ഒരു പ്രണയ കഥ [മാലാഖയുടെ കാമുകൻ] 2177

ഞാൻ അവളെ മുറുകി പിടിച്ചിരുന്നു.. എന്റെ മുൻപിലുള്ള എയർ ബാഗ് തുറന്നു വന്നിരുന്നു..

ഗിയറിന്റെ മുകളിലേക്ക് കമിഴ്ന്നു വീണു കിടന്ന അശ്വിനിക്ക് അനക്കം ഒന്നും ഇല്ലായിരുന്നു..

എന്റെ തോളിൽ കൂടി കയറിയ മരക്കമ്പു കാരണം എനിക്ക് അനങ്ങാൻ കൂടി പറ്റുന്നില്ലായിരുന്നു.. മൊത്തം ഒരു മരവിപ്പ്…

രണ്ടു മൂന്ന് പേര് വന്നു അവളുടെ ഭാഗത്തെ ഡോർ തുറന്നു അവളെ വലിച്ചു എടുത്തു..

എനിക്ക് അനങ്ങാൻ പോയിട്ട് സംസാരിക്കാൻ പോലും കഴിയുന്നില്ലായിരുന്നു…

ഫയർഫോഴ്സ് വരാൻ ഏകദേശം 30 മിനുട് എടുത്തു.. അവർ വന്നു മരക്കമ്പു അറുത്തു മാറ്റി എന്നെ പുറത്തു എടുത്തു..

നല്ല വേദന ഉണ്ടായിരുന്നു…

“അശ്വിനി എവിടെ?”

ഞാൻ ഒരു പോലീസുകാരനോട് ചോദിച്ചു..

“ഒപ്പം ഉണ്ടായിരുന്ന കൊച്ചല്ലേ? തല ചെറുതായി പൊട്ടിയിട്ടുണ്ട്… ഹോസ്പിറ്റലിൽ അവർ തന്നെ കൊണ്ടുപോയി…”

എനിക്ക് സമാധാനം തോന്നി.. അവൾക്ക് കാര്യമായി ഒന്നും പറ്റിയില്ലല്ലോ..

എന്നെ ഹോസ്പിറ്റലിൽ എത്തിച്ചു. മയക്കിയിട്ടാണ് അവർ മരക്കമ്പ് എടുത്തു മാറ്റിയത്.. വേഗം തന്നെ ബോധം തെളിയുകയും ചെയ്തു..

എന്നെ റൂമിലേക്ക് മാറ്റി.. ഒപ്പം ഒരാൾ ഉണ്ടായിരുന്നു. നഴ്സുമാർ പോയിക്കഴിഞ്ഞും ആയാൾ അവിടെ നിന്നു..

കാണാൻ ഭംഗി ഉള്ള ഒരാൾ.. നല്ല വേഷം. ആദ്യം ഡോക്ടർ ആണെന്ന് ആണ് ഞാൻ വിചാരിച്ചത്..

“അവൾ എടുത്തു ചാടി അല്ലെ? പുറകിൽ വന്ന വണ്ടിക്കാർ ഇപ്പൊ പോയെ ഉള്ളു….”

അയാൾ ഒരു കസേര വലിച്ചു ഇരുന്നു.. ഞാൻ ഒന്നും മിണ്ടിയില്ല.

“നല്ല വാശി ഉള്ള കുട്ടി ആണ്.. മച്യുരിറ്റി ഇല്ല.. അവൾ ആഗ്രഹിച്ചത് അവൾക്ക് കിട്ടണം എന്ന വാശി.. വെറും പൊട്ടി ആണ് അത്.. “

അയാൾ വീണ്ടും പറഞ്ഞു..

“എന്നെ മനസിലായില്ല അല്ലെ? ഞാൻ അവളുടെ പപ്പ ആണ്…”

ആയാൾ അതും കൂടി കൂട്ടിച്ചേർത്തു… എന്നിട്ടു എന്നെ നോക്കി ചിരിച്ചു..

ഞാനും ഒന്ന് പുഞ്ചിരിച്ചു. അവളുടെ ഹീറോ ആണ് പപ്പ.. എന്തിനും ഏതിനും ഒപ്പം നിൽക്കുന്ന പാർട്ണർ ഇൻ ക്രൈം…

“അജു……!”

എന്നൊരു പൊട്ടിക്കരച്ചിലോടെ അശ്വിനി റൂമിലേക്ക് ഓടിക്കയറി വന്നു എന്റെ നെഞ്ചിലേക്ക് വീണു..

അവൾ അവിടെ കിടന്നു ഏങ്ങൽ അടിച്ചു കരയാൻ തുടങ്ങി… നെറ്റിയിൽ ഒരു ചുറ്റികെട്ട് ഉണ്ട് അവൾക്ക്..

“മോളെ.. നീ എന്താ ഈ കാണിച്ചത്? ചോര വരുന്നത് കണ്ടില്ലേ?”

പപ്പ വേഗം അവളെ പിടിച്ചു മാറ്റി.. അവൾ വീണ വീഴ്ചയിൽ എന്റെ മുറിവ് ഇളകിയിരുന്നു..

എനിക്ക് വേദന ഒന്നും തോന്നിയില്ല.. അതിശയം ആയിരുന്നു.. ഈ പെണ്ണ് എന്തൊരു ആഴത്തിൽ ആണ് എന്നെ സ്നേഹിക്കുന്നത് എന്ന അതിശയം..

എന്നാൽ ഒരു കൊച്ചു കുട്ടിയെപ്പോലെ ആണ് അവൾ.. എല്ലാത്തിനും ആലോചിക്കാതെ പ്രതികരിക്കുന്ന.. ആഗ്രഹിക്കുന്നതൊക്കെ നേടാൻ ഏതു അറ്റം വരെയും പോകുന്ന ഒരു കുറുമ്പി… എന്റെ ചുണ്ടിൽ ഒരു പുഞ്ചിരി വിടർന്നു..

അവൾ പപ്പയുടെ നെഞ്ചിൽ കിടന്നു കരയുകയാണ്..