MOONLIGHT III

മാലാഖയുടെ കാമുകൻ
Previous part

“മനുഷ്യർ ആയ നിങ്ങൾക്ക് എൽവിഷ് ലോകത്തേക്ക് സ്വാഗതം..”

അത് കേട്ടപ്പോൾ അവർക്ക് ഒരു ഞെട്ടൽ ആയിരുന്നു.. അവർ പരസ്പരം ഒന്ന് നോക്കി..

ആദ്യം ഒരു സംശയം തോന്നിയിരുന്നു എങ്കിലും കഥകളിൽ മാത്രം കേട്ടിട്ടുള്ള എൽഫുകൾ.. ഇപ്പോൾ ഇതാ ജീവനോടെ മുൻപിൽ.. അവരുടെ ലോകത്ത് ആണ് ഞങ്ങൾ എന്ന ചിന്ത എല്ലാവരെയും ഒരു നിമിഷം നിശബ്ദർ ആക്കി..

“ഞാൻ പറയുന്ന ഭാഷ മനസ്സിലാകുന്നുണ്ടോ നിങ്ങൾക്ക്…?”

അവൾ സംശയത്തോടെ ചോദിച്ചു..

“ഉണ്ട്..”

അവർക്ക് അവരുടെ മാതൃ ഭാഷയിൽ ആണ് ആ സ്വരം കേട്ടത്.. എല്ലാവരും ഒരുമിച്ചു ഉണ്ട് എന്ന് പറഞ്ഞപ്പോൾ അവൾ ഒന്ന് ക്ഷീണത്തോടെ പുഞ്ചിരിച്ചു..

“ഞങ്ങൾ ഇവിടെ എത്തിയത്…?”

ജെയിംസ് അവളെ നോക്കി…

“നിങ്ങൾ എങ്ങനെ ഇവിടെ എത്തി എന്നുള്ളത് ഒരു ചോദ്യമാണ്..

കുറച്ചു നാൾ മുൻപേ ആയിരുന്നു എങ്കിൽ എനിക്ക് എല്ലാം അറിയാമായിരുന്നു.. എന്നാൽ ഇപ്പോൾ ആ കഴിവ് ഞങ്ങൾക്ക് ഇപ്പോൾ നഷ്ടപ്പെട്ടിരിക്കുന്നു.. അതിൽ ഒരു മാറ്റം വരും എന്നുള്ള പ്രതീക്ഷയിൽ ആണ് ഞങ്ങൾ..”

അവൾ എന്താണ് പറഞ്ഞത് എന്ന് അവർക്ക് മനസിലായില്ല.. പക്ഷെ എൽവിഷ് ജനത എല്ലാം ശക്തമായ മാജിക്‌ അറിയുന്നവർ ആണെന്ന് ജൂഹിക്ക് അറിയാം..

പല അത്ഭുതങ്ങളും അവർ കാണിക്കാറുണ്ട്.. അവൾക്ക് ഇത് വായിച്ചിട്ട് ഉള്ള അറിവ് ആണ്.. ലോർഡ് ഓഫ് ദി റിങ്സ്, ഹോബ്ബിറ്റ് മുതലായ പുസ്തകങ്ങളിൽ എൽവിഷ് ജനതകളെ കുറിച്ച് ഒരുപാട് ഉണ്ട്.. ജൂഹി അതൊക്കെ ഒന്ന് ഓർത്തു..

“ഞങ്ങൾക്ക് ഒന്നും മനസ്സിലാകുന്നില്ല മിസ്സ്‌..?”

ജെയിംസ് സംശയത്തോടെ അവളെ നോക്കി..