പ്രാണേശ്വരി (climax) [പ്രൊഫസർ ബ്രോ] 736

ഞാൻ ഇരുന്ന് വിയർക്കാൻ തുടങ്ങി, മുൻപിൽ തന്നെയുണ്ട് എന്റെ കൂട്ടുകാർ തെണ്ടികൾ, എന്നെ നോക്കി എന്തൊക്കെയോ പറയുന്നുണ്ട് അതിനിടക്ക് എന്നെ നോക്കി കളിയാക്കും

ഇറങ്ങിപ്പോയാലോ എന്ന് വരെ ഒരു നിമിഷം ചിന്തിച്ചു,, ഉണ്ണിയേട്ടനും എവിടെ പോയെന്ന് അറിയില്ല… ആകെ ഒരു മരുഭൂമിയിൽ ഒറ്റപ്പെട്ട അവസ്ഥ എന്ത് ചെയ്യണം എന്നറിയില്ല

എന്റെ അടുത്തിരുന്നു പൂജാരി എന്തൊക്കെയോ ചെയ്യുന്നുണ്ട്, സമയം പോകുന്തോറും എന്റെ ടെൻഷൻ കൂടാൻ തുടങ്ങി

ഹാവൂ… ആ സമയം വന്നെത്തി അമ്മായിമാരുടെയും ദുർഗെയുടെയും മുന്നിലായി സ്വർണ കരയുള്ള സെറ്റ് സാരിയിൽ നടന്നു വരുന്ന ലച്ചു.സാധാരണയിൽ നിന്ന് വിപരീതമായി മുഖത്തു കുറച്ചു മേക്കപ്പ് ഒക്കെ ഉണ്ട് ക്യാമറയിൽ തിളങ്ങാൻ വേണ്ടി ആകും, കരിമഷി വരച്ച കണ്ണുകൾ,  സ്വതവേ ചുവന്ന ചുണ്ടുകൾക്ക് ചുവപ്പ് കൂട്ടാനെന്നോണം ലിപ്സ്റ്റിക്ക് ഉപയോഗിച്ചിരിക്കുന്നു,ആ ചെറിയ മൂക്കിൽ തിളങ്ങുന്ന മൂക്കുത്തി,കാതിൽ കുറച്ചു വലിപ്പമുള്ള ജിമിക്കി കമ്മൽ, കഴുത്തിൽ തിളങ്ങുന്ന നെക്ലെസ്,മൈലാഞ്ചി ഇട്ട് ചുവപ്പിച്ചിരിക്കുന്ന കൈകളിൽ അവളുടെ നടപ്പിനൊപ്പിച്ചു കിലുങ്ങുന്ന വളകൾ, കയ്യിൽ ഏന്തിയിരിക്കുന്ന തളികയിൽ ഫലവര്ഗങ്ങളും കണ്ണാടിയും,  ഒരു മുറി തേങ്ങയിൽ എണ്ണയിട്ടു തിരി തെളിയിച്ചിരിക്കുന്നു

“ടാ…ടാ… നേരെ നോക്കടാ… ”

ഉണ്ണിയേട്ടൻ ചെവിയിൽ പറഞ്ഞത് കെട്ടാണ് ഞാൻ ലച്ചുവിൽ നിന്നും കണ്ണ് പരിക്കുന്നത്, ഇയാളിതെപ്പോ വന്നോ എന്തോ…, നേരെ നോക്കിയപ്പോൾ കാണുന്നത് എന്നെ നോക്കി കളിയാക്കി ചിരിക്കുന്ന നാട്ടുകാരെയും എന്റെ നല്ലവരായ കൂട്ടുകാരെയും… എല്ലാവരുടെയും മുൻപിൽ അന്തസായി നാണം കെട്ടു

മണ്ഡപത്തിനു അടുത്തെത്തിയ ലച്ചു മണ്ഡപത്തിനു വലം വച്ച് സദസ്സിനെ വന്ദിച്ചു എന്റെ അരികിലായി വന്നിരുന്നു, ആ മുഖത്തേക്ക് ഒന്ന് നോക്കണം എന്നുണ്ട് പക്ഷെ ആകെ ഒരു ടെൻഷൻ

പിന്നെ ഓർത്തപ്പോൾ ആരൊക്കെ എന്തൊക്കെ പറഞ്ഞാലും നമുക്കെന്താ… ഞാൻ നോക്കുന്നത് എന്റെ പെണ്ണിനെയല്ലേ… അപ്പോ തന്നെ തല ചെരിച്ച് അവളെ നോക്കി

“ലച്ചൂസേ… ”

പെണ്ണ് മിണ്ടാത്തെ ഇരിക്കുകയാണ്

“ലച്ചൂ… നിനക്ക് ടെൻഷൻ ഉണ്ടോ ”

“ഹ്മ്മ്”

അവൾ എന്റെ മുഖത്തു നോക്കാതെ തന്നെ മൂളി

“എനിക്കും…. ”

“ഹ്മ്മ്”

അതിനും മൂളൽ തന്നെയായിരുന്നു മറുപടി

“ഇതാ ചന്ദനം തൊട്ടുകൊള്ളൂ…”

പൂജാരി രണ്ടുപേരുടെയും കയ്യിലായി ചന്ദനം തന്നു, നമുക്ക് മുൻപരിചയം ഒന്നും ഇല്ലല്ലോ… എന്റെ കയ്യിൽ കിട്ടിയ ചന്ദനം ഞാൻ ലച്ചുവിന്റെ നെറ്റിയിൽ ചാർത്താൻ തുടങ്ങി

“അതിനൊക്കെ പിന്നെ സമയം താരാടോ… ഇപ്പൊ സ്വന്തമായി തൊട്ടാൽ മതി ”

തിരുമേനി ട്രോളിയതോടു കൂടി എല്ലാവരും നന്നായി തന്നെ ചിരിച്ചു, ലച്ചുവിന്റെ മുഖത്തുമുണ്ട് നാണത്തിൽ കുതിർന്ന ഒരു ചിരി