നെൽവയലുകളാലും കരിമ്പനാകളാലും മലകളാലും ചുറ്റപ്പെട്ട പ്രകൃതി സുന്ദര ജില്ലയാണ് പാലക്കാട്. അവിടെ ജനിച്ച് വളർന്ന നാട്ടിൻപുറത്തുകാർ ഒരുതവണ എങ്കിലും ഒടിയൻ കഥ കേട്ടിരിക്കും. അവധി ദിവസങ്ങളിലും ഒഴിവ് സമയങ്ങളിലും കാലും നീട്ടിയിരുന്ന് മുറുക്കാൻ ചവച്ച് ചുവന്ന ചുണ്ടുകൾ ചലിപ്പിച്ച് കഥപറയുന്ന മുത്തശ്ശിമാരുടെ അടുത്ത് കുട്ടികൾ വട്ടംകൂടും. പേടിയെങ്കിലും കഥകേൾക്കാനുള്ള ആവേശം എല്ലാവരിലും ഉണ്ടല്ലോ.അങ്ങനെയൊരു കഥ നിങ്ങൾക്ക് മുന്നിലേക്ക് കൊണ്ടുവരുന്നു

NB: അമിത പ്രതീക്ഷയില്ലാതെ വായിക്കുക കേട്ടറിവുകൾ മാത്രം കൊണ്ടൊരു കഥയാണ്

ഒടിയൻ

Odiyan | Author : Appu

പേരുകേട്ട പ്രമാണിയായ കേശവൻനായരുടെ തറവാടായ കേളകത്ത് മനയെന്ന എട്ടുകെട്ടിന് മുന്നിൽ പണിക്കാരായ പറയനും പുലയനും കൂലി കൊടുക്കുന്ന സമയം.
സന്ധ്യ കഴിഞ്ഞാൽ തറവാട്ടിലെ കാര്യസ്ഥൻ കുഞ്ചൻ ഓരോരുത്തരെയായി വിളിച്ച് അന്നത്തെ കൂലി ഏൽപ്പിക്കും. കൈ പിണച്ച് മാറിൽ വെച്ച് 10 അടി മാറി തലകുനിച്ച് നിൽക്കണം അതാണ് നിയമം. ഇന്നയാൾക്ക് ഇത്ര എന്ന് കണക്കൊന്നും ഇല്ല തോന്നുന്നത് കൊടുക്കും അത് വാങ്ങി പോണം. ആണുങ്ങൾക്ക് ആളൊന്നിന് 4 അണയും പെണ്ണുങ്ങൾക്ക് 2 ഇടങ്ങഴി അരിയും കൊടുക്കും.അതും ഒരു കണക്ക് മാത്രം. സ്ത്രീകൾ മാറിലെ തുണിയഴിച്ച് അതിൽ വേണം അരി വാങ്ങാൻ.തുണിയഴിക്കുമ്പോൾ തൂങ്ങിയാടുന്ന കീഴ്ജാതി സ്ത്രീകളുടെ മുലകൾ കാണാൻ മാത്രം കേശവൻ നായർ തന്റെ പരിവാരങ്ങളുമായി അവിടെ എത്തുന്നതും പതിവായിരുന്നു. സ്ത്രീകൾ അയാളുടെ ദൗർബല്യമായിരുന്നു അത് മുതലെടുത്തവരും അതിന്റെ ഭവിഷത്ത് അനുഭവിച്ചവരും അനവധിയായിരുന്നു.

പാലക്കാട്‌ അന്ന് പാർട്ടി കൊടി ഉയരുന്നതേ ഉള്ളു. തൊഴിലാളികളുടെ പ്രശ്നങ്ങളിൽ ഇടപെട്ട് ആളാവാൻ പോയാൽ പാർട്ടിയും ആപ്പീസും പോയിട്ട് കൊടിപോലും കാണില്ലെന്ന് അറിയാമായിരുന്ന നേതാക്കളും ഇതൊന്നും കണ്ടില്ലെന്ന് വെച്ചു. പക്ഷെ അന്ന് കേശവൻ നായരുടെ മുറ്റത്ത് ഒരു സ്വരമുയർന്നു. സഖാവ് കണ്ണൻ. മുറ്റത്ത് കാലുകുത്താൻ മടിച്ച പാർട്ടി അനുഭാവികളെ പുറത്ത് നിർത്തി കയ്യിൽ ചെങ്കൊടിയെന്തി മിന്നൽപ്പിണർ പോലെ അയാൾ പടിപ്പുര കടന്നെത്തി.

നാടുവാഴി പോലും വണങ്ങുന്ന കേശവൻ നായരെ നോക്കുത്തിയാക്കി നിർത്തി അയാൾ ആ മണ്ണിൽ ചെങ്കൊടി കുത്തി. ചാര നിറത്തിലുള്ള ഷർട്ടും വെള്ളമുണ്ടും ധരിച്ച കണ്ണൻ ഒരു കാളയെപ്പോലെ ആരോഗ്യദൃഡഗാത്രനായിരുന്നു. അമ്പരന്ന് നിന്ന തൊഴിലാളികൾക്ക് മുന്നിൽ അയാൾ അവരുടെ അവകാശങ്ങളെ പറ്റി വാചാലനായി. ഓരോ വാക്കും കേശവൻ നായരുടെ നെഞ്ചത്ത് തറക്കും പോലെ അളന്നു കുറിച്ച് കണ്ണൻ പറഞ്ഞ് തുടങ്ങി. തന്റെ മണ്ണിൽ കൊടി കുത്തിയതും തനിക്ക് എതിരായി സംസാരിക്കുന്നതും കണ്ട കേശവൻ നായർ ദേഷ്യം കൊണ്ട് വിറച്ചു.

നോക്കി നിൽക്കാതെ കൊല്ലടാ ആ നായയെ.!!