ഫ്രണ്ട്സ്…. വീണ്ടും ഒരു തുടർക്കഥ ആയിട്ട് വരുവാണ്…  പരിചയമില്ലാത്ത മേഘലയിലാണ് കൈവച്ചിരിക്കുന്നത്… പോരായ്മകളും തെറ്റുകളും ഒരുപാട് ഉണ്ടാകും… മുന്നോട്ടുള്ള പ്രയാണത്തിൽ തെറ്റുകളും കുറവുകളും ചൂണ്ടിക്കാട്ടി  കൂടെ നിൽക്കുമെന്ന് പ്രതീക്ഷിക്കുന്നു……

ശ്രാവണി 1

Sravani | Author : Shana

“ദീപം… ദീപം..”

തൃസന്ധ്യ നേരത്ത് കാറ്റുപോലും കടന്നു വരാത്ത കാവിനുള്ളിലേക്ക് അവൾ നടന്നുവന്നു കയ്യിൽ കരുതിയ എള്ളെണ്ണ നിറച്ച ഓട്ടു പാത്രത്തിൽ നിന്നും കൽവിളക്കിലേക്ക് എണ്ണ പകർന്നു..തിരി കൊളുത്തി കുടുംബത്തിന്റെ ഐശ്വര്യത്തിന് വേണ്ടി പ്രാർത്ഥിച്ചു.. തെക്കേ പറമ്പിലെ ആഞ്ഞിലിയുടെ ചുവട്ടിലേക്കു നടന്നു അവിടെയാണ് ബ്രഹ്മനെയും മറുതയെയും കുടിയിരുത്തിയിരിക്കുന്നത്.. ആഞ്ഞിലി നിറയെ പഴുത്തു തൂങ്ങി നിൽക്കുന്ന ചക്കകളാണ്.. മുകളിലേക്കു നോക്കി കൊതിക്കാമെന്നല്ലാതെ ഒരു ചുളപോലും തരില്ല അണ്ണാറകണ്ണന്മാർ.. ആരോടെന്നില്ലാതെ പരിഭവം പറഞ്ഞു പഴുത്തു വിളഞ്ഞ ആഞ്ഞിലി ചക്കയുടെ സുഗന്ധം മൂക്കിലേക്ക് അടിച്ചു കയറി,  മുകളിലേക്കു നോക്കി മുന്നോട്ടു നടന്നപ്പോൾ എന്തിലോ കയറി ചവിട്ടി.. ചെറിയൊരു വഴുക്കൽ താഴേക്കു നോക്കുന്നതിനുള്ളിൽ പെരുവിരലിൽ കടിച്ചു പല്ലുകളാഴ്ത്തികഴിഞ്ഞിരുന്നു  കരിനാഗം…

“അമ്മേ”…… അവള്‍ അലറി വിളിച്ചു..

കയ്യിലെ കുത്തു വിളക്കും എണ്ണയും താഴേക്കു ഊര്‍ന്നു പോയി.. മരണം മുന്നില്‍ കണ്ടു ഭയന്ന അവള്‍ ഉറക്കെ കരഞ്ഞു വീട്ടിലേക്കു തിരിഞ്ഞു ഓടി…

കോലോത്തെ ഉമ്മറത്തേക്ക് ഓടി കയറുമ്പോഴേക്കും തളര്‍ന്നു വീണു.. ആരും വിളി കേള്‍ക്കുന്നില്ല.. അവള്‍ക്കു തൊണ്ട വരണ്ടുണങ്ങിയതുപോലെ. ദേഹമാസകലം തളരുന്നു. അവള്‍ തന്നാലാവും വിധം ഉറക്കെ കരഞ്ഞു വിളിച്ചു.

അമ്പലത്തില്‍ പത്തു ദിവസത്തെ ഉത്സവം നടക്കുകയാണു കുടുംബക്കാരെല്ലാം അങ്ങോട്ട് പോയിരിക്കാണ്. കണ്ണ് കാണാത്ത മുത്തശ്ശിയും താനും മാത്രം അവിടെ ഉണ്ടായിരുന്നുള്ളൂ. അവളുടെ കണ്ണിലേക്കു ഇരുട്ടു കേറിത്തുടങ്ങി.. ശ്വാസം നിലച്ചു കൊണ്ടിരുന്നു പെട്ടെന്നാരോ എടുത്തുയര്‍ത്തി തിണ്ണയിലേക്ക് കിടത്തി പെരുവിരലില്‍ ചെറിയ മുറിവുണ്ടാക്കി വായിലേക്ക് വച്ചു ഒന്നുരണ്ടു വട്ടം ശക്തിയായി വലിച്ചു. കട്ട പിടിച്ച നീല രക്തം മുറ്റത്തെ മണലിലേക്ക് നീട്ടി തുപ്പി… മുണ്ടിന്റെ കൊന്തല കീറി കാലില്‍ രണ്ടിടത്തായി കെട്ടി… ചുറ്റും ആളുകള്‍ ഓടി കൂടുന്നുണ്ട്.. ആരൊക്കെയോ കരയുന്ന ശബ്ദം കേള്‍ക്കാം… ജനിസ്മൃതികളില്‍ എന്ന വണ്ണം അവളുടെ മനസ്സിലേക്ക് വീണ്ടും ആ രംഗങ്ങള്‍ കടന്നു വന്നു… എസി കേബിനില്‍ കിടന്നും അവള്‍ വിയര്‍ത്തു…

ഞെട്ടി ഉണര്‍ന്ന അവള്‍ ചുറ്റും നോക്കി. താന്‍ ഇപ്പോള്‍ ട്രെയിനിലാണ് ഉള്ളതെന്നു തിരിച്ചറിയാന്‍ അവള്‍ക്കു നിമിഷങ്ങള്‍ വേണ്ടിവന്നു. ജൂണ്‍ മാസത്തിലെ മഴ പുറത്തു തകര്‍ത്തു പെയ്യുകയാണ്, സഹ്യന്റെ മടിത്തട്ടിലൂടെ ആടിയുലഞ്ഞുള്ള ട്രെയിനിന്റെ സഞ്ചാരത്തിനൊപ്പം സുനന്ദയുടെ മനസില്‍ താന്‍ കണ്ട