പ്രണയ നൊമ്പരം [മനൂസ്] 3008

ഒരു പുഞ്ചിരിയാണ് അതിന് അവൾ എനിക്ക് തന്ന മറുപടി..
കട്ടിലിലെ അവളുടെ ആ കിടപ്പ് എന്നിലുള്ള സംശയങ്ങളെ കൂട്ടി..എന്താണ് നടക്കുന്നതെന്ന് മനസ്സിലാകാതെ ഞാൻ ഭിത്തി ചാരി നിന്നു..അവളുടെ അമ്മയുടെ തേങ്ങലുകൾ എന്റെ കാതുകളിൽ പതിച്ചു…

സംശയത്തോടെ ഞാൻ സിസ്റ്ററെ നോക്കി…..

“ഒന്ന് കാണാൻ ആഗ്രഹം ഉണ്ടായിരുന്നു…. കുറെ നാളായില്ലേ കണ്ടിട്ട്….. ഈ അവസ്ഥയിൽ എനിക്ക് അവിടെ വരാൻ പറ്റില്ലല്ലോ…. അതാ അങ്ങോട്ട്‌ ആളെ പറഞ്ഞുവിട്ട് വിളിപ്പിച്ചത്…. ബുദ്ധിമുട്ടായോ…”
പുഞ്ചിരിയോടെ അവൾ അത് ചോദിച്ചപ്പോ എനിക്ക് നൽകാൻ ഉത്തരമില്ലായിരുന്നു ..

ഒരു നേർത്ത പുഞ്ചിരികൊണ്ടു ഞാൻ അവളുടെ ചോദ്യത്തെ നേരിട്ടു..

അപ്പോഴും എന്റെ മനസ്സ് സംശയങ്ങൾ നിറഞ്ഞതായിരുന്നു….

“ദേഷ്യായി അല്ലെ എന്നോട്…. അരക്ക് താഴോട്ട് തളർന്ന് പോയ ഒരു പെണ്ണിന്റെ  ആഗ്രഹങ്ങളിൽ ഒന്നായി കണ്ട് ക്ഷമിക്കു കേട്ടോ….”

പുഞ്ചിരി മായാതെയുള്ള അവളുടെ വാക്കുകളിൽ അറിയാതെ എന്റെ മനസ്സ് വേദനിച്ചു..

അവളെ ചെറുതായിട്ടെങ്കിലും വെറുപ്പോടെ കണ്ട നാളുകളെ ഓർത്ത് എന്നിൽ കുറ്റബോധം നിറഞ്ഞു..
ഒരു പാവം പെണ്കുട്ടിയുടെ ഈ അവസ്ഥ മനസ്സിനെ വല്ലാതെ തളർത്തി..കണ്ണിൽ അറിയാതെ നനവ്‌ പടർന്നു..

“എന്താ മാഷേ കണ്ണൊക്കെ നിറയുന്നെ…..  ശത്രുവിന്റെ ഈ അവസ്‌ഥ കണ്ടിട്ട് സഹതാപം തോന്നുന്നോ….”
കുട്ടിത്തം നിറഞ്ഞ മുഖത്തോടെ അവൾ അത് ചോദിച്ചപ്പോൾ ശരിക്കും ഞാൻ ഞെട്ടിയിരുന്നു…

“ഞെട്ടണ്ട…. ഞാൻ അവിടെ വന്നു കുട്ടികളോടൊപ്പം കളിക്കുമ്പോഴും സംസാരിക്കുമ്പോഴും മാഷിന്റെ ആ ദേഷ്യവും കുശുമ്പും നിറഞ്ഞ മുഖം ഒരുപാട് തവണ കണ്ടിട്ടുണ്ട്…അത് കാണാൻ നല്ല
ചേലാരുന്നു കേട്ടോ..

മാഷ് പലപ്പോഴും ആഗ്രഹിച്ചിട്ടില്ലേ എന്റെ അങ്ങോട്ടുള്ള വരവ് നിന്നിരുന്നെങ്കിൽ എന്ന്..അത് കർത്താവ് കേട്ടു കേട്ടോ…. അതാ ഇങ്ങനെ….”

ഒരു കുണുങ്ങി ചിരിയോടെ അവൾ അത് പറഞ്ഞപ്പോൾ പിടഞ്ഞത് എന്റെ നെഞ്ചാണ്.
കാരണം അവൾ പറഞ്ഞത് മുഴുവൻ സത്യമാണ്,, ഞാൻ അങ്ങനെ ആഗ്രഹിച്ചിരുന്നു ,,പലവട്ടം..

അവളെ വേണ്ടത്ര ശ്രദ്ധിച്ചിരുന്നില്ലെങ്കിലും അവൾ ദൂരെ നിന്നേ എന്നെ മനസ്സിലാക്കിയിരുന്നു എന്നത് എന്നെ തെല്ലൊന്നു അത്ഭുതപ്പെടുത്തി..

“അത്… ഞാൻ…..”

വിക്കി വിക്കി അവ്യക്തമായി എന്തോ ഞാൻ പറഞ്ഞു തുടങ്ങിയപ്പോഴേക്കും അവൾ അതിനെ തടഞ്ഞു..

“വേണ്ട വേണ്ട….. ഇനി കള്ളം ഒന്നും പറഞ്ഞു ബുദ്ധിമുട്ടണ്ട കേട്ടോ…. ചെറിയ ദേഷ്യം ഉണ്ടെങ്കിലും മാഷ് എനിക്കൊന്നും പറ്റാൻ വേണ്ടി പ്രാർത്ഥിക്കില്ല എന്നെനിക്കറിയാം….”

ഒരു ചെറു പുഞ്ചിരി അവൾക് മറുപടിയായി ഞാൻ നൽകി..