ഒരു വേശ്യയുടെ കഥ – 16 4015

” അയ്യടാ എന്നെ കാണുമ്പോൾ അങ്ങനെയൊന്നും തോന്നില്ല ……
ഞാൻ കുളിച്ച് മുടി വിടർത്തിയിടുന്നതു കാണുമ്പോൾ ആറാം തമ്പുരാനിലെ മഞ്ജുവാര്യരെപോലെ ഉണ്ടെന്നാണല്ലോ എൻറെ അനിയേട്ടൻ എപ്പോഴും പറഞ്ഞിരുന്നത് …….!”

ഗർവ്വു കലർന്ന ചിരിയോടെയാണ് മറുപടി.

“അനിയേട്ടൻ കണ്ണടയില്ലാതെ കണ്ടതായിരിക്കും
എല്ലാവർക്കും അങ്ങനെ തോന്നണമെങ്കിൽ കണ്ണു പൊട്ടന്മാരായിരിക്കണം …..”

അവളെ പ്രകോപിപ്പിക്കുവാനായി അയാൾ പിറുപിറുത്തു.

” ശരിക്കും എന്നെ കണ്ടാൽ യക്ഷിയെ പോലെയുണ്ടോ …….
സത്യം പറ…….”

കണ്ണാടിയിലൂടെ മുഖത്തേക്ക് നോക്കി ചിരിച്ചുകൊണ്ടാണ് ചോദ്യം.

“ഞാനിതുവരെ യക്ഷിയെ നേരിട്ടു കണ്ടിട്ടില്ല…. പറഞ്ഞതും വായിച്ചുകേട്ടതുമൊക്കെ വച്ചുനോക്കുമ്പോൾ ഏകദേശം ഇതുപോലെ തന്നെയാണെന്നാണ് തോന്നുന്നതു……”

കണ്ണാടിയിൽ നോക്കി കണ്ണിറുക്കി ചിരിച്ചു കൊണ്ട് മറുപടിയും കൊടുത്തു .

“വെറുതെയല്ല അനിയേട്ടന്റെ അച്ഛനുമമ്മയും എൻറെ മോനെ വളച്ചെടുത്ത യക്ഷി എന്നൊക്കെ പറയുന്നതല്ലേ ……
ഇപ്പോഴാണ് എനിക്ക് കാര്യം പിടി കിട്ടിയത്…….”

ഈറൻ കലർന്ന സ്വരത്തിലാണ് അവൾ പറഞ്ഞത് .

“ഞാൻ യക്ഷിയെ പോലെയൊന്നുമല്ല…. ചോരയും നീരുമൂറ്റിക്കുടിക്കുന്ന കുറെ ആളുകൾ എന്റെ ചോരയും നീരും ഊറ്റികുടിച്ചതല്ലാതെ ഞാൻ ഇതുവരെ ആരുടെയും ചോരയൂറ്റി കുടിച്ചിട്ടില്ല …….
ഇനി കുടിക്കുകയുമില്ല…..
ഉറപ്പാണ്…….”

തൊട്ടുപിറകെ അവൾ സ്വയം സമാധാനിക്കുന്നത് കേട്ടപ്പോൾ വിഷമം തോന്നി.

” സാധാരണ യക്ഷികൾ കഴുത്തു കടിച്ചു പൊട്ടിച്ചു ചോരയൂറ്റിക്കുടിക്കുകയാണെങ്കിൽ നീയെന്ന യക്ഷി എന്റെ ഹൃദയത്തിൽ കുടിയേറി ഹൃദയരക്തം വലിച്ചുകുടിച്ചുകൊണ്ടിരിക്കുകയാണെന്നു അവളോട്‌ പറയണമെന്നുണ്ടായിരുന്നെങ്കിലും അവസാനം അയാൾ വേണ്ടെന്നുവച്ചു ……!