?മയൂരി? [The Beginning][ഖല്‍ബിന്‍റെ പോരാളി ?] 822

““ഈ രണ്ട് കാര്യവും വീട്ടില്‍ പറഞ്ഞ്‌ സമ്മതിച്ചിട്ട് നമ്മുക്ക് തന്നെ….”” അവളെ വിട്ടുകൊടുക്കാന്‍ കഴിയാത്തതിനാൽ ഞാനൊരു ഉപായം പറഞ്ഞ്‌ നോക്കി. പക്ഷെ അത് കുടെ കേട്ടതോടെ അവളുടെ ശാന്ത സ്വഭാവം ഒക്കെ പോയി. അവൾ ഒരു ഭദ്രകാളിയെ പോലെ എന്റെ മേക്കാട്ട് കയറി…

““ഡാ പോത്തെ… നിന്നോട് ഇത്രയും നേരം പറഞ്ഞതൊന്നും നിന്റെ ഈ ആളോഴിഞ്ഞ തലയില്‍ കയറുന്നില്ലേ…. വേണ്ട വേണ്ട എന്ന് വെക്കുമ്പോ നീ തലയില്‍ കയറുകയാണോ…. ഇനി…. ഇനി എന്റെ മുന്നില്‍ എന്തെങ്കിലും പറഞ്ഞ്‌ വന്നാൽ, എന്റെ കൈയിന്റെ ചൂട് നീ അറിയും. പിന്നെ മോന്റെ മനസ്സിലിരിപ്പ് മൊത്തമായി നിന്റെ അമ്മയോടും അച്ഛനോടും പറയും. ബാക്കി അവര് തന്നോള്ളും… മര്യാദയ്ക്ക്…. മര്യാദയ്ക്ക് സ്വന്തം കാര്യം നോക്കി നടന്നോണ്ടു….”” അവൾ കൈ ചൂണ്ടി ദേഷ്യത്തോടെ പറഞ്ഞു. പിന്നെ മറുപടിക്ക് നില്‍ക്കാതെ തിരിഞ്ഞ് നടന്നു. പാവം ഞാൻ എന്ത് പറയണം എന്ത് ചെയ്യണം എന്ന് അറിയാതെ താഴെ വീണ ഇലഞ്ഞി മരത്തിന്റെ ഇലകളെ നോക്കി നിന്നു…

പിന്നിടുള്ള രണ്ട് ദിവസം എന്ത് ചെയ്യണമെന്നറിയാത്ത അവസ്ഥയില്‍ ആയിരുന്നു ഞാൻ. തലവേദന എന്ന് കള്ളം പറഞ്ഞ്‌ സ്കൂളില്‍ പോയില്ല. മനസ്സ് മരവിച്ച പോലെ…അവളെ സ്വന്തമാക്കാന്‍ ഇനി എന്ത് ചെയ്യും എന്ന് എനിക്ക് ഒരു പിടുത്തവും ഉണ്ടായിരുന്നില്ല.

രണ്ടാം ദിവസം വീട്ടില്‍ വെറുതെ അങ്ങോട്ടും ഇങ്ങോട്ടും നടന്നപ്പോഴാണ് അച്ഛന്റെ മുറിയിലേക്ക് ചെന്ന് പെട്ടത്. അവിടെ മേശപ്പുറത്ത് ഉണ്ടായിരുന്ന ഒരു പുസ്തകം എന്നെ ആകര്‍ഷിച്ചു. അതിന്റെ എഴുത്തുകാരന്റെ പേരാണ് എനിക്ക് കൂടുതൽ ഇഷ്ടമായത്.

പൗലോ കൊയ്ലോ… എന്താ പേര്‌ ലെ… വീട്ടില്‍ തനിച്ചിരുപ്പല്ലേ എന്ന് വെച്ച് പയ്യെ വായിച്ച് തുടങ്ങി. എന്നാൽ അതിലെ ഒരു വരി എന്നെ ഇത്രമേല്‍ സ്വാധീനിക്കും എന്ന് ഞാൻ പോലും വിചാരിച്ചില്ല.

“ഒരു കാര്യം നിങ്ങൾ തീവ്രമായി ആഗ്രഹിച്ചാൽ അതിന്റെ സഫലീകരണത്തിനുവേണ്ടി ഈ പ്രപഞ്ചം മുഴുവൻ നിങ്ങളോടൊത്തു ഒരു ഗൂഢാലോചനയിൽ ഏർപ്പെടും”

അന്ന് എന്റെ മനസില്‍ ആ വാക്കുകൾ അടിവരയിട്ടു കിടന്നു. അവളെ സ്വന്തമാക്കുന്നതിന് അതിയായി ആഗ്രഹമുണ്ടാക്കിയെടുക്കാൻ ശ്രമിച്ചു. അതിനായി അവളുടെ അവഗണനകളെ പ്രചോദനമാക്കി..

പിറ്റേന്ന്‌ തൊട്ട് സ്കൂളിൽ പോയി തുടങ്ങി. അവളെ കാണാനുള്ള ഒരു അവസരം പാഴാക്കാതെയായി. അവൾ ദേഷ്യപ്പെട്ട് മുഖം തിരിച്ച് നടക്കുമ്പോഴും ഞാൻ ഒരു ചിരിയോടെ അവളുടെ മുന്നില്‍ പ്രത്യക്ഷപ്പെട്ടു. അതുവരെ കിട്ടിയ ചിരിയും നാരങ്ങ മിഠായിയും പിന്നെ കിട്ടാതെയായി.

വര്‍ഷങ്ങൾ കൊഴിഞ്ഞ് പോയി. വയസ്സ് വര്‍ധിച്ചുകൊണ്ടിരുന്നു. അവൾ പ്ലസ് ടു കഴിഞ്ഞ് കോളേജിൽ ഡിഗ്രീക്ക് ചേര്‍ന്നു. അതോടെ എനിക്ക് സ്കൂളില്‍ പോവുന്നത് പഠിക്കാൻ മാത്രമായി. ഇടക്ക് ഉത്സവത്തിനോ ഫാമിലി ഫങ്കഷനോ അവളെ കാണുന്നത് മാത്രം എനിക്ക് നയന സുഖം നല്‍കി. പക്ഷേ എന്റെ ആദ്യ പ്രണയം അവളിലേക്ക് തന്നെ ഒഴുകിയിരുന്നു.