ഒരു പ്രണയ കഥ [മാലാഖയുടെ കാമുകൻ] 2173

വളർത്തി വലുതാക്കിയ അമ്മ ഒന്ന് തെറ്റിദ്ധരിച്ചെങ്കിൽ അതിൽ എന്താ ഇത്ര തെറ്റ്? അടി കിട്ടിയാൽ എന്താ? അമ്മ അല്ലെ? എനിക്ക് അമ്മ അല്ലാതെ വേറെ ആരാ ഉണ്ടാവുക?

ഞാൻ റൂം തുറന്നു പുറത്തിറങ്ങി.. ബാത്‌റൂമിൽ പോയി കുളിച്ചു വന്നു.

അമ്മ അടുക്കളയിൽ ഉണ്ടായിരുന്നു എങ്കിലും എനിക്ക് മിണ്ടാൻ ഒരു മടി..
എങ്ങനെ മിണ്ടും?

ഞാൻ ഡ്രസ്സ് മാറി പുറത്തു വന്നു.. അമ്മ ഭക്ഷണം വിളമ്പി വച്ചിട്ടുണ്ട്..

“അജു.. വന്നു കഴിക്ക്…”

അമ്മ ഉറച്ച ശബ്ദത്തിൽ പറഞ്ഞു..

“എനിക്ക് വേണ്ട…”

പോകണം എന്ന് ഉണ്ടായിരുന്നെങ്കിലും എനിക്ക് അങ്ങനെ പറയാൻ ആണ് തോന്നിയത്..

അമ്മ അടുത്ത് വരുന്നത് കണ്ടു..

കിട്ടി ഒരെണ്ണം മുഖത്തിന്… അധികം വേദന തോന്നിയില്ല.. എന്നാലും കവിൾ പൊത്തിപിടിച്ചു ഞാൻ അമ്മയെ നോക്കി..

“പോയി ഇരിക്കടാ അവിടെ….നിന്നെയൊക്കെ ഇത്ര ആക്കാൻ അറിയാമെങ്കിൽ എനിക്ക് ഇതും അറിയാം…”

അമ്മ കൈ മേശയിലേക്ക് ചൂണ്ടി… ഇരുന്നില്ലെങ്കിൽ അടുത്തതും കിട്ടും.. ഭദ്രകാളി കേറിയ ഭാവം.. ഉടക്കാൻ നിന്നാൽ ഇന്ന് ഞാൻ കുറെ വാങ്ങും.. വേണ്ട… ഞാൻ ചെന്നു ഇരുന്നു..

അമ്മ നല്ല ഇഡലിയും ആവി പറക്കുന്ന സാമ്പാറും എന്റെ മുൻപിൽ വച്ചു… ചായയും..

“കഴിക്ക്… “

എന്ന് പറഞ്ഞു എന്റെ കവിളിൽ ഒരു ഉമ്മയും തന്നു..

അതോടെ പിടിച്ചു നിർത്തിയ എല്ലാം പൊട്ടി.. ഒരു കരച്ചിലോടെ ഞാൻ അമ്മയുടെ വയറിലേക്ക് മുഖം അമർത്തി വച്ച് കരഞ്ഞു..

അമ്മ ഒന്നും മിണ്ടാതെ എന്റെ പുറത്തു തട്ടി.. എന്റെ കരച്ചിൽ ഒന്ന് ഒതുങ്ങിയപ്പോൾ അമ്മ പറഞ്ഞു..

“അമ്മമാർ അങ്ങനെ വല്ലതും ഒക്കെ പറയും.. ചിലപ്പോൾ തല്ലും.. അത് സ്നേഹം കൊണ്ടാണ്.. കേട്ടോ? ചെയ്യാത്ത തെറ്റിനാണ് നിന്നെ തല്ലിയത്.. നീ പറയാനുള്ളത് കെട്ടും ഇല്ല.. തെറ്റാണ്.. എന്നാലും ഞാൻ നിന്റെ അമ്മ അല്ലെ? എന്നോടും ഇങ്ങനെ ഒക്കെ സംസാരിക്കാമോ?”

അത് പറഞ്ഞപ്പോൾ അമ്മയും ഒന്ന് തേങ്ങി.. കരഞ്ഞു..

“സോറി അമ്മേ… “

ഞാൻ അമ്മയെ കെട്ടിപിടിച്ചു കരഞ്ഞു.. കുറച്ചു നിമിഷം കഴിഞ്ഞപ്പോൾ രണ്ടുപേരും ശാന്തരായി…

അമ്മയുടെ കവിളിൽ ഒരു ഉമ്മ കൊടുത്ത ശേഷം ഞാൻ എന്റെ അടുത്ത് പിടിച്ചു ഇരുത്തി..

ഇഡലി മുറിച്ചു സാമ്പാറിൽ മുക്കി ഒരു കഷണം അമ്മയുടെ വായിൽ വച്ച് കൊടുത്തു…

എല്ലാം അവിടെ ഉരുകി തീരുകയായിരുന്നു… അല്ലെങ്കിലും ഒരു അമ്മയ്ക്കും മകനും എത്രനാൾ തെറ്റി ഇരിക്കാൻ കഴിയും?

***

ഞാൻ വീട്ടിൽ നിന്നും ഇറങ്ങിയപ്പോൾ കുറെ അധികം മിസ്ഡ് കാൾസ് ഉണ്ടായിരുന്നു. അശ്വിനി ആണ്.. ഞാൻ തിരിച്ചു വിളിച്ചില്ല..

ടൗണിൽ ടാക്സി ഇട്ടു കാത്തു കിടക്കുമ്പോൾ ഒരാൾ വന്നു വണ്ടിയിൽ കയറി..

അശ്വിനി..