിരിക്കുന്നുണ്ട്,

“എന്താടോ കിളവാ… ”

“ഏയ്യ്… എനിക്ക് ഒരാളുടെ വഴക്ക് കേട്ടാൽ മതി… ഞാൻ നിന്റെ കാര്യം ആലോചിച്ചു നോക്കിയതാ.. ”

സംഭവം സത്യമായത് കൊണ്ട് എനിക്കൊന്നും മിണ്ടാനും പറ്റിയില്ല, ആ പൂതനയുടെ സ്വഭാവം അറിയാവുന്നതുകൊണ്ട് ഞങ്ങൾ അപ്പോൾ തന്നെ തിരിച്ചുപോയി.

വീട്ടിൽ എത്തുമ്പോൾ ഒരുമാതിരി ആളുകൾ ഒക്കെ പോയിരുന്നു, അച്ഛനും ഒരു മാമനും കൂടി എന്തൊക്കെയോ സംസാരിക്കുന്നുണ്ട്. സ്ത്രീജനങ്ങൾ എല്ലാം കിടന്നു എന്ന് തോന്നുന്നു ഒരു റൂമിൽ നിന്നും കലപില കേൾക്കുന്നുണ്ട്… നാട്ടിലുള്ള ആളുകളുടെ മുഴുവൻ കുറ്റം പറഞ്ഞ് കഴിഞ്ഞാലല്ലേ അവർക്ക് ഉറങ്ങാൻ പറ്റൂ…

എന്റെ റൂമിൽ പിന്നെ ആരും ഉണ്ടായിരുന്നില്ല, ഇന്നത്തെ ദിവസം അവിടെ ആരും കിടക്കാൻ മാളു സമ്മതിച്ചുകാണില്ല

ഞാനും ഉണ്ണിയേട്ടനും ഉരുമിച്ചാണ് കിടന്നത്… മാളു പറഞ്ഞത് സത്യമായിരുന്നു ഉണ്ണിയേട്ടന് നല്ല ഉറക്കക്ഷീണം ഉണ്ടായിരുന്നു പുള്ളി കിടന്നതും കൂർക്കം വലിക്കാൻ തുടങ്ങി

ഞാൻ പിന്നെയും ഓരോന്ന് ആലോചിച്ച് കിടന്ന് പയ്യെ ഉറങ്ങാൻ തുടങ്ങിയതും പൂമ്പാറ്റ എഴുന്നേറ്റു കരയാൻ തുടങ്ങി… അങ്ങനെ എന്റെ ഉറക്കം ഹുദാ ഹവാ….

എപ്പോഴോ എങ്ങനെയോ കിടന്നുറങ്ങിയ എന്നെ മാളുവാണ് കുത്തിപ്പൊക്കുന്നത്, അടുത്ത് ഉണ്ണിയേട്ടൻ കിടന്നുറങ്ങുന്നുണ്ട്, മാളുവിന്റെ കയ്യിൽ ഒരു കപ്പും ടേബിളിൽ ഒരു കപ്പും ഇരിപ്പുണ്ട്

“ഡാ… സമയം പോയി എഴുന്നേൽക്ക്… ഇതാ ചായ കുടിക്ക്… ”

“അപ്പൊ ഉണ്ണിയേട്ടനോ… ”

“അതൊക്കെ ഞാൻ എഴുന്നേല്പിച്ചോളാം നീ പോകാൻ നോക്ക് ”

എനിക്ക് പെട്ടന്ന് ഉണ്ണിയേട്ടൻ ആശുപത്രിയിൽ കിടന്നപ്പോഴുള്ള കാര്യമാണ് ഓർമവന്നത്,

“ഓഹ്‌… ശരി ശരി നടക്കട്ടെ… ഞാൻ പോയേക്കാമെ… ”

അത് പറഞ്ഞിട്ട് ഇറങ്ങി പുറത്തേക്ക് നടന്നപ്പോഴേ തലക്കിട്ടു ഒരു കൊട്ട് കിട്ടി. ഞാൻ ഇറങ്ങി റൂമിന് പുറത്തു എത്തിയതും എന്റെ പിന്നിൽ വാതിൽ അടഞ്ഞു

അപ്പോഴാണ് ഞാൻ മേശയിൽ ഇരുന്ന് ഇഡ്ഡലി കഴിക്കുന്ന കുഞ്ഞാറ്റയെ കണ്ടത്, ഞാൻ വീണ്ടും ചെന്ന് കതകിൽ കൊട്ടിയാൽ അവൾ എന്നെ കൊല്ലും എന്നുറപ്പാണ് കുഞ്ഞാറ്റയായാൽ കുഴപ്പമില്ലല്ലോ

“കുഞ്ഞാറ്റെ… നിന്നെ ആന്റി വിളിക്കുന്നുണ്ട്… പെട്ടന്ന് ചെന്നാൽ മഞ്ച് തരാന്ന്… മാമന്റെ റൂമിലുണ്ട് ”

മഞ്ചെന്നു കേട്ടതും പെണ്ണ് ഇഡ്ഡലി കഴിപ്പൊക്കെ നിർത്തി ഇറങ്ങി, കുഞ്ഞാറ്റ വാതിലിൽ കൊട്ടാൻ തുടങ്ങിയതും ഞാൻ ഇറങ്ങി ഓടി…